គណបក្សហ្វ៊ុនស៊ិនប៉ិច នឹងរៀបចំធ្វើសមាជវិសាមញ្ញជាថ្មីទៀតនៅថ្ងៃទី១២ ខែមីនា ខាងមុខ នាមជ្ឈមណ្ឌលសន្និបាតកោះពេជ្រ។ នេះជាសមាជលើកទី២ហើយបន្ទាប់ពីសម្ដេចក្រុមព្រះនរោត្តម រណឫទ្ធិ បានយាងត្រឡប់មកដឹកនាំគណបក្សហ្វ៊ុនស៊ិនប៉ិច កាលពីថ្ងៃទី១ ខែមករា ឆ្នាំ២០១៥។
ជំនួយការផ្ទាល់សម្ដេចក្រុមព្រះនរោត្តម រណឫទ្ធិ លោក ញ៉េប ប៊ុនជីន មានប្រសាសន៍ឲ្យដឹងនៅថ្ងៃទី៧ ខែមីនា ថា គោលបំណងនៃសមាជ គឺដើម្បីធ្វើការកែសម្រួលរចនាសម្ព័ន្ធដឹកនាំផ្ទៃក្នុងគណបក្ស។ យ៉ាងណាក៏ដោយ លោកមានប្រសាសន៍ថា លោកមិនអាចបញ្ជាក់អំពីរបៀបវារៈ ឬបង្ហាញកម្មវិធីជាក់លាក់អំពីសមាជនោះបាននៅឡើយទេ។
លោកបន្តថា សម្ដេចក្រុមព្រះបានស្នើបង្កើតគណៈកម្មការចំពោះកិច្ចមួយដើម្បីរៀបចំពិនិត្យកែសម្រួលលក្ខន្តិកៈ និងបទបញ្ជាផ្ទៃក្នុងគណបក្សឡើងវិញឲ្យស្របទៅតាមនយោបាយបច្ចុប្បន្នរបស់គណបក្សហ្វ៊ុនស៊ិនប៉ិច ក្រោយពីសម្ដេចក្រុមព្រះយាងត្រឡប់ ធ្វើជាព្រះប្រធានគណបក្សវិញ។
សេចក្ដីប្រកាសព័ត៌មានរបស់ខុទ្ទកាល័យគណបក្សហ្វ៊ុនស៊ិនប៉ិច ចុះថ្ងៃទី៥ ខែមីនា ឲ្យដឹងថា សមាជនោះនឹងប្រារព្ធធ្វើឡើងក្រោមអធិបតីភាពរបស់សម្ដេចក្រុមព្រះនរោត្តម រណឫទ្ធិ និងដោយមានការចូលរួមពីថ្នាក់ដឹកនាំ សមាជិក-សមាជិកាគណបក្សប្រមាណ ៨០០នាក់ មកពីគ្រប់រាជធានី-ខេត្ត ទូទាំងប្រទេសកម្ពុជា។
សម្ដេចក្រុមព្រះនរោត្តម រណឫទ្ធិ ត្រូវបានគណបក្សហ្វ៊ុនស៊ិនប៉ិច ធ្វើបក្សប្រហារទម្លាក់ពីព្រះប្រធានគណបក្សកាលពីឆ្នាំ២០០៦។ ប៉ុន្តែកាលពីដើមខែមករា ឆ្នាំ២០១៥ ព្រះអង្គបានសម្រេចព្រះទ័យយាងត្រឡប់មកដឹកនាំគណបក្សរាជានិយមមួយនេះជាថ្មីឡើងវិញ បន្ទាប់ពីមានការយាងពីព្រះអនុជរបស់ព្រះអង្គ គឺព្រះរាជបុត្រី នរោត្តម អរុណរស្មី និងលោក ញឹក ប៊ុនឆៃ។ ព្រះអង្គត្រូវបានសមាជគណបក្សជ្រើសតាំងឲ្យធ្វើព្រះប្រធានជាផ្លូវការនៅថ្ងៃទី១៩ ខែមករា។ ចំណែកព្រះរាជបុត្រី នរោត្តម អរុណរស្មី ត្រូវបានជ្រើសតាំងជាអនុប្រធានទី១ និងលោក ញឹក ប៊ុនឆៃ ជាអនុប្រធានទី២គណបក្ស។
យ៉ាងណាក៏ដោយ នៅក្រោយសមាជលើកទី១ ភាពចម្រូងចម្រាសបានកើតឡើងរវាងលោក ញឹក ប៊ុនឆៃ និងលោក សាយ ហាក់ ដែលជាមន្ត្រីស្និទ្ធនឹងព្រះអង្គម្ចាស់ នរោត្តម រណឫទ្ធិ និងដែលអះអាងថា លោកជាអគ្គលេខាធិការប្រតិបត្តិគណបក្សហ្វ៊ុនស៊ិនប៉ិច ទៅលើការប្រើប្រាស់ត្រារបស់គណបក្ស។ ក្រោយមកលោក ញឹក ប៊ុនឆៃ ក៏បានធ្វើសន្និសីទកាសែតសម្ដែងការបារម្ភពីការបែកបាក់ផ្ទៃក្នុងបក្សទៀតផង។
យ៉ាងណាក៏ដោយលោក ញ៉េប ប៊ុនជីន អះអាងថា គណបក្សហ្វ៊ុនស៊ិនប៉ិច មិនមានការបែកបាក់ផ្ទៃក្នុងអ្វីនោះឡើយ ហើយព្រះអនុជ នរោត្តម អរុណរស្មី និងលោក ញឹក ប៊ុនឆៃ ក៏ត្រូវបានគណបក្សយាង និងអញ្ជើញឲ្យចូលរួមក្នុងសមាជនោះផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។