អង្គភាពព័ត៌មានប្រតិកម្មរហ័សនៃទីស្ដីការគណៈរដ្ឋមន្ត្រីនៅថ្ងៃទី១៧ កក្កដា បានចេញសេចក្ដីថ្លែងការណ៍ រិះគន់លើរបាយការណ៍មួយដែលត្រូវបានរដ្ឋាភិបាលអះអាងថា ជាការបន្លំឯកសារស្ទង់មតិរបស់វិទ្យាស្ថានសាធារណរដ្ឋអន្តរជាតិ ហើយកំពុងត្រូវបានចែកចាយ និងឃោសនានូវឯកសារក្លែងក្លាយស្តីអំពីលទ្ធផលនៃការស្ទង់មតិប៉ាន់ស្មាននោះ អំពីការទទួលបានអាសនៈតាមរាជធានី និងខេត្តនីមួយៗ។
ក្នុងសេចក្ដីថ្លែងការណ៍នោះ ក៏បានដាក់ចេញនូវបទបញ្ជាឲ្យស្វែងរកចាប់ខ្លួនជនក្លែងបន្លំឯកសារ និងអ្នកបន្តប្រើប្រាស់ឯកសារនោះ ដើម្បីបញ្ជូនទៅកាន់តុលាការផ្ដន្ទាទោសតាមផ្លូវច្បាប់ និងអំពាវនាវសុំឲ្យជនរួមគំនិតពាក់ព័ន្ធក្នុងការផលិតឯកសារនេះចេញមុខសារភាព រាជរដ្ឋាភិបាលមានរង្វាន់ជូន។
ស្របពេលនេះដែរ អ្នកស្រី ជេស៊ីកា ឃីហ្គែន (Jessica Keegan) ប្រធានវិទ្យាស្ថានសាធារណរដ្ឋអន្តរជាតិ បានធ្វើការបដិសេធលើរបាយការណ៍នោះ ថាមិនមែនជាឯកសាររបស់វិទ្យាស្ថាន IRI របស់អ្នកស្រីនោះទេ។
អ្នកស្រីបានបន្ថែមថា វិទ្យាស្ថានសាធារណរដ្ឋអន្តរជាតិ ធ្លាប់បានធ្វើការស្ទាប់ស្ទង់មតិទាក់ទងនឹងការបោះឆ្នោតតែម្ដងគត់នៅដើមឆ្នាំ២០១៣៖ «ប្រធានវិទ្យាស្ថានសាធារណរដ្ឋអន្តរជាតិ បានធ្វើការស្ទង់មតិតែម្តង់គត់ដែលបានបញ្ចប់នៅខែមករា និង កុម្ភៈ នៅដើមឆ្នាំនេះ ដែលអាចរកឃើញក្នុងគេហទំព័ររបស់យើង iri.org។ ការស្ទង់មតិនេះត្រូវបានធ្វើបទបង្ហាញទៅកាន់ភាគីពាក់ព័ន្ធនៅខែឧសភា។ ដូច្នេះយើងបានធ្វើការស្ទង់មតិនៅខែមករា និង កុម្ភៈ ហើយត្រូវបានធ្វើបទបង្ហាញនៅខែឧសភា»។
ទោះជាយ៉ាងណាក្តី អ្នកស្រីមានប្រសាសន៍ថា ប្រធានវិទ្យាស្ថានសាធារណរដ្ឋអន្តរជាតិ នឹងមិនដាក់ពាក្យបណ្តឹងប្រឆាំងនឹងអ្នកផលិតឯកសារក្លែងក្លាយនោះឡើយ។
របាយការណ៍ស្ទង់ស្ទាបមតិនោះ បានបង្ហាញពីលទ្ធផលស្ទង់មតិអ្នកបោះឆ្នោតគាំទ្រគណបក្សនយោបាយដែលចូលរួមការបោះឆ្នោតថ្ងៃទី២៨ កក្កដា ឆ្នាំ២០១៣។ របាយការណ៍ស្ទង់មតិនោះ បានបង្ហាញថា គណបក្សប្រជាជនកម្ពុជា ទទួលបានអាសនៈចំនួន ៥៩ និងគណបក្សសង្គ្រោះជាតិ ទទួលបានអាសនៈ ៦៤ ក្នុងរដ្ឋសភា គឺគណបក្សសង្គ្រោះជាតិ ឈ្នះកៅអី ឬអាសនៈ លើស គណបក្សប្រជាជនកម្ពុជា ចំនួន ៥អាសនៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។