ប្រមុខរាជរដ្ឋាភិបាលកម្ពុជា បានចាត់ទុកលំដាប់លេខរៀងទី៤ របស់គណបក្សប្រជាជនកម្ពុជា លើសន្លឹកឆ្នោតថា ជាសញ្ញាឈ្នះការបោះឆ្នោតអាណត្តិទី៥ បន្តទៀត។ ប៉ុន្តែ សម្រាប់គណបក្សប្រឆាំងដែលមានលេខរៀងទី៧ លើសន្លឹកឆ្នោតវិញ និយាយថា លេខរៀងទី៧ ទៅវិញទេដែលមានអត្ថន័យល្អ និងជាសញ្ញាឈ្នះការបោះឆ្នោតខែកក្កដា ខាងមុខ។
សម្រាប់អ្នកវិភាគស្ថានការណ៍នយោបាយឯករាជ្យវិញ ថ្លែងថា វាមិនសំខាន់ទៅលើអត្ថន័យលេខរៀងទេ ប៉ុន្តែបើលេខរៀងល្អនាំឲ្យម្ចាស់ឆ្នោតងាយចំណាំ។
លោកនាយករដ្ឋមន្ត្រី ហ៊ុន សែន បានថ្លែងការពារលេខ៤ របស់គណបក្សប្រជាជនកម្ពុជា នៅក្នុងសន្លឹកឆ្នោតសម្រាប់ការបោះឆ្នោតខែកក្កដា ថាជាលេខល្អ បើទោះបីជាមានការបង្អាប់ថា លេខ៤ តាមក្បួនចិន វៀតណាម ថាជាលេខអាក្រក់ក្តី។
ក្នុងពិធីសម្ពោធអគារសិក្សា និងសមិទ្ធផលនានានៅវត្តព្រះមហោសថ សុវណ្ណគិរី បឹងដែង ស្រុកស្ទឹងត្រង់ ខេត្តកំពង់ចាម ព្រឹកថ្ងៃសុក្រ ទី២៤ ខែឧសភា លោក ហ៊ុន សែន មានប្រសាសន៍ថា លេខរៀងទី៤ នៅលើសន្លឹកឆ្នោតរបស់គណបក្សប្រជាជនកម្ពុជា នឹងនាំឲ្យបក្សនេះឈ្នះឆ្នោតទៀត ដូចគ្នាការបោះឆ្នោតអាណត្តិទី៤ ដែលគណបក្សប្រជាជនកម្ពុជា ទទួលបានជ័យជម្នះដល់ ៩០កៅអី លើសពី ២ ភាគ ៣ ក្នុងចំណោមកៅអី ១២៣នៃរដ្ឋសភា។
លោក ហ៊ុន សែន បាននិយាយចំអកថា មិនប្រាកដថាលេខរៀងទី១ លើសន្លឹកឆ្នោតជាលេខល្អ និងឈ្នះឆ្នោតនោះទេ។ ជួនកាល បក្សខ្លះនៅលេខរៀងទី១ រកសន្លឹកឆ្នោតមិនបាន ១កៅអីផងទេ។ លោក ហ៊ុន សែន បញ្ជាក់ថា លេខ៤ តំណាងឲ្យវិស័យពុទ្ធចក្រ ដែលមាន ៥ចំណុច មានដូចជា៖ «ទី១ ពុទ្ធពរទាំង ៤ប្រការ គឺអាយុ វណ្ណៈ សុខៈ និងពលៈ។ ទី២ ទិសទាំង៤ ដែលតំណាងឲ្យទិសខាងកើត ខាងលិច ខាងជើង និងទិសខាងត្បូង គ្របដណ្ដប់ផែនដីទាំងអស់ហើយ។ ទី៣ ជាធាតុទាំង៤ ដែលមានធាតុទឹក ដី ភ្លើង និងធាតុខ្យល់ តំណាងទាំងអស់ហើយ មិនថាមនុស្ស សត្វ មិនថារាស្ត្រ មិនថាក្សត្រក៏ដកដង្ហើម ក៏ដើរលើដី ក៏ត្រូវការទឹក ភ្លើង និងខ្យល់។ ទី៤ តំណាងឲ្យព្រហ្មវិហារធម៌ទាំង៤ រួមមាន ករុណា មេត្តា មុទិតា និងឧបេក្ខា និងទី៥ គឺព្រះព្រហ្ម តំណាងឲ្យព្រះព្រហ្ម ដែលមានមុខ៤។ អ៊ីចឹងទេ ជារៀងរាល់ឆ្នាំ គេមកប្ដូរទេវតា ទេវតាថ្មីមកដល់ ព្រះព្រហ្ម គឺនៅចាំនៅហ្នឹង។ ផ្លាស់តែកូនទេ ហ្នឹងខ្ញុំករុណាខ្ញុំលើកដោយយ័រៗខាងផ្នែកពុទ្ធចក្រទៅចុះ»។
បន្ថែមលើនេះ លោក ហ៊ុន សែន បានដឺដងមិនចេញឈ្មោះ តែទំនងជាដៀមដាមឲ្យគណបក្សប្រឆាំងដែលបក្សនេះត្រៀមបកស្រាយចំពោះអត្ថន័យលេខរៀងទី៤ លើសន្លឹកឆ្នោតរបស់គណបក្សប្រជាជនកម្ពុជា។ យ៉ាងណាក៏ដោយ ប្រមុខដឹកនាំបញ្ជាក់ថា លេខរៀងទី៤ លើសន្លឹកឆ្នោតនាំឲ្យពលរដ្ឋងាយចំណាំ ព្រោះមានរូបសញ្ញាទេវតាបាចផ្កា។
យ៉ាងនេះក្តី សម្រាប់គណបក្សសង្គ្រោះជាតិ ដែលរួមបញ្ចូលគ្នារវាងគណបក្ស សម រង្ស៊ី និងបក្ស សិទ្ធិមនុស្ស មានមោទនភាពថា លេខរៀងទី៧ របស់បក្សខ្លួនទៅវិញទេដែលមានហុងស៊ុយល្អ និងជាសញ្ញាឈ្នះឆ្នោត។
លោក កឹម សុខា ប្រធានស្តីទីគណបក្សសង្គ្រោះជាតិ មានប្រសាសន៍ថា លំដាប់លេខរៀងទី៧ នៅលើសន្លឹកឆ្នោត បង្ហាញពីភាពអស្ចារ្យមួយចំនួន ដោយសារតែសមាជគណបក្សនេះធ្វើឡើងចំថ្ងៃទី៧ ហើយស្លាកសញ្ញារបស់គណបក្សសង្គ្រោះជាតិ គឺព្រះអាទិត្យបំភ្លឺពិភពលោក និងកម្ពុជា ផងនោះ មាន ៧ថ្ងៃ។ ជាពិសេស គោលនយោបាយអាទិភាព ៧ចំណុចរបស់គណបក្ស រួមមាន មនុស្សចាស់ ពីអាយុ ៦៥ឆ្នាំទទួលបានប្រាក់ ៤ម៉ឺនរៀលក្នុងមួយខែ។ កម្មករទទួលបានប្រាក់ខែទាបបំផុត ៦០ម៉ឺនរៀល។ មន្ត្រីរាជការបាន ១លានរៀល។ កសិករទទួលបានការធានាតម្លៃកសិផល ឬតម្លៃស្រូវទាបបំផុត ១ពាន់រៀល ក្នុង ១គីឡូក្រាម។ ពលរដ្ឋក្រីក្រទទួលសេវាព្យាបាលជំងឺមិនគិតប្រាក់។ យុវជនមានឱកាសដូចគ្នាក្នុងការអប់រំ និងការងារ និងបញ្ចុះតម្លៃប្រេង ជីកសិកម្ម អគ្គិសនី និងបញ្ចុះអត្រាការប្រាក់ជាដើម។
លោក កឹម សុខា បញ្ជាក់បន្ថែមពីអត្ថន័យលេខរៀងទី៧ លើសន្លឹកឆ្នោតរបស់គណបក្សសង្គ្រោះជាតិ៖ «គណបក្សសង្គ្រោះជាតិ ចាប់បានលេខរៀងទី៧ នេះ ជាប្រផ្នូលមួយល្អណាស់សម្រាប់ខ្មែរយើង។ វាមានន័យថា ព្រលឹងនៃព្រះមហាក្សត្រ និងមេដឹកនាំខ្មែរ ឬព្រះបាទជ័យវរ្ម័នទី៧ បានមកសណ្ឋិតនៅលើប្រជាពលរដ្ឋខ្មែរ គឺមិនឲ្យទឹកដីខ្មែរបាត់ជាដាច់ខាត។ មានន័យថា គណបក្សសង្គ្រោះជាតិ ដែលមានលេខរៀងទី៧ ឈ្នះ គឺព្រលឹងរបស់ព្រះបាទជ័យវរ្ម័នទី៧ ហ្នឹង ចូលមកសណ្ឋិត ដើម្បីឲ្យប្រទេសជាតិយើងគង់វង្ស កុំឲ្យបរទេសឈ្លានពានបាន ឲ្យប្រជាពលរដ្ឋយើងរស់នៅប្រកបដោយសុខដុមរមនារីកចម្រើនទៅមុខបាន។ នេះហើយជាជោគជ័យនៃលទ្ធផលនៃការចាប់ឆ្នោតដែលគណបក្សសង្គ្រោះជាតិ បានលេខរៀងទី៧»។
ទាក់ទិនបញ្ហានេះ សម្ដេចសង្ឃព្រះអភិសិរីសុគន្ធា មហាសង្ឃរាជរាជាធិបតី បួ គ្រី សម្ដេចព្រះមហាសង្ឃរាជនៃគណៈធម្មយុត្តិកនិកាយ មានថេរដីកាថា លំដាប់លេខរៀងគណបក្សលើសន្លឹកឆ្នោតនេះ បើចាប់បានលេខរៀងល្អ នាំឲ្យម្ចាស់ឆ្នោតងាយចំណាំ និងបោះឆ្នោតជូន ប៉ុន្តែមិនមែនលេខល្អសុទ្ធតែទទួលជ័យជម្នះទេ៖ «ហ្នឹងវាបូកផ្សំជាមួយគ្នាទាំងអស់។ ជំនឿខ្មែរយើងៗចេះតែមានហើយ គឺផ្សំទាំងជំនឿ និងគោលនយោបាយរបស់គណបក្ស»។
ចំណែកលោក កែម ឡី អ្នកស្រាវជ្រាវការអភិវឌ្ឍសង្គម បានផ្តល់វិភាគថា ការដែលគណបក្សប្រជាជនកម្ពុជា ចាប់បានលេខរៀងទី៤ លើសន្លឹកឆ្នោត បានផ្តល់ផលចំណេញច្រើនសម្រាប់គណបក្សនេះ ព្រោះថាអាណត្តិបោះឆ្នោតលើកមុន ក្រុមការងារគណបក្សប្រជាជន បានដើរពន្យល់ពីវិធីគូសសន្លឹកឆ្នោតដល់ម្ចាស់ឆ្នោត ពិសេសចាស់ៗ អ្នកអត់ចេះអក្សរ ឲ្យគូសលើលេខរៀងទី៤ បានចងចាំ ដូច្នេះបើបានលេខដដែល គេមិនពិបាកដើរពន្យល់ច្រើនទៀតទេ។ ប៉ុន្តែលោកថា សម្រាប់គណបក្សសង្គ្រោះជាតិ មានលេខរៀងទី៧ លើសន្លឹកឆ្នោត បើបកស្រាយអត្ថន័យ គឺមានខ្លឹមសារល្អ ប៉ុន្តែមិនបង្កភាពងាយស្រួលដល់ម្ចាស់ឆ្នោតទេ។
លោក កែម ឡី៖ «ដល់ពេលគាត់ទៅបង្រៀនឲ្យប្រជាពលរដ្ឋចេះគូសសន្លឹកឆ្នោតម្តងទៀតនោះ ខ្ញុំគិតថា បានទទួលផលចំណេញច្រើន នៅពេលដែលគណបក្សប្រជាជនកម្ពុជា ចាប់បានលេខដដែលអ៊ីចឹងទៅ។ ក៏ប៉ុន្តែ គណបក្សសង្គ្រោះជាតិ ដែលចាប់បានលេខ៧ តាមទ្រឹស្ដីវាល្អហើយ ក៏ប៉ុន្តែពិបាកឲ្យប្រជាពលរដ្ឋចំណាំ គឺលេខហ្នឹងលេខនៅក្រោយ។ តែបើសិនជាអ្នកមានចំណេះដឹង អ្នកមានការអប់រំខ្ពស់ អ្នកដែលមានព័ត៌មានគ្រប់គ្រាន់ វាមិនអីទេ នៅពេលដែលគាត់ស្រឡាញ់នរណា គាត់រកទាល់តែឃើញ»។
ការបោះឆ្នោតនេះ លោក ហ៊ុន សែន ក៏បានអំពាវនាវដល់ថ្នាក់ដឹកនាំគណបក្សនយោបាយ ពិសេសសមាជិករបស់ខ្លួន ឲ្យរក្សាភាពស្ងប់ស្ងាត់ ដោយមិនត្រូវប្រើអំពើហិង្សាពេលបោះឆ្នោតទេ គឺអាចត្រឹមតែរិះគន់ទិតៀនតាមពាក្យសម្ដី។ ការអំពាវនាវនេះ ទទួលបានការសាទរពីមន្ត្រីសង្គមស៊ីវិល និងមន្ត្រីគណបក្សប្រឆាំង។ ប៉ុន្តែបានរិះគន់លោក ហ៊ុន សែន ថា អាណត្តិបោះឆ្នោតកន្លងមក មានតែសមាជិក ឬក្រុមយុវជនរបស់បក្សប្រជាជន ទេ ដែលដើរធ្វើសកម្មភាពអុកឡុកយុទ្ធនាការឃោសនាបោះឆ្នោតទៅលើក្បួនឃោសនារបស់គណបក្សប្រឆាំង។
ការបរិច្ឆេទនៃការបោះឆ្នោតសភាអាណត្តិទី៥ ចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ ការបោះឆ្នោតនេះមានគណបក្សនយោបាយចំនួន៨ បានចុះឈ្មោះចូលរួមប្រកួតប្រជែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។