អតីតអ្នកថតរូបអ្នកទោសនៅគុកទួលស្លែង ក្នុងរបបខ្មែរក្រហម លោក ញ៉ែម អេន គ្រោងបើកគណបក្សនយោបាយមួយដើម្បីប្រកួតប្រជែងក្នុងការបោះឆ្នោតជាតិនៅឆ្នាំ២០១៨ ខាងមុខ។
មន្ទីរស-២១ ឬគុកទួលស្លែងក្នុងរបបកម្ពុជាប្រជាធិបតេយ្យ ពីឆ្នាំ១៩៧៥ ដល់ឆ្នាំ១៩៧៩ មានអ្នកទោសប្រហែល ២ម៉ឺននាក់ ត្រូវបានថតរូបមុននឹងគេនាំយកទៅសម្លាប់ចោល។
លោក ញ៉ែម អេន បានដាក់ឈ្មោះគណបក្សរបស់លោកនោះថា «គណបក្សគ្រួសារខ្មែរ»។ លោកប្រាប់សារព័ត៌មាន អេ.ភី (AP) កាលពីថ្ងៃពុធ ទី១ ខែកុម្ភៈ ថា ការដែលលោកសម្រេចបង្កើតគណបក្សមួយដោយខ្លួនឯងបែបនេះ គឺដោយសារតែលោកសង្កេតឃើញថា ទាំងថ្នាក់ដឹកនាំគណបក្សកាន់អំណាច និងគណបក្សប្រឆាំងសុទ្ធតែបម្រើផលប្រយោជន៍ជាតិ និងប្រជាជនដោយមិនស្មោះត្រង់។
លោក ញ៉ែម អេន ក៏ធ្លាប់ជាអតីតអភិបាលរងស្រុកអន្លង់វែង ខេត្តឧត្តរមានជ័យ ដែរ ហើយក្រោយមកលោកក៏ធ្លាប់ធ្វើជាសមាជិកគណបក្សសង្គ្រោះជាតិ មួយរយៈ។ គាត់រងការរិះគន់ថា បានកេងរកផលចំណេញផ្ទាល់ខ្លួនពីការលក់ស្បែងជើងកង់ឡាន និងទ្រនាប់សម្រាប់អង្គុយលើបង្គន់របស់ ប៉ុល ពត។
កាលពីខែកក្កដា ឆ្នាំ២០១៦ ក្រសួងមហាផ្ទៃ បានប្រកាសថា មានគណបក្សនយោបាយចំនួន ៤៤ បានចុះបញ្ជីនៅក្រសួងមហាផ្ទៃ និងនៅគណបក្ស ២៣ ផ្សេងទៀត កំពុងបំពេញបែបបទសុំបើកគណបក្សដើម្បីប្រកួតប្រជែងក្នុងការបោះឆ្នោតនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។