នៅថ្ងៃទី១១ ខែវិច្ឆិកា តុលាការយុត្តិធម៌អន្តរជាតិ នឹងចេញសេចក្ដីសម្រេចតបតាមសំណើរបស់កម្ពុជា ដែលស្នើសុំឲ្យតុលាការកំពូលពិភពលោកនេះ បកស្រាយទៅលើសាលក្រមឆ្នាំ១៩៦២ ពាក់ព័ន្ធជម្លោះតំបន់ប្រាសាទព្រះវិហារ។ ស្របពេលគ្នានេះដែរ ប្រមុខរដ្ឋាភិបាលក៏បានស្នើសុំឲ្យគ្រប់ភាគីពាក់ព័ន្ធ ជាពិសេសកម្ពុជា-ថៃ បន្តបញ្ចៀសការប្រើប្រាស់អាវុធ ដើម្បីដោះស្រាយបញ្ហា។
ការអំពាវនាវដូចនេះរបស់លោកនាយករដ្ឋមន្ត្រី ហ៊ុន សែន ធ្វើឡើងតាមកញ្ចក់ទូរទស្សន៍ជាតិ ទទក នៅថ្ងៃទី៩ ខែវិច្ឆិកា។ លោក ហ៊ុន សែន មានប្រសាសន៍ថា ការប្រើប្រាស់កម្លាំងយោធាណាមួយប្រឆាំងលទ្ធផលដែលនឹងចេញជាផ្លូវការ នៅថ្ងៃទី១១ ដើមសប្ដាហ៍ខាងមុខនេះ ពុំមែនជាជម្រើសល្អឡើយ។
យ៉ាងណាក៏ដោយ លោក ហ៊ុន សែន ហៅការស្នើសុំរបស់កម្ពុជា ឲ្យតុលាការយុត្តិធម៌ទីក្រុងឡាអេ បកស្រាយឡើងវិញចំពោះសាលក្រមឆ្នាំ១៩៦២ ពាក់ព័ន្ធជម្លោះតំបន់ប្រាសាទព្រះវិហារ ដើម្បីកុំឲ្យមានភាពស្រពិចស្រពិល ដែលភាគីថៃ ប្រទាញប្រទង់ដីក្បែរប្រាសាទព្រះវិហារនោះ គឺពុំមានជាចេតនាបង្កជម្លោះឡើយ៖ «បើទោះបីសាលដីការបស់តុលាការយុត្តិធម៌អន្តរជាតិ នៅថ្ងៃទី១១ ខែវិច្ឆិកា ឆ្នាំ២០១៣ ខាងមុខនេះ ចេញមកបែបណាក៏ដោយ ក៏ប្រទេសទាំងពីរគោរពតាមសេចក្ដីសម្រេច ហើយខិតខំរក្សាឲ្យខានតែបាននូវសន្តិភាព និងស្ថិរភាពនៅតាមព្រំដែន»។
ផ្ដើមចេញពីបញ្ហានេះហើយ ទើបកម្ពុជា បានសម្រេចដាក់ពាក្យទៅតុលាការយុត្តិធម៌អន្តរជាតិម្ដងទៀត កាលពីថ្ងៃទី២៨ ខែមេសា ឆ្នាំ២០១២។
លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ចាត់ទុកថា ឥរិយាបថរបស់លោកនាយករដ្ឋមន្ត្រី ហ៊ុន សែន ម្ដងជាពីរដង សុំឲ្យមានការអត់ធ្មត់នេះ ព្រោះតែលោកដឹងខ្លួនរួចជាស្រេចហើយថា មកពីនយោបាយការបរទេសរបស់កម្ពុជា មិនស្មើនឹងប្រទេសថៃ។ លោក រ៉ុង ឈុន គិតថា កម្ពុជា មិនចាំបាច់អ្វីដែលត្រូវអត់ធ្មត់នឹងសកម្មភាពរបស់ភាគីថៃ ចង់បានដីខ្មែរដូចនេះឡើយ៖ «កម្ពុជា យើងមានភាពរឹងមាំណាស់ បើធៀបទៅនឹងជាមួយភាគីសៀម ហើយយោងទៅភូមិសាស្ត្រនៅក្នុងតំបន់ព្រះវិហារ ផ្ទៃដី ៤,៦ វាប្រាកដជារបស់កម្ពុជា យើងហើយ។ វាមិនមែនជារបស់សៀម នោះទេ។ ប៉ុន្តែដោយឡែក បែរជានាយករដ្ឋមន្ត្រីហាក់បីដូចមានការភ័យខ្លាចជុំវិញបញ្ហារឿងទាំងអស់នេះ»។
ការអំពាវនាវរបស់លោកនាយករដ្ឋមន្ត្រីនេះ ធ្វើឡើងស្របពេលដែលកងយោធា និងក្រុមជ្រុលនិយមថៃ បានបញ្ចេញព័ត៌មានចោទប្រកាន់កម្ពុជា ជាបន្តបន្ទាប់។
កាសែតបាងកកប៉ុស្តិ៍របស់ថៃ បានចុះផ្សាយនៅលើគេហទំព័ររបស់ខ្លួនកាលពីថ្ងៃទី៨ វិច្ឆិកា ថា ប្រទេសកម្ពុជា បានបញ្ជូនកងទ័ពបន្ថែមទៀតទៅកាន់តំបន់ព្រំដែនប្រាសាទព្រះវិហារ តាំងពីថ្ងៃសៅរ៍ សប្ដាហ៍មុន។ ថៃ បានហៅសកម្មភាពនេះថា ជាការរំលោភលើកិច្ចព្រមព្រៀង ដែលប្រទេសទាំងពីរបានសម្រេចកន្លងមក។ ប៉ុន្តែ មន្ត្រីរដ្ឋាភិបាលកម្ពុជា បានច្រានចោលចំពោះការចោទប្រកាន់នេះ និងបានអះអាងថា កម្ពុជា ពុំបានបញ្ជូនកងទ័ពបន្ថែម ឬចល័តទ័ពនៅតំបន់នោះឡើយ។
គិតមកដល់ពេលនេះ ជម្លោះជាមួយថៃ បានអូសបន្លាយជាង ៥០ឆ្នាំកន្លងទៅហើយ។ វិវាទនេះ នៅតែមិនអាចទម្លាយភាពជាប់គាំងបាន ជាពិសេសដីនៅតំបន់ក្បែរប្រាសាទព្រះវិហារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។