ក្រុមគ្រួសារជនជាប់ចោទ ៦នាក់ អំពាវនាវឲ្យរដ្ឋាភិបាល និងតុលាការ លើកលែងការចោទប្រកាន់តាមផ្លូវច្បាប់ ដោយសំអាងថា មិនមានជាប់ពាក់ព័ន្ធការចូលរួមធ្វើមហាបាតុកម្មរបស់គណបក្សប្រឆាំងឡើយ។
សាលាដំបូងរាជធានីភ្នំពេញ សម្រេចឃុំខ្លួនមនុស្ស ៦នាក់ បណ្ដោះអាសន្ននៅក្នុងពន្ធនាគារ កាលពីថ្ងៃទី១៦ ខែកញ្ញា ក្រោមបទហិង្សាដោយចេតនាមានស្ថានទម្ងន់ទោស និងបទធ្វើឲ្យខូចខាតដោយចេតនាមានស្ថានទម្ងន់ទោស ក្នុងព្រឹត្តិការណ៍ប៉ះទង្គិចហិង្សាជាមួយសមត្ថកិច្ច នៅលើស្ពានអាកាសក្បាលថ្នល់ កាលពីយប់ថ្ងៃទី១៥ ខែកញ្ញា។
ជនជាប់ចោទទាំងនោះ រួមមាន ឈ្មោះ ឯក ចាន់នូ តាំង ជុងស៊ែង សុង និស្ស័យ ឡាញ់ សាមឿន វ៉ា នឿន និងជនជាតិវៀតណាម ម្នាក់ឈ្មោះ ង្វៀន ធីដុក។
អ្នកស្រី សុង សុម៉ាលី ជាអ៊ំរបស់ឈ្មោះ សុង និស្ស័យ រៀបរាប់បណ្ដើរយំបណ្ដើរថា ក្មួយប្រុសរបស់គាត់មិនបានចូលរួមធ្វើបាតុកម្ម ដែលដឹកនាំដោយគណបក្សប្រឆាំងឡើយ។ នៅថ្ងៃកើតហេតុ ឈ្មោះ សុង និស្ស័យ បានទៅចូលរួមដង្ហែសពជីដូនបង្កើត ដែលបានស្លាប់កាលពីថ្ងៃទី១២ ខែកញ្ញា យកទៅបូជានៅវត្តមួយនៅស្រុកស្វាយជ្រំ ខេត្តកណ្ដាល តាំងពីព្រឹក។ លុះពេលរសៀល ក្មួយប្រុសរបស់គាត់បានធ្វើដំណើរត្រឡប់មកផ្ទះវិញនៅចាក់អង្រែ ហើយគាប់ជួនក៏ស្ទះផ្លូវនៅស្ពានអាកាសក្បាលថ្នល់ និងមានការចាប់ខ្លួនតែម្តង។
អ្នកស្រីបញ្ជាក់ថា គាត់មានលិខិតបញ្ជាក់មរណភាពរបស់ម្តាយគាត់ ដែលត្រូវជាជីដូនរបស់ សុង និស្ស័យ ហើយមានសាក្សីជាច្រើនបញ្ជាក់ថា និស្ស័យ មិនជាប់ពាក់ព័ន្ធនឹងការចូលរួមមហាបាតុកម្មនៅថ្ងៃកើតហេតុ។ អ្នកស្រីយល់ឃើញថា ការចាប់ខ្លួនក្មួយប្រុសរបស់គាត់នេះ ជារឿងអយុត្តិធម៌ និងទទូចស្នើសុំឲ្យរដ្ឋាភិបាល និងតុលាការ លើកលែងការចោទប្រកាន់ និងដោះលែងឲ្យក្មួយប្រុសរបស់គាត់មានសេរីភាព និងបានចូលរៀនដូចប្រក្រតីវិញ។
ប្រពន្ធជនជាប់ចោទម្នាក់ទៀត ឈ្មោះ វ៉ា នឿន គឺអ្នកស្រី ហ៊ុន សន ឲ្យដឹងថា នៅថ្ងៃកើតហេតុ ប្ដីរបស់គាត់បានធ្វើដំណើរទៅជួយប្អូនដែលគ្រោះថ្នាក់ចរាចរណ៍នៅជិតស្ពានអាកាសក្បាលថ្នល់ ប៉ុន្តែមិនទាន់ទៅដល់ផង ស្រាប់តែស្ទះផ្លូវ ដែលធ្វើឲ្យប្ដីគាត់ទៅមុខមិនរួច បកក្រោយក៏មិនបាន។ ពេលមានរឿងជ្រួលច្របល់ខ្លាំង ដែលសមត្ថកិច្ចបាញ់កាំភ្លើងនោះ ប្ដីគាត់ក៏បានរត់គេចរកសុវត្ថិភាព ប៉ុន្តែត្រូវសមត្ថកិច្ចចាប់ខ្លួនតែម្តង។
មិនខុសគ្នាដែរ ម្តាយជនជាប់ចោទ តាំង ជុងស៊ែង គឺអ្នកស្រី តាំង នី បញ្ជាក់ថា អ្នកស្រីបានជួបកូនគាត់បានម្តងប៉ុណ្ណោះ ពេលដែលចៅក្រមហៅមកសាកសួរចម្លើយក្នុងសវនាការ ចាប់តាំងពីពេលចាប់ខ្លួន។ លុះពេលដែលគាត់ទៅជួបសួរសុខទុក្ខកូនក្នុងពន្ធនាគារ ឆ្មាំពន្ធនាគារមិនបានអនុញ្ញាតឲ្យជួបនោះឡើយ ដោយគ្មានហេតុផលច្បាស់លាស់។
វិទ្យុអាស៊ីសេរី មិនទាន់អាចសុំការបំភ្លឺពីមន្ត្រីពន្ធនាគារព្រៃស បាននៅឡើយទេ នៅរសៀលថ្ងៃទី២៦ ខែកញ្ញា ជុំវិញការមិនអនុញ្ញាតឲ្យមានគ្រួសារជនជាប់ចោទ មានសិទ្ធិជួបសួរសុខទុក្ខនៅក្នុងពន្ធនាគារ។
ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ (Licadho) លោក អំ សំអាត បញ្ជាក់ថា រហូតមកដល់ថ្ងៃនេះ ក្រុមគ្រួសារសាច់ញាតិជនជាប់ចោទទាំង ៦នាក់ មិនត្រូវបានអនុញ្ញាតឲ្យជួបសួរសុខទុក្ខឡើយ គឺលើកលែងតែមេធាវីការពារក្តីប៉ុណ្ណោះ។
លោកបញ្ជាក់ថា ប្រសិនបើករណីមានជាប់ពាក់ព័ន្ធនឹងបញ្ហានយោបាយនោះ អាចមានសង្ឃឹមថានឹងអាចដោះលែងពួកគេនៅក្រៅឃុំបាន ប្រសិនបើមេដឹកនាំគណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ ជួបចរចាគ្នាដោះស្រាយពីរឿងនេះ។ ប៉ុន្តែ បើតាមការអះអាងរបស់ លោក កឹម សុខា អនុប្រធានគណបក្សសង្គ្រោះជាតិ បញ្ជាក់ថា គណបក្សទាំងពីរមិនមានសញ្ញាណណាមួយជួបចរចាគ្នានៅឡើយទេ។ លោកបន្តថា បើមានឱកាសជួបគ្នានោះ លោកនឹងស្នើសុំឲ្យមានការដោះលែងពួកគេវិញ ដោយលោកចាត់ទុកថា ករណីនេះមានជាប់ទាក់ទងការគំរាមកំហែងខាងនយោបាយ និងសិទ្ធិសេរីភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។