អនុប្រធានគណបក្សប្រជាជនកម្ពុជា និងជានាយករដ្ឋមន្ត្រី មានជំនឿថា ប្រជាពលរដ្ឋជាម្ចាស់ឆ្នោតនឹងនៅតែបន្តបោះឆ្នោតគាំទ្រគណបក្សរបស់ខ្លួន ដើម្បីបន្តដឹកនាំការអភិវឌ្ឍប្រទេសឲ្យរីកចម្រើននៅអាណត្តិទី៥ បន្តទៀត។ ប៉ុន្តែ ការអះអាងនេះត្រូវមេដឹកនាំគណបក្សប្រឆាំងចាត់ទុកថា បក្សប្រជាជនកំពុងបារម្ភចាញ់ឆ្នោតទៅវិញទេ ព្រោះសង្កេតឃើញគណបក្សប្រជាធិបតេយ្យរួបរួមគ្នា និងមានម្ចាស់ឆ្នោតគាំទ្រច្រើន។
លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា នៅក្នុងជំនួបជាមួយកម្មករ និងបុគ្គលិកកំពង់ផែស្វយ័តក្រុងព្រះសីហនុ នាថ្ងៃទិវាពលកម្មអន្តរជាតិ ទី១ ខែឧសភា ឆ្នាំ២០១៣ លោកមានប្រសាសន៍ថា នៅគ្រាពេលវេលាបោះឆ្នោតសភាអាណត្តិទី៥ ជិតចូលមកដល់ ក្រុមបក្សប្រឆាំងតែងលើកឡើងពីជ័យជម្នះក្នុងការបោះឆ្នោត។ ប៉ុន្តែលោកមិនជឿថាគណបក្សប្រជាជនកម្ពុជា ដែលមានកៅអី ឬអាសនៈលើសពី ២ ភាគ ៣ នៅរដ្ឋសភា នឹងធ្លាក់អាសនៈមកក្រោម ៥០% នោះទេ។
លោកនាយករដ្ឋមន្ត្រីបញ្ជាក់ថា ម្ចាស់ឆ្នោតនឹងនៅតែបន្តគាំទ្រ ហើយបោះឆ្នោតឲ្យគណបក្សប្រជាជនកម្ពុជា នៅថ្ងៃបោះឆ្នោតនាថ្ងៃទី២៨ ខែកក្កដា ខាងមុខ៖ «ការបោះឆ្នោតមិនដល់ ៣ខែទៀតទេ នឹងមកដល់នោះ មានការរីកចម្រើនប៉ុណ្ណាប្រៀបធៀបប៉ុណ្ណឹង។ បើមិនចង់ប្រៀបធៀបកាលពីឆ្នាំ១៩៧៩ បើប្រៀបធៀបពីឆ្នាំ១៩៧៩ មក អាហ្នឹងវាដាច់ស្រឡះតែម្តង។ ហើយខ្ញុំនៅតែមិនជឿថាគណបក្សប្រជាជនកម្ពុជា អាចទៅជាគណបក្សចាញ់ឆ្នោតមួយ គេហៅថា ចូលទៅដល់ផ្កាប់ឆ្នាំង អាស្ថានភាពផ្កាប់ឆ្នាំងនោះទេ ព្រោះកំណើនពី ៥១អាសនៈ ទៅ ៦៤ ពី ៦៤ ទៅ ៧៣ និងពី ៧៣ ទៅ ៩០អាសនៈនៅរដ្ឋសភា។ អ៊ីចឹង វាបែរជាត្រូវធ្លាក់មកត្រឹម ៤០កៅអី ឬអាសនៈអី វាអត់ត្រូវ ជាមិនទំនងទាល់តែសោះហើយ មិនជឿ»។
ទោះជាបែបនេះក្តី មេដឹកនាំគណបក្សប្រឆាំងបានថ្លែងថា បក្សប្រជាជនកម្ពុជា កំពុងព្រួយបារម្ភចាញ់ឆ្នោតអាណត្តិទី៥ នាខែកក្កដា ទៅវិញទេ ព្រោះសូម្បីថ្ងៃទិវាពលកម្មអន្តរជាតិ ក៏លោកនាយករដ្ឋមន្ត្រី ហ៊ុន សែន ឆ្លៀតឃោសនារកសំឡេងឆ្នោតដែរ។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍នៅថ្ងៃទី១ ខែឧសភា ដោយចាត់ទុកសម្ដីរបស់លោកនាយករដ្ឋមន្ត្រី ហ៊ុន សែន ដែលអះអាងពីការឈ្នះឆ្នោតអាណត្តិទី៥ ថាកំពុងតក់ស្លុតនឹងបរាជ័យរបស់ខ្លួនទៅវិញទេ។
លោកបន្តថា ចំណុចដែលគណបក្សប្រជាជនព្រួយបារម្ភចាញ់ឆ្នោត គឺដោយសារតែបក្សប្រជាជនកាន់អំណាចជាង ៣០ឆ្នាំមកនេះ មិនមានគោលនយោបាយជួយដំឡើងប្រាក់បៀវត្សមន្ត្រីរាជការ ឬកម្មករឲ្យបានសមរម្យទេ ជាពិសេសមិនបានជួយទំនុកបម្រុងគ្រួសារក្រីក្រពេលមានជំងឺ ឲ្យទទួលបានព្យាបាលមិនគិតថ្លៃនោះឡើយ៖ «ទី១ ពាក់ព័ន្ធនឹងអធិបតីភាពបូរណភាពទឹកដី ដែលគណបក្សប្រជាជនកម្ពុជា មិនអាចធានាបាន ដូចជាការហូរចូលជនអន្តោប្រវេសន៍ខុសច្បាប់ ការផ្តល់ដីសម្បទានទៅឲ្យបរទេស។ ហើយទី២ ពាក់ព័ន្ធនឹងការកសាងសង្គមប្រជាធិបតេយ្យ។ យើងដឹងហើយថា រដ្ឋធម្មនុញ្ញយើងថាត្រូវកសាងសង្គមប្រជាធិបតេយ្យ មានតុល្យភាពអំណាច មានការគោរពសិទ្ធិមនុស្ស ប៉ុន្តែគណបក្សប្រជាជនកម្ពុជា ដឹកនាំប្រទេស គឺទទួលរងការរិះគន់ពីមជ្ឈដ្ឋានជាតិអន្តរជាតិខ្លាំងណាស់ ពីការរំលោភសិទ្ធិមនុស្ស កាន់អំណាចផ្តាច់ការ ការដែលមិនអនុវត្តច្បាប់ឲ្យបានត្រឹមត្រូវ ដូចជានិទ្ទណ្ឌភាពជាដើម។ នេះជាបរាជ័យរបស់គណបក្សប្រជាជនកម្ពុជា ទី២។ ហើយដែលគណបក្សសង្គ្រោះជាតិលើកយកមកធ្វើជាគោលការណ៍ដើម្បីកែទម្រង់»។
ទោះជាបែបណា សម្រាប់អ្នកវិភាគបញ្ហាសង្គម បានផ្តល់វិភាគថា គណបក្សប្រជាជនកម្ពុជា នឹងបន្តឈ្នះការបោះឆ្នោតសភាអាណត្តិទី៥ ខែកក្កដា បន្តទៀត ប៉ុន្តែទំនងជាមិនបានកើនអាសនៈនៅរដ្ឋសភាដូចអាណត្តិមុនៗទៀតទេ។ ចំណែកគណបក្សប្រឆាំង គឺគណបក្សសង្គ្រោះជាតិ ក្រោយច្របាច់បញ្ចូលគ្នារវាងគណបក្ស សម រង្ស៊ី និងបក្ស សិទ្ធិមនុស្ស អាចនឹងកើនចំនួនអាសនៈនៅរដ្ឋសភា តែមិនឈ្នះការបោះឆ្នោតអាណត្តិទី៥ នេះទេ។
កាលបរិច្ឆេទនៃការបោះឆ្នោតជ្រើសរើសតំណាងរាស្ត្រអាណត្តិទី៥ នឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។