ជំទប់ទី១ និងជំទប់ទី២ មកពីគណបក្សប្រឆាំងនៃឃុំកោះថ្កូវ ស្រុកជលគីរី ខេត្តកំពង់ឆ្នាំង បានចោទប្រកាន់មេឃុំមកពីគណបក្សប្រជាជនកម្ពុជា ថាបានបិទទ្វារសាលាឃុំ មិនឲ្យពួកគាត់ចូលធ្វើការបម្រើប្រជាពលរដ្ឋនៅពេលដែលលោកមេឃុំមិននៅ។
ជំទប់ទី១ ឃុំកោះថ្កូវ មកពីគណបក្ស សម រង្ស៊ី គឺលោក ជឹម ស៊ីយុត បានឲ្យដឹងនៅព្រឹកថ្ងៃទី៣១ ឧសភា ថា ជាច្រើនលើកច្រើនសារហើយដែលលោកទៅសាលាឃុំ លោកមិនអាចចូលអង្គុយធ្វើការបម្រើប្រជាពលរដ្ឋបានទេ ដោយសារលោកមេឃុំបានចាក់សោទ្វារ ពេលដែលលោកមេឃុំមិននៅ។
ជំទប់ឃុំរូបនេះបន្តថា ក្នុងនាមលោកជាជំទប់ តែលោកមេឃុំមិនដែលចាត់តាំងការងារអ្វីមួយឲ្យលោកធ្វើនោះទេ ហើយសូម្បីតែរបាយការណ៍ហិរញ្ញវត្ថុប្រចាំខែ ក៏លោកមេឃុំមិនឲ្យលោកដឹងដែរ៖ «ការរើសអើងនៅសាលាឃុំ គឺមានតាំងពីចូលធ្វើការដំបូងមកម្ល៉េះ គេមិនដែលឲ្យខ្ញុំធ្វើការអីទេ។ បើចូលមកអង្គុយក្នុងសាលាឃុំ ក៏ដូចជាទីងមោងដែរ។ ហើយនៅពេលគាត់មិននៅ ទោះជាច្រើនថ្ងៃ ក៏គាត់មិនដែលផ្ទេរសិទ្ធិការងារឲ្យជំទប់ទី១ ឬជំទប់ទី២ បម្រើប្រជាពលរដ្ឋដែរ»។
លោក សូ យ៉េត ជាជំទប់ទី២ ឃុំមកពីគណបក្ស សិទ្ធិមនុស្ស ក៏បានឲ្យដឹងប្រហាក់ប្រហែលគ្នាថា លោកពុំដែលទទួលបានការចាត់តាំងការងារអ្វីក្នុងឃុំទេ បើទោះបីជាក្នុងរចនាសម្ព័ន្ធចែងថា ជំទប់ទី២ ទទួលបន្ទុកជួយមេឃុំលើកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់សាធារណៈក៏ដោយ។
ឆ្លើយតបចំពោះការចោទប្រកាន់របស់ជំទប់ឃុំទាំង ២រូប មកពីគណបក្សប្រឆាំង មេឃុំកោះថ្កូវ លោក ចិន ផាន់ណា បន្ទោសថា មកពីលោកជំទប់ទាំង ២រូបនេះ គិតតែពីធ្វើការងារផ្ទាល់ខ្លួន និងការងារគណបក្ស មិនមកធ្វើការងារនៅសាលាឃុំឲ្យទៀងទាត់ ហើយបែរជាយកលេសបន្ទោសលោកទៅវិញ៖ «ខ្ញុំមិនដឹងថាគាត់មកថ្មើរណាទេ គាត់ថាសាលាឃុំបិទទ្វារ។ រាល់ថ្ងៃម៉ោង ៨ជាងហើយគាត់នៅមិនទាន់មកដល់ទៀត។ អ៊ីចឹង សាលាឃុំដែលមានមន្ត្រីឃុំត្រូវចុះទៅតាមភូមិនោះ មិនអាចបើកទ្វារចោលបានទេ ព្រោះគ្មានមនុស្សចាំ ហើយនៅក្នុងឃុំមានឯកសារច្រើន ឃុំនៅឆ្ងាយពីផ្ទះប្រជាពលរដ្ឋ គាត់មិនសូវមកធ្វើការ គាត់គិតតែធ្វើការងារផ្ទាល់របស់គាត់»។
ទាក់ទិនចំពោះបញ្ហានេះ នាយកប្រតិបត្តិអង្គការខុមហ្វ្រែល (Comfrel) ដែលជាអង្គការមួយតែងតែតាមឃ្លាំមើលការវិវឌ្ឍន៍ប្រព័ន្ធវិមជ្ឈការ និងវិសហមជ្ឈការក្នុងប្រទេសកម្ពុជា មានប្រសាសន៍ថា ប្រសិនបើបញ្ហាបែបនេះកើតមានម្ដងម្កាលនោះ វាគ្រាន់តែជាបញ្ហាកង្វះខាតផ្នែករដ្ឋបាល។ ប៉ុន្តែ បើបញ្ហានេះកើតមានញឹកញាប់ ឬជាប្រចាំនោះ គឺវាជាបញ្ហារើសអើងផ្នែកនយោបាយហើយ៖ «ជំទប់ទាំង២ គាត់អាចធ្វើរបាយការណ៍រាប់បញ្ហានេះឲ្យអ្នកសម្របសម្រួលថ្នាក់ស្រុក ឬខេត្តឲ្យជួយដោះស្រាយ ឬទៅក្រសួងមហាផ្ទៃ ព្រោះបើសាលាឃុំបិទញឹកញាប់អ៊ីចឹង ធ្វើឲ្យសេវាសាធារណៈត្រូវស្ទះ ប្រជាពលរដ្ឋជួបការលំបាកមិនអាចទទួលសេវាតាមតម្រូវការបាន»។
មាត្រា៤០ នៃច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ ចែងថា ជំទប់ ចៅសង្កាត់រងជាជំនួយការរបស់មេឃុំ ចៅសង្កាត់ ក្នុងការអនុវត្តភារកិច្ចដែលមេឃុំ ចៅសង្កាត់ប្រគល់ឲ្យ និងជំនួសមេឃុំ ចៅសង្កាត់ទៅតាមឋានានុក្រមនៃជំទប់ ចៅសង្កាត់រង នៅពេលដែលចៅសង្កាត់អវត្តមាន។ មាត្រាដដែលនេះ ក៏ចែងថា ជំទប់ទី១ ឬចៅសង្កាត់រងទី១ ទទួលជួយមេឃុំ ចៅសង្កាត់លើកិច្ចការសេដ្ឋកិច្ច និងហិរញ្ញវត្ថុ។ ឯជំទប់ទី២ ឬចៅសង្កាត់រងទី២ ទទួលបន្ទុកជួយមេឃុំលើកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់សាធារណៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។