រាជរដ្ឋាភិបាលកាលពីថ្ងៃទី២៧ ខែមករា បានចេញសារាចរណែនាំមួយស្ដីពីការបង្កើតក្រុមការងារចុះមូលដ្ឋាន ដើម្បីត្រួតពិនិត្យការអនុវត្តយុទ្ធសាស្ត្រចតុកោណ ដើម្បីត្រួតពិនិត្យនិងគាំទ្រយុទ្ធសាស្ត្រនេះ។
ក្រុមការងារថ្នាក់ជាតិចុះមូលដ្ឋានទាំង ២៥ រាជធានី ខេត្ត ទូទាំងប្រទេស មានសមាសភាពជាង ៣០រូប ក្នុងមួយក្រុមៗ។ ក្រុមខ្លះ ដឹកនាំដោយឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ហើយក្រុមខ្លះទៀតក៏ដឹកនាំដោយឧត្ដមសេនីយ៍យោធាដែរ។ ក្រុមការងារទាំងនោះមានភារកិច្ចចម្បង គឺបង្ខិតមន្ត្រីរដ្ឋាភិបាលឲ្យនៅជិតរាស្ត្រតូចតាច ។
គណៈរដ្ឋមន្ត្រីរបស់លោកនាយករដ្ឋមន្ត្រី ហ៊ុន សែន បានបើកកិច្ចប្រជុំចង្អៀតមួយកាលពីថ្ងៃទី២៩ ខែមករា ដោយកំណត់ថា ក្រុមការងារចម្រុះចុះមូលដ្ឋានរបស់រដ្ឋាភិបាល នឹងចុះមូលដ្ឋានទៅដល់មូលដ្ឋាននៅចុងសប្ដាហ៍ទី២ ខែកុម្ភៈ នេះ។ ក្រុមការងារទាំងនោះនឹងចុះរៀបចំវេទិកាសាធារណៈនៅតាមខេត្ត ក្នុងបំណងប្រមូលមតិយោបល់ និងសេចក្ដីត្រូវការរបស់ពលរដ្ឋ។
នៅក្នុងនាទីវេទិកាអ្នកស្ដាប់វិទ្យុអាស៊ីសេរី មន្ត្រីអ្នកនាំពាក្យទីស្ដីការគណៈរដ្ឋមន្ត្រី និងជារដ្ឋលេខាធិការ លោក ផៃ ស៊ីផាន ពន្យល់ថា ការងារអាទិភាពដំបូងគេបង្អស់របស់ក្រុមការងារចុះមូលដ្ឋាន គឺជាការបង្ខិតគម្លាតមន្ត្រីរដ្ឋាភិបាលឲ្យទៅកៀកនឹងពលរដ្ឋតាមជនបទ។ ហើយពេលនេះ ការិយាល័យធ្វើការរបស់មន្ត្រីរដ្ឋាភិបាល មិនមែនផ្តុំគ្នានៅរាជធានីភ្នំពេញ ទៀតទេ។
លោកបន្តថា ក្រុមការងាររដ្ឋាភិបាលប្រមូលមតិរាស្ត្រដោះស្រាយបញ្ហាជូនរាស្ត្រ ប៉ុន្តែមិនលូកដៃត្រួតត្រាអាជ្ញាធរមានសមត្ថកិច្ចនៅថ្នាក់មូលដ្ឋានទេ។ លោកបញ្ជាក់ថា គោលដៅសំខាន់នៃក្រុមការងារ គឺកាត់បន្ថយការិយាធិបតេយ្យ បោសសំអាតអំពើពុករលួយថ្នាក់ក្រោម និងពង្រឹងសេវាសាធារណៈឲ្យមានប្រសិទ្ធភាព។
លោក ផៃ ស៊ីផាន រំពឹងថា ក្រុមការងារចុះមូលដ្ឋាននឹងសម្រេចបានលទ្ធផលផ្លែផ្កាទៅតាមផែនការយុទ្ធសាស្ត្រដែលបានកំណត់ ហើយសង្ឃឹមថា បានទទួលបានការស្វាគមន៍ពីពលរដ្ឋទូទាំងប្រទេស។ លោកបន្ថែមថា ក្រុមការងារនេះមិនមែនធ្វើការដើម្បីបក្សទេ តែជាប្រយោជន៍ជាតិទាំងមូលតែម្ដង។
ទាក់ទងនឹងការបង្កើតក្រុមការងារចុះមូលដ្ឋាននេះ ប្រិយមិត្តអ្នកស្ដាប់ដែលទូរស័ព្ទចូលកម្មវិធីវេទិកាអ្នកស្ដាប់វិទ្យុអាស៊ីសេរី ចំនួន ៣នាក់ សុទ្ធតែបង្ហាញចំណាប់អារម្មណ៍ថា ពួកគាត់មិនមានជំនឿចិត្តលើក្រុមការងារនេះ ថានឹងបំពេញការងារបានល្អឡើយ។
លោក ផៃ ស៊ីផាន ឆ្លើយវិញថា រដ្ឋាភិបាលបានប្ដេជ្ញារួចហើយ ដើម្បីកែលម្អកំហុសឆ្គងរបស់ខ្លួនឈានទៅបំពេញចិត្តម្ចាស់ឆ្នោត។
យ៉ាងណាក៏ដោយ អ្នកស្រាវជ្រាវផ្នែកអភិវឌ្ឍន៍សង្គម លោក កែម ឡី ព្រមានថា ភាពជោគជ័យនិងបរាជ័យរបស់ក្រុមការងារចុះមូលដ្ឋាននេះ គឺស្ថិតនៅលើផែនការយុទ្ធសាស្ត្រជាតិទាំងមូលតែម្ដង។ លោកបន្តថា បើរៀបចំផែនការសកម្មភាពមិនច្បាស់ ក្រុមការងារទាំងនេះនឹងជាន់ការងារគ្នាជាមួយក្រុមប្រឹក្សាស្រុកខេត្ត ដែលកំពុងតែបំពេញតួនាទីរបស់ខ្លួនតាមច្បាប់ និងគោលនយោបាយសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ លោកបញ្ជាក់ថា ក្រុមការងារចុះមូលដ្ឋានទាំងនេះ នឹងបរាជ័យបើសិនណាហ៊ានយកតួនាទីថ្នាក់ជាតិនេះទំនុកបម្រុងបក្សកាន់អំណាច។
កន្លងទៅមន្ត្រីរដ្ឋាភិបាលរបស់គណបក្សប្រជាជនកម្ពុជា ធ្លាប់បានចាត់ចែងរៀបចំ ចាត់តាំងក្រុមការងារពង្រឹងគណបក្សចុះមូលដ្ឋានក្នុងថ្ងៃសម្រាកបុណ្យទាន ឬសៅរ៍ អាទិត្យ។ ក្រុមការងារចាស់នោះមានតួនាទីសំខាន់ គឺវាយបកគោលនយោបាយបក្សប្រឆាំង និងបំពាក់បំប៉នសកម្មជនបក្ស រួមទាំងប្រមូលផ្តុំសមាជិកថ្មី ប៉ុន្តែក្រុមការងារនេះមិនបានទទួលជោគជ័យទេ តាមរយៈការធ្លាក់សំឡេងឆ្នោតជាង ២០អាសនៈក្នុងរដ្ឋសភានៅអាណត្តទី៥នេះ។
ក្រុមការងារចុះមូលដ្ឋានរបស់រដ្ឋាភិបាល មានសមាសភាពពីគ្រប់ក្រសួងនានា ហើយបែងចែកតាមគោលដៅខេត្តនីមួយៗ។ ប៉ុន្តែក្រុមការងារចុះមូលដ្ឋាន មិនត្រូវអនុញ្ញាតឲ្យចាយលុយជាតិបន្ថែមទេ គឺពួកគេប្រើប្រាស់ថវិការបស់ក្រសួងសាមីនីមួយៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។