បណ្ដាញស្ត្រីវ័យក្មេង និងអង្គការសង្គមស៊ីវិល ស្នើឲ្យរដ្ឋាភិបាលដោះស្រាយ បញ្ហាការអប់រំសម្រាប់ស្ត្រី ដើម្បីត្រៀមខ្លួនទុកជាមុននៅពេលដែលអាស៊ានបង្កើតជាតំបន់តែមួយ ឬសមាហរណកម្មអាស៊ាន នាចុងឆ្នាំ២០១៥ខាងមុខនេះ។ បណ្ដាញស្ត្រីវ័យក្មេង និងសង្គមស៊ីវិលយល់ថា ការអប់រំស្ត្រីកម្ពុជានៅមានភាពទន់ខ្សោយនៅឡើយ ពិសេសស្ត្រីខ្វះចំណេះដឹង និងជំនាញក្នុងការប្រកួតប្រជែងទីផ្សារអាស៊ាន។
ការស្នើសុំរបស់បណ្ដាញស្ត្រីវ័យក្មេង និងអង្គការសង្គមស៊ីវិលទៅកាន់រដ្ឋាភិបាលនៅពេលនេះ ធ្វើឡើងនៅក្នុងកិច្ចពិភាក្សាមួយ ស្ដីពីបញ្ហាស្ត្រីនិងអាស៊ាននៅព្រឹកថ្ងៃទី២៣ ឧសភា នៅទីក្រុងភ្នំពេញ។ បណ្ដាញស្ត្រីវ័យក្មេងចាត់ទុកថា ការមិនពង្រឹងគុណភាពអប់រំ និងមិនមានការផ្សព្វផ្សាយដល់ស្ត្រីឲ្យបានច្រើន គឺជាបញ្ហាធ្វើអោយស្ត្រីប្រឈមនឹង ភាពគ្មានការងារធ្វើ ដើម្បីឆ្លើយតបសមាហរណកម្មនៃសមាគមអាស៊ាន។
ជាតំណាងបណ្ដាញស្ត្រីវ័យក្មេង ក្នុងភាពជាអ្នកដឹកនាំ កញ្ញា ឧក សំអាត បានលើកឡើងថា កិច្ចពិភាក្សានេះ គឺចង់ឲ្យស្ត្រីវ័យក្មេងលើកឡើងពីបញ្ហារបស់ខ្លួន ដើម្បីស្វែងរកដំណោះស្រាយស្នើទៅ កាន់រដ្ឋាភិបាលកម្ពុជា ក៏ដូចជាស្ថាប័នពាក់ព័ន្ធធ្វើយ៉ាងណាឲ្យស្ត្រីកម្ពុជា ទាំងទីក្រុង និងជនបទ ទទួលការអប់រំបានទូលំទូលាយ៖ «ខ្ញុំចង់ឲ្យស្ត្រីកម្ពុជាមានការអប់រំល្អប្រសើរ ដើម្បីមិនភ័យខ្លាចជាមួយទីផ្សារអាស៊ាន»។
ស្របជាមួយគ្នានេះដែរ ជាសមាជិកបណ្ដាញស្ត្រីវ័យក្មេង កញ្ញា ហួត សភា យល់ថា ការអប់រំរបស់ស្ត្រីនៅកម្ពុជា ពិសេសនៅទីជនបទនៅទន់ខ្សោយនៅឡើយ។ កញ្ញានិយាយបន្តថា ការអប់រំដល់ស្ត្រីគឺជារឿងចាំបាច់ដែលរដ្ឋាភិបាលត្រូវតែដោះស្រាយជាបន្ទាន់ ដើម្បីឲ្យកម្ពុជាមានធនធានមនុស្ស កាត់បន្ថយចំណាកស្រុក និងបង្កើនឪកាសការងារដល់ស្ត្រី៖ «រដ្ឋាភិបាលកម្ពុជាត្រូវតែមើល និងទទួលយក និងរកឲ្យឃើញពីតម្រូវការចាំបាច់ស្ត្រី ពិសេសការអប់រំ ចំពោះស្ត្រី»។
មន្ត្រីគម្រោងរបស់អង្គការជនជាតិភាគតិចកម្ពុជា ដែលបានចូលរួមកិច្ចពិភាក្សានេះ កញ្ញា ឡឹក ស្រីនាង និយាយថា បើទោះកម្ពុជានឹងបាន ផលចំណេញច្រើន ពិសេសផ្នែកសេដ្ឋកិច្ចពីសមាហរណកម្មអាស៊ានក្ដី ប៉ុន្តែស្ត្រីកម្ពុជា ពិសេសជនជាតិភាគតិច នៅតែបាត់បង់ឪកាសនៅឡើយ។ កញ្ញា ស្នើទៅកាន់រដ្ឋាភិបាលផ្ដល់ការអប់រំ ទាំងចំណេះជំនាញដល់ស្ត្រីឲ្យមានឪកាសស្មើគ្នា មុននឹងកម្ពុជាចូលជាសមារណកម្មអាស៊ាន៖ «ចំណេះដឹងជនជាតិដើមភាគតិច នៅមានកម្រិតនៅឡើយ បើប្រៀបធៀបនឹងស្ត្រីទូទៅ ដូច្នេះតើពួកគាត់អាចដើរទាន់សមាហរណកម្មអាស៊ានដែររឺទេ ដូច្នេះចាំបាច់វាទាមទារឲ្យរដ្ឋាភិបាល និងស្ថាប័នពាក់ព័ន្ធដោះស្រាយ លើការអប់រំ ក៏ដូចជាផ្សព្វផ្សាយទូលំទូលាយដល់ពួកគាត់»។
ចំណែកឯតំណាងរាស្ត្រគណបក្សសង្គ្រោះជាតិមណ្ឌលបាត់ដំបង អ្នកស្រី មូរ សុខហួរ មានប្រសាសន៍ថា កម្ពុជាមិនអាចមើលរំលងបានឡើយពីធនធានស្ត្រី ដើម្បីចូលរួមអភិវឌ្ឍប្រទេសជាតិ ពិសេសនៅក្នុងការបោះជំហាន ចូលទៅកាន់សមាហរណកម្មអាស៊ាន។ តំណាងរាស្ត្រស្ត្រីរូបនេះ ចង់ឃើញរដ្ឋាភិបាល មានយន្តការលើកកម្ពស់ការអប់រំស្ត្រីបន្ថែមទៀត៖ «ខ្ញុំយល់ថា កម្ពុជាត្រូវតែមានវិធានការ និងគោលនយោបាយ ដើម្បីការពារស្ត្រី ដើម្បីធានាដល់ស្ត្រីកម្ពុជាទទូលបានការអប់រំទូលំទូលាយ ត្រូវតែមានសុវត្ថិភាព សុខភាព និងឪកាសស្មើគ្នានិងបុរស»។
វិទ្យុអាស៊ីសេរី មិនអាចទាក់ទងក្រសួងកិច្ចការនារី ពីបញ្ហាការអប់រំស្ត្រី ដើម្បីត្រៀមខ្លួននឹងសមាហរណកម្មអាស៊ាននាពេលខាងមុខ បាននៅឡើយនៅថ្ងៃទី២៣ ខែ ឧសភា។ ប៉ុន្តែក្រសួងអប់រំយុវជន និងកីឡា កំពុងតែធ្វើកំណែទម្រង់គុណភាពអប់រំ ដោយផ្ដើមពីការប្រឡងសញ្ញាប័ត្រទុតិយភូមិ ឬប្រឡងបាក់ឌុប ដែលជាក្ដីសង្ឃឹមសម្រាប់គុណភាពអប់រំនៅកម្ពុជា។ ប៉ុន្តែកំណែទម្រង់នោះមិនទាន់ឆ្លើយតបនូវល្បឿននៃការវិវឌ្ឍក្នុងតំបន់ និងតម្រូវការទីផ្សារ សម្រាប់ឲ្យយុវជនកម្ពុជា ចាប់យកឱកាសការងារច្រើន នៅពេលដែលសមាហរណកម្មអាស៊ាន ចូលមកដល់បានឡើយ។ បណ្ដាញស្ត្រីវ័យក្មេង និងសង្គមស៊ីវិល ចង់ឲ្យរដ្ឋាភិបាលលើកកម្ពស់ការអប់រំស្ត្រី ដើម្បីឲ្យស្ត្រីកម្ពុជាទទួលផលប្រយោជន៍ពីសមាហរណកម្មអាស៊ាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។