ក្រុមបាតុកររាប់ម៉ឺននាក់មកពីបណ្ដាខេត្តនានា ដែលគាំទ្រគណបក្សសង្គ្រោះជាតិ បានធ្វើដំណើរមកចូលរួមធ្វើបាតុកម្មអហិង្សានៅថ្ងៃទី២៣ តុលា នៅទីលានប្រជាធិបតេយ្យ បានទទួលបន្ទុកលើការចំណាយលើចំណីអាហារ និងការចំណាយផ្សេងៗទៀតដោយខ្លួនឯង។
បាតុករដែលគាំទ្រគណបក្សសង្គ្រោះជាតិ មានគម្រោងចំណាយខុសៗគ្នាទៅតាមធនធានរបស់គេ។ បាតុករមួយចំនួនបានត្រៀមរបស់របរ ឬចំណីអាហាររួចជាស្រេច ដើម្បីធ្វើដំណើរមកចូលរួមធ្វើមហាបាតុកម្មអហិង្សានៅរាជធានីភ្នំពេញ។ ទោះជាយ៉ាងណា បាតុករភាគច្រើនបានចំណាយថវិកា ចំណាយលើចំណីអាហារប្រចាំថ្ងៃអំឡុងពេលធ្វើបាតុកម្មនេះ មានចន្លោះពី ៨ពាន់រៀល ទៅ ១ម៉ឺនរៀល។ បន្ថែមលើនេះ ក្រុមបាតុករបានអះអាងថា គេពេញនឹងការលះបង់នេះ ដើម្បីទាមទារយុត្តិធម៌នៅក្នុងសង្គម។
អ្នកវិភាគអាជីវកម្មវិញបានអះអាងថា អាជីវកម្មនិងការធ្វើបាតុកម្មរបស់គណបក្សសង្គ្រោះជាតិនេះ ពិបាកនឹងសន្មតថា អ្នកណាចំណេញ ឬអ្នកណាខាតបង់ណាស់ ដោយសារតែអ្នកធ្វើបាតុកម្មជាសកម្មជននយោបាយ។ ការចូលរួមធ្វើបាតុកម្មនេះ គឺជាការបង្ហាញអំពីឆន្ទៈរបស់អ្នកគាំទ្រជាជាង ការជះឥទ្ធិពលដល់សកម្មភាពសេដ្ឋកិច្ច និងអាជីវកម្មផ្សេង។
អ្នកវិភាគអាជីវកម្មលោក ឌិន វីរៈ មានប្រសាសន៍ថា ការធ្វើបាតុកម្មជាការស្ម័គ្រចិត្តរបស់អ្នកគាំទ្ររបស់បក្សមួយដែលក្រុមបាតុករពេញចិត្តនឹងការចំណាយទាំងអស់។ ប៉ុន្តែការវិភាគផ្នែកសេដ្ឋកិច្ចវិញ គឺជារឿងពិបាកសន្និដ្ឋានថា ក្រុមអ្នកណាខាត ហើយអ្នកណាចំណេញបានណាស់។ ប៉ុន្តែការធ្វើបាតុកម្មនេះ អាចធ្វើឲ្យអាជីវកម្មតូចតាចនៅតាមផ្លូវដែលធ្វើបាតុកម្មចំណេញច្រើនពីការចំណាយរបស់ក្រុមបាតុករ។
យ៉ាងណាក៏ដោយក្រុមអង្គការសង្គមស៊ីវិលនានា មិនអាចប៉ាន់ស្មានថា ចំនួនបាតុករដែលបានចូលរួមបាតុកម្មអហិង្សានៅថ្ងៃទី២៣ តុលា មានចំនួនប៉ុន្មាននាក់នោះឡើយ ប៉ុន្តែគណបក្សសង្គ្រោះជាតិ បានអះអាងថា ក្រុមបាតុករដែលចូលរួមធ្វើបាតុកម្មអហិង្សានៅថ្ងៃដំបូងនេះ មានចំនួន ៧ម៉ឺននាក់ ដែលបរិមាណនេះ ក្រុមបាតុករទាំងអស់អាចចំណាយថវិកាលើចំណីអាហារយ៉ាងហោចណាស់ចន្លោះពី ១០ម៉ឺន ទៅ ១៥ម៉ឺនដុល្លារអាមេរិក នាថ្ងៃធ្វើបាតុកម្មនាថ្ងៃដំបូងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។