អង្គការឃ្លាំមើលសិទ្ធិមនុស្ស យូមិន រ៉ៃថ៍ វ៉ច្ឆ (Human Rights Watch) បានជំរុញឲ្យរាជរដ្ឋាភិបាលកម្ពុជា បើកការស៊ើបអង្កេតបន្ទាន់មួយលើរឿងក្រុមសមត្ថកិច្ចបាញ់ប្រហារលើក្រុមប្រជាពលរដ្ឋអ្នកធ្វើដំណើរឆ្លងកាត់ស្ពានអាកាស បណ្ដាលឲ្យស្លាប់បុរសម្នាក់ និងរបួសជាង ២០នាក់ផ្សេងទៀត។ ក្រៅពីនេះ យូមិន រ៉ៃថ៍ វ៉ច្ឆ បានសុំឲ្យរដ្ឋាភិបាលខ្មែរឲ្យចេះបញ្ជាដឹកនាំកងកម្លាំងសមត្ថកិច្ចឲ្យចេះគោរពវិជ្ជាជីវៈស្របតាមស្តង់ដារអន្តរជាតិ កុំចេះតែបាញ់ប្រហារលើអ្នកតវ៉ាតាមអំពើចិត្ត។
សេចក្ដីប្រកាសព័ត៌មានរបស់ យូមិន រ៉ៃថ៍ វ៉ច្ឆ ពីទីក្រុងញីវយ៉ក សហរដ្ឋអាមេរិក ចុះថ្ងៃទី១៧ កញ្ញា បានជំរុញឲ្យរដ្ឋាភិបាលកម្ពុជា ស៊ើបអង្កេតជាបន្ទាន់ និងដោយឥតលំអៀងចំពោះករណីបាញ់សម្លាប់ប្រជាពលរដ្ឋឈ្មោះ ម៉ៅ សុខចន្ទ និងករណីបាញ់ឲ្យរបួសប្រជាពលរដ្ឋប្រមាណ ២៤នាក់ទៀត ពីសំណាក់កងកម្លាំងប្រដាប់អាវុធរបស់រាជរដ្ឋាភិបាលកម្ពុជា កាលពីយប់ថ្ងៃទី១៥ កញ្ញា ក្នុងអំពើហិង្សារវាងអ្នកតវ៉ាដែល យូមិន រ៉ៃថ៍ វ៉ច្ឆ ថា ជាក្រុមបាតុករបក្សប្រឆាំងជាមួយកម្លាំងសមត្ថកិច្ច នៅស្ពានអាកាសក្បាលថ្នល់ រាជធានីភ្នំពេញ។
សេចក្ដីប្រកាសព័ត៌មាននោះបានស្រង់សំដី លោក ប្រ៊ែដ អាដាម (Brad Adams) នាយក យូមិន រ៉ៃថ៍ វ៉ច្ឆ ប្រចាំតំបន់អាស៊ីថា៖ "រដ្ឋាភិបាលបានខំប្រឹងគ្រប់គ្រងកំណត់ព្រំដែនក្រុមបាតុករបក្សប្រឆាំងដោយដាក់រនាំងលួសបន្លាបិទផ្លូវទាំងនៅក្នុងនិងក្រៅភ្នំពេញ"។
លោក ប្រែដ អាដាម បន្តថា៖ "ថ្ងៃតវ៉ាដោយសន្តិភាពបានក្លាយជារឿងអាក្រក់នៅពេលដែលកម្លាំងសន្តិសុខកម្ពុជា ប្រើហិង្សាលើអ្នកតវ៉ា"។
សេចក្ដីប្រកាសព័ត៌មានរបស់ យូមិន រ៉ៃថ៍ វ៉ច្ឆ បានរៀបរាប់ពិស្ដារអំពីសកម្មភាពតវ៉ា និងហិង្សាប្រដាប់អាវុធរបស់កងកម្លាំងសមត្ថកិច្ចដែលប្រើកាំភ្លើងបាញ់គ្រាប់ពិត និងប្រើគ្រាប់បែកផ្សេងពុលមកលើក្រុមអ្នកតវ៉ាដែលគ្មានអាវុធនោះ ថាជាទង្វើហិង្សាប្រដាប់អាវុធ ហើយប្រការនេះជាការប្រព្រឹត្តខុសច្បាប់អន្តរជាតិ។
សេចក្ដីប្រកាសព័ត៌មាននោះបានស្រង់សម្ដីលោក ប្រែដ អាដាម បន្តថា៖ "ការបាញ់គ្រាប់កាំភ្លើងពិតទៅលើមនុស្សគ្មានអាវុធនៅទីងងឹតជាការគំរាមជីវិតមនុស្ស ហើយនេះគឺជានិយមន័យនៃហិង្សារបស់សមត្ថកិច្ចប្រើដោយអាវុធ"។
យូមិន រ៉ៃថ៍ វ៉ច្ឆ បានអំពាវនាវឲ្យរាជរដ្ឋាភិបាលកម្ពុជា ឈប់ប្រើហិង្សាដោយប្រើអាវុធជាសាធារណៈ ហើយបានណែនាំឲ្យកងកម្លាំងសមត្ថកិច្ចគោរពច្បាប់របស់អង្គការសហប្រជាជាតិខាងប្រើប្រាស់អាវុធ។
វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាលបានទេ នៅថ្ងៃទី១៧ កញ្ញា ដើម្បីសុំការឆ្លើយតបទៅនឹង យូមិន រ៉ៃថ៍ វ៉ច្ឆ នេះ។ ក៏ប៉ុន្តែលោក កឹម សុខា អនុប្រធានគណបក្សសង្គ្រោះជាតិ បានប្រាប់វិទ្យុអាស៊ីសេរី នៅយប់ថ្ងៃទី១៥ កញ្ញា ថា រដ្ឋាភិបាលបានចាប់ផ្ដើមស៊ើបអង្កេតរឿងនេះហើយ បន្ទាប់ពីបក្សសង្គ្រោះជាតិ បានសុំឲ្យក្រសួងមហាផ្ទៃ ស៊ើបអង្កេតរឿងនេះក្នុងជំនួបមេដឹកនាំកំពូលរវាងមេបក្សសង្គ្រោះជាតិ និងបក្សប្រជាជនកម្ពុជា កាលពីថ្ងៃទី១៦ កញ្ញា។
អង្គការជាតិត្រៀមដាក់លិខិតសុំឲ្យដោះលែងមនុស្ស៦នាក់ដែលសមត្ថកិច្ចចាប់
ទាក់ទងនឹងករណីបាញ់សម្លាប់ពលរដ្ឋនៅស្ពានអាកាសក្បាលថ្នល់នេះដែរ អង្គការឃ្លាំមើលបញ្ហាសិទ្ធិមនុស្សជាតិ បានត្រៀមដាក់លិខិតទៅរដ្ឋាភិបាលនិងស្ថាប័នពាក់ព័ន្ធ ឲ្យដោះលែងមនុស្ស ៦នាក់ ដែលកំពុងឃុំខ្លួនក្នុងពន្ធនាគារដោយគ្មានលក្ខខណ្ឌ។ ការដាក់លិខិតនោះបានកើតមានបន្ទាប់ពីពួកគេត្រូវចាប់ និងឃុំខ្លួនក្នុងព្រឹត្តិការណ៍ប៉ះទង្គិចហិង្សាជាមួយសមត្ថកិច្ច កាលពីយប់ថ្ងៃទី១៥ ខែកញ្ញា។
សូមស្ដាប់សេចក្ដីរាយការណ៍របស់អ្នកនាង ទេព សុរ៉ាវី៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។