រដ្ឋាភិបាលអាណត្តិថ្មីដាក់ចេញយុទ្ធសាស្ត្រចតុកោណទី៣
2013.09.25
ក្នុងពេលអត្ថាធិប្បាយពីយុទ្ធសាស្ត្រដឹកនាំរាជរដ្ឋាភិបាលអាណត្តិថ្មីនេះ លោក ហ៊ុន សែន បានព្រមានថា នឹងដាក់ពិន័យរដ្ឋបាល ដកតំណែង ឈានទៅដាក់ទោសរដ្ឋមន្ត្រីគ្រប់ក្រសួងស្ថាប័នដែលបក្សពួកនិយម រំលោភអំណាច និងប្រព្រឹត្តអំពើពុករលួយ។
គោលនយោបាយយុទ្ធសាស្ត្រចតុកោណដំណាក់កាលទី៣ នៃរាជរដ្ឋាភិបាលថ្មី ប្រកាសផ្ដោតសំខាន់លើការអភិវឌ្ឍគោលដៅអាទិភាពចំនួន ៤ គឺការអភិវឌ្ឍធនធានមនុស្ស ការស្ថាបនាបណ្ដាញគមនាគមន៍ ការអភិវឌ្ឍវិស័យអគ្គិសនី និងការប្រើប្រាស់ធនធានទឹកឲ្យមានប្រសិទ្ធភាព។យុទ្ធសាស្ត្រថ្មីនេះ ជ្រើសយកអភិបាលកិច្ចល្អ ឬការគ្រប់គ្រងល្អជាគោល ដោយកំណត់ធ្វើកំណែទម្រង់លើវិស័យសំខាន់ៗចំនួន ៤ គឺបំបាត់អំពើពុករលួយក្នុងស្រទាប់មន្ត្រី កែទម្រង់ប្រព័ន្ធច្បាប់ និងយុត្តិធម៌ កែទម្រង់រដ្ឋបាលសាធារណៈ កែទម្រង់កងកម្លាំងប្រដាប់អាវុធ។
បន្ទាប់ពីថ្លែងពីដំណើរការ និងមូលហេតុនៃការរៀបចំយុទ្ធសាស្ត្រចតុកោណដំណាក់ទី៣ លោក ហ៊ុន សែន បានចំណាយពេលជាង ៤០នាទី ដើម្បីពន្យល់ពីចំណុចគោលសំខាន់នៃយុទ្ធសាស្ត្រចតុកោណដែលមានអភិបាលកិច្ចល្អជាស្នូល។ ចំណុចអភិបាលកិច្ចនេះ ត្រូវបាននាយករដ្ឋមន្ត្រីអាណត្តិថ្មីដែលកាន់អំណាចជាង ៣០ឆ្នាំហើយនោះ ចង្អុលមុខទៅគណៈរដ្ឋមន្ត្រីរបស់ខ្លួនឲ្យលុបបំបាត់អំពើរំលោភអំណាច និងបក្សពួកនិយមក្នុងស្ថាប័នរដ្ឋ។
លោក ហ៊ុន សែន មានប្រសាសន៍ថា កន្លងទៅមានរដ្ឋមន្ត្រីមួយចំនួនបានរៀបចំរចនាសម្ព័ន្ធសម្រាប់ប្រព្រឹត្តអំពើពុករលួយដោយចាត់ទុកស្ថាប័នរដ្ឋប្រៀបដូចជាគ្រួសាររបស់ខ្លួន។ លោកបន្តថា នៅអាណត្តិថ្មីនេះ រដ្ឋមន្ត្រីគ្រប់ក្រសួងត្រូវតែចាប់ផ្ដើមប្ដូរផ្នត់គំនិត និងទង្វើមិនសមរម្យឲ្យអស់ បើមិនដូចនេះទេ លោកនឹងមិនអត់ឱនឲ្យបានឡើយ។
លោកបានប្រៀបធៀបការបំពេញការងាររបស់មន្ត្រីទៅនឹងអាកប្បកិរិយារបស់មនុស្ស រួមមាន ងូតទឹក ឆ្លុះកញ្ចក់ ដុសក្អែល និងព្យាបាលខ្លួន។ បានន័យថា មន្ត្រីទាំងនោះត្រូវកសាងខ្លួនឲ្យល្អ ដោយផ្អែកលើការឲ្យតម្លៃពីភាគីពាក់ព័ន្ធ ដូចជាពលរដ្ឋ សង្គមស៊ីវិល បក្សប្រឆាំង ហើយបើធ្វើមិនបានទេ គឺនឹងត្រូវរងពិន័យរហូតដល់ដាក់ទោសតាមច្បាប់។
ក្រៅពីនេះ លោក ហ៊ុន សែន ក៏បានលើកឡើងពីចំណុចគុណសម្បត្តិ និងគុណវិបត្តិរបស់រាជរដ្ឋាភិបាលកាលពីអាណត្តិទី៤ ផងដែរ។ គុណសម្បត្តិទាំងនោះ មានជាអាទិ ការបំពេញតួនាទីក្នុងតំបន់អាស៊ាន និងពិភពលោក ការសម្រេចបាននូវផែនការយុទ្ធសាស្ត្រអភិវឌ្ឍន៍សហស្សវត្ស ការរក្សាបាននូវសន្តិសុខ ស្ថិរភាពនយោបាយនិងសង្គម ការពង្រឹងខឿនការពារជាតិ ការកសាងហេដ្ឋារចនាសម្ព័ន និងកំណើនសេដ្ឋកិច្ចជាតិជាដើម។ ចំណែកឯគុណវិបត្តិវិញ រួមមាន ការប្រព្រឹត្តអំពើពុករលួយ ទាំងក្នុងស្ថាប័នរដ្ឋនិងតុលាការ ដែលនាំឲ្យពលរដ្ឋបាត់បង់ទំនុកចិត្ត ការខ្វះខាតធនធានមនុស្សផ្នែកបច្ចេកទេស បទល្មើសព្រៃឈើ កុងត្រូលជជុះ ការខ្វះខាតប្រព័ន្ធធារាសាស្ត្រសម្រាប់វិស័យកសិកម្ម ។ល។
រដ្ឋាភិបាលអាណត្តិថ្មីរបស់លោក ហ៊ុន សែន បានកើតឡើងកាលពីថ្ងៃទី២៤ ខែកញ្ញា ដោយមានការគាំទ្រតែពីសមាជិកសភារបស់ខ្លួនចំនួន ៦៨រូប ដោយអវត្តមានបក្សប្រឆាំង។ មជ្ឈដ្ឋានអ្នកវិភាគខ្លះបញ្ជាក់ថា គណៈរដ្ឋមន្ត្រីថ្មីនេះ ជាអង្គការចាត់តាំងដោយមិនមានការឯកភាពជាតិ ពោលគឺប្រជានុរាស្ត្រដែលបោះឆ្នោតឲ្យបក្សប្រឆាំងជិត ៣លាននាក់កើតទុក្ខមិនសុខចិត្ត។
នៅពេលដំណាលគ្នានឹងលោក ហ៊ុន សែន ថ្លែងបើកកិច្ចប្រជុំក្នុងទីស្ដីការនាយករដ្ឋមន្ត្រី គណបក្សសង្គ្រោះជាតិ ក៏បានធ្វើសន្និសីទកាសែតមិនទទួលស្គាល់គណៈរដ្ឋមន្ត្រីនេះឡើយ ហើយបក្សប្រឆាំងព្រមានធ្វើមហាបាតុកម្មប្រឆាំងនឹងរដ្ឋាភិបាលនីតិកាលទី៥នេះ ដើម្បីទាមទារឲ្យរកយុត្តិធម៌ជូនម្ចាស់ឆ្នោត និងទារយកតំណែងគ្រប់គ្រងរដ្ឋសភា។
ក្នុងកិច្ចប្រជុំគណៈរដ្ឋមន្ត្រីលើកទី១នេះ លោក ហ៊ុន សែន បានបញ្ជាឲ្យមន្ត្រីក្រោមឱវាទរៀបចំវេទិកាសាធារណៈទូទាំងប្រទេស និងវេទិការិះគន់ទិតៀនក្នុងស្ថាប័នរដ្ឋ ដើម្បីប្រមូលយកបញ្ហាទាំងឡាយមកដោះស្រាយ។ គណៈរដ្ឋមន្ត្រីក៏ប្រកាសរំលាយស្ថាប័នសំខាន់ៗ ដែលធ្លាប់ស្ថិតក្រោមការគ្រប់គ្រងរបស់ទីស្ដីការគណៈរដ្ឋមន្ត្រី និងក្រោមឥទ្ធិពលរបស់លោក សុខ អាន ដូចជាស្ថាប័នក្រុមប្រឹក្សាកំណែទម្រង់រដ្ឋ ក្រុមប្រឹក្សាកំណែទម្រង់ច្បាប់ និងប្រព័ន្ធយុត្តិធម៌ គណៈកម្មាធិការទទួលស្គាល់គុណភាពអប់រំ អាជ្ញាធរបឹងទន្លេសាប និងអាជ្ញាធរមួយចំនួនផ្សេងទៀតដែលលោក ហ៊ុន សែន ចាត់ទុកស្ថាប័នទាំងនេះជាឆ្អឹងទទឹងក ដែលរារាំងការធ្វើកំណែទម្រង់រដ្ឋ។
លើសពីនេះ លោក ហ៊ុន សែន ក៏បានបញ្ជាឲ្យស្ថាប័នពាក់ព័ន្ធរៀបចំសេចក្ដីព្រាងច្បាប់ស្ដីពីសហលក្ខន្តិកៈចៅក្រម និងព្រះរាជអាជ្ញា ច្បាប់ស្ដីពីការរៀបចំ និងប្រព្រឹត្តទៅនៃអង្គចៅក្រម ធ្វើកំណែទម្រង់សមាសភាពឧត្ដមក្រុមប្រឹក្សានៃអង្គចៅក្រម រៀបចំច្បាប់ជំរុញវិស័យបណ្ដុះបណ្ដាលវិជ្ជាជីវៈជាដើម។
រដ្ឋាភិបាលអាណត្តិថ្មីនេះ ក៏មិនទាន់បោះបង់មហិច្ឆតាបង្កើតច្បាប់គ្រប់គ្រងសមាគមនិងសង្គមស៊ីវិលដែរ ប៉ុន្តែច្បាប់នេះនឹងត្រូវដាក់ឲ្យសង្គមស៊ីវិលពិភាក្សាលម្អិតជាមុនសិន។ ទោះជាបែបណាក្តី ច្បាប់ស្ដីពីសិទ្ធិទទួលបានព័ត៌មានដែលជាឧបករណ៍សំខាន់ក្នុងការលើកស្ទួយលទ្ធិប្រជាធិបតេយ្យ មិនទាន់ត្រូវបានមន្ត្រីគណបក្សប្រជាជនកម្ពុជា ដែលកាន់កាប់រាជរដ្ឋាភិបាលពេលនេះយកមកគិតគូរនៅឡើយទេ។
ក្នុងការថ្លែងរយៈពេលមួយព្រឹកពេញ លោក ហ៊ុន សែន ឆ្លៀតវាយប្រហារគោលនយោបាយដំឡើងប្រាក់ខែមន្ត្រីរាជការរបស់បក្សប្រឆាំងដែរ ហើយលោកក៏បានសម្រេចដំឡើងប្រាក់ខែឲ្យមន្ត្រីរាជការមួយចំនួនទៀតផង។ យុទ្ធសាស្ត្រចតុកោណដំណាក់កាលទី៣ បង្ហាញគោលដៅចង់ឲ្យកម្ពុជា ក្លាយជាប្រទេសមានចំណូលមធ្យមកម្រិតទាបនៅឆ្នាំ២០១៨ និងជាប្រទេសមានចំណូលមធ្យមនៅឆ្នាំ២០៣០ និងប្រទេសអភិវឌ្ឍន៍នៅឆ្នាំ២០៥០។
អ្នកវិភាគបញ្ហាសង្គមមួយចំនួនយល់ថា គោលនយោបាយកែទម្រង់របស់រដ្ឋាភិបាលមានភាពប្រសើរ ប៉ុន្តែគេត្រូវរង់ចាំមើលថា តើរាជរដ្ឋាភិបាលអាណត្តិនេះ នឹងបំពេញការងារយ៉ាងដូចម្ដេច ឬដូចអាណត្តិទី៤ទៀត ឬក៏យ៉ាងណា?