ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភា លោក ហេង សំរិន រំពឹងទុកថា លោក ហ៊ុន សែន នឹងដឹកនាំប្រទេសបន្តសម្រេចបានជោគជ័យ និងទាក់ទាញប្រជាប្រិយភាពកាន់តែខ្លាំងថែមទៀត ក្រោយពី លោក ហ៊ុន សែន បានជាប់ឆ្នោតធ្វើជាប្រធានគណបក្សប្រជាជនកម្ពុជា។
យ៉ាងណាក៏ដោយចុះ ប្រជាពលរដ្ឋ សង្គមស៊ីវិល និងអ្នកវិភាគយល់ឃើញផ្សេងពីក្តីរំពឹងរបស់ លោក ហេង សំរិន ទៅវិញ ព្រោះថា លោក ហ៊ុន សែន មិនមែនតែទើបដឹកនាំគណបក្សប្រជាជនកម្ពុជា ទេ លោក ហ៊ុន សែន បានដឹកនាំប្រទេសជាង ២០ឆ្នាំមកហើយ តែភាពរីកចម្រើនរបស់កម្ពុជា មានសន្ទុះយឺត និងបញ្ហាជាច្រើនកើតឡើងនៅក្នុងសង្គម។
មិនខុសពីមន្ត្រីបក្សកាន់អំណាចផ្សេងទៀតដែលតែងជូនពរគ្នា នៅពេលបានឡើងកាន់តំណែងអ្វីមួយ លោក ហេង សំរិន ជាប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា បានផ្ញើលិខិតជូនពរលោកប្រធានបក្សថ្មីដែលជាដៃគូចាស់របស់លោក ក្នុងឱកាសដែល លោក ហ៊ុន សែន ត្រូវបានសន្និបាតគណៈកម្មាធិការកណ្ដាលគណបក្ស បោះឆ្នោតជាកញ្ចប់តែងតាំងជាប្រធានបក្សនោះ។
លោក ហេង សំរិន ថ្លែងនៅក្នុងលិខិតចុះថ្ងៃទី២០ ខែមិថុនា ដែលបានផ្សព្វផ្សាយនៅថ្ងៃទី២២ មិថុនា នេះថា លោកមានជំនឿលើរូប លោក ហ៊ុន សែន នឹងធ្វើឲ្យគណបក្សប្រជាជនកម្ពុជា ឈ្នះឆ្នោតនាពេលខាងមុខ។
ផ្ទុយស្រឡះពីក្តីសង្ឃឹមរបស់ លោក ហេង សំរិន អ្នកសិក្សាស្រាវជ្រាវការអភិវឌ្ឍសង្គម លោក កែម ឡី យល់ថា គណបក្សប្រជាជនកម្ពុជា តែងតែផ្ញើសារបែបនេះដែលជាសារជូនពរខ្ពស់ហួសពីសមត្ថភាពបុគ្គលដែលខ្លួនជូនពរ។ លោក កែម ឡី រិះគន់ចំៗថា ការដែលលោកនាយករដ្ឋមន្ត្រីធ្វើជាប្រធានបក្សផង និងធ្វើជានាយករដ្ឋមន្ត្រីផង ជាភ័ព្វអាក្រក់របស់កម្ពុជា វិញទេ៖ «មិនមានការកោតសរសើរថាល្អទេ នេះជាភ័ព្វអាក្រក់ ព្រោះគាត់ (លោក ហ៊ុន សែន) ដឹកនាំប្រទេសជាង ៣០ឆ្នាំហើយ ស្ថានភាពប្រទេសកម្ពុជា គឺមានរីកចម្រើនតិចតួចផ្នែកហេដ្ឋារចនាសម្ពន្ធ»។
លោក កែម ឡី បន្តថា ការដឹកនាំប្រទេសជាង ២០ឆ្នាំមកនេះ អ្វីដែលប្រទេសជាតិត្រូវការ លោក ហ៊ុន សែន ស្ទើរតែធ្វើមិនបានទាំងអស់ ដូចជា មិនអាចរំដោះប្រជាពលរដ្ឋឲ្យរួចផុតពីភាពក្រីក្រ ធនធានធម្មជាតិនៅតែបំផ្លាញ បញ្ហាការពារបូរណភាពដែនដី និងជម្លោះដីធ្លីនៅតែកើតឡើង ជាដើម។
កាលពីថ្ងៃទី២០ ខែមិថុនា គណៈកម្មាធិការកណ្ដាលគណបក្សប្រជាជនកម្ពុជា ដែលមានចំនួន ៥០៦សំឡេងក្នុងចំណោមសំឡេងសរុប ៥០៧សំឡេង បានបោះឆ្នោតជូន លោក ហ៊ុន សែន ធ្វើជាប្រធានបក្ស និងលោក ស ខេង ព្រមទាំង លោក សាយ ឈុំ ជាអនុប្រធានបក្សដែលគេបោះជាកញ្ចប់តែម្ដងគ្មានគូប្រកួត។
សន្លឹកឆ្នោតដែលបែកធ្លាយតាមបណ្ដាញសង្គម មិនបានដាក់បេក្ខភាពឥស្សរជនគណបក្សនេះផ្សេងទៀតក្រៅពីអ្នកទាំងបីនាក់នេះទេ គ្រាន់តែប្រអប់ដែលត្រូវបំពេញនោះមានពាក្យយល់ព្រម មិនយល់ព្រម និងអនុបវាទ។
ចំណែកអ្នករត់ម៉ូតូឌុបម្នាក់ លោក ហួន សំបូរ និយាយថា ការដឹកនាំរបស់ លោក ហ៊ុន សែន កន្លងមក បានធ្វើឲ្យជីវភាពប្រជាពលរដ្ឋជាច្រើនរកចំណូលបានត្រឹមតែរស់ពីមួយថ្ងៃទៅមួយថ្ងៃ គឺគ្មានសល់អ្វីនោះទេ។ អ្នកខ្លះទៀតជួបបញ្ហាលំបាក ពិសេសពេលឈឺគ្មានលុយព្យាបាលជំងឺ។ បុរសអ្នករត់ម៉ូតូឌុបរូបនេះ ចង់ឃើញការដឹកនាំរបស់ លោក ហ៊ុន សែន មានការរីកចម្រើនជាងនេះ៖ «បានទប់ត្រឹមរស់ វាមិនបានសល់ដូចគេ អ្នកណាដឹកនាំដឹកនាំទៅ ឲ្យតែប្រទេសជាតិមានការរីកចម្រើនជាងនេះ»។
មុនពេលមរណភាព លោក ជា ស៊ីម លោក ហ៊ុន សែន ត្រូវបានគេមើលឃើញថា ជាអនុប្រធានដ៏មានឥទ្ធិពល។ ប៉ុន្តែប្រជាប្រិយភាពគណបក្សនេះ បានបាត់បង់កៅអី ២២កៅអី កាលពីការបោះឆ្នោតឆ្នាំ២១០៣ ក្រោមការដឹកនាំរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។
ប្រធានអង្គការវេទិកាអនាគត លោក អ៊ូ វីរៈ មិនបានបង្ហាញការភ្ញាក់ផ្អើលចំពោះតួនាទីជាប្រធានគណបក្សរបស់ លោក ហ៊ុន សែន ទេ ព្រោះ លោក ហ៊ុន សែន បានធ្វើការនេះជាយូរមកហើយតាំងពី លោក ជា ស៊ីម មានជំងឺធ្ងន់។ លោកបន្តថា លោកទទួលបានប្រជាប្រិយភាពគណបក្សនេះ គឺអាស្រ័យទៅលើកំណែទម្រង់ស៊ីជម្រៅរបស់គណបក្សប្រជាជនកម្ពុជា ទៅវិញទេ ដែលសព្វថ្ងៃកំពុងដឹកនាំប្រទេស៖ «ចាំមើលតិចទៀតមើល! ថាតើគណបក្សប្រជាជន មានកំណែទម្រង់ស៊ីជម្រៅអត់? ព្រោះនៅបច្ចុប្បន្ននេះ គណបក្សប្រជាជន មានការកែទម្រង់តិចតួចនៅឡើយ»។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានសរសេរនៅលើបណ្ដាញសង្គមលោកថា លោក ហ៊ុន សែន ប្រាប់ទៅមន្ត្រីគណបក្សប្រជាជនកម្ពុជា ក្នុងសន្និបាតលើកទី៣៨ នៃគណៈកម្មាធិការកណ្ដាលរបស់គណបក្សប្រជាជនកម្ពុជា ថា កុំដេកស៊ីកេរ ៧មករា ត្រូវតែសកម្ម និងបំពេញតម្រូវការប្រជាពលរដ្ឋ។
ទោះបែបនេះក្តី អ្នកវិភាគសង្គម និងសង្គមស៊ីវិលនិយាយថា ប្រសិនគណបក្សប្រជាជនកម្ពុជា ធ្វើមិនដូចអ្វីដែលនិយាយនោះ ប្រហែលជាម្ចាស់ឆ្នោតមិនសប្បាយចិត្តឲ្យគណបក្សនេះដឹកនាំប្រទេសទៀតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។