ប៉ុន្តែ មន្ត្រីសង្គមស៊ីវិលដែលធ្វើការងារច្រើនជាមួយក្រុមយុវជន សង្កេតឃើញថា បច្ចុប្បន្ននេះ យុវជនភាគច្រើនមានការពិចារណាយ៉ាងរឹងមាំទៅសារនយោបាយដែលពាក់ព័ន្ធនឹងអនាគតប្រទេសជាតិរបស់គេ មុននឹងសម្រេចចិត្តធ្វើអ្វីមួយនោះ។
លោកនាយករដ្ឋមន្ត្រី ហ៊ុន សែន ថ្លែងនៅថ្ងៃសុក្រ ទី៣១ ឧសភា ថា ភាពក្មេងខ្ចី សន្ទុះចិត្តក្លាហាន តែតក់ក្រហល់របស់ក្រុមយុវជន នឹងអាចនាំមកនូវគ្រោះថ្នាក់ដ៏ធំធេងដល់សង្គមជាតិទាំងមូល និងមានរយៈពេលវែង។ លោកថ្លែងពន្យល់ជុំវិញបញ្ហានេះថា គឺដោយសារការសម្រេចចិត្តរបស់យុវជនដោយខ្វះការពិចារណាគ្រប់ជ្រុងជ្រោយ និងការឆាប់ជឿទៅលើមនោគមន៍វិជ្ជា និងការឃោសនាដោយគ្មានការទទួលខុសត្រូវ ក្នុងគោលដៅកេងចំណេញខាងនយោបាយ៖ «ការលង់អារម្មណ៍ ដោយមិនបានពិចារណាគ្រប់ជ្រុងជ្រោយទៅលើវោហារសាស្ត្រ និងទិសស្លោកនយោបាយដែលគ្មានការទទួលខុសត្រូវ ហើយភាគច្រើន ត្រូវបាននាំចូលពីមជ្ឈដ្ឋានខាងក្រៅមកនោះ នឹងអាចនាំមកនូវគ្រោះថ្នាក់ដ៏ធំធេងដល់សង្គមជាតិទាំងមូល សម្រាប់រយៈពេលវែង»។
លោកបន្តថា បើយុវជនបន្តវេនបច្ចុប្បន្នមិនប្រកាន់ជំហររឹងមាំលើបញ្ហានេះទេ ផ្លែផ្កានៃសន្តិភាព និងផ្លែផ្កាអភិវឌ្ឍន៍របស់យុវជនជំនាន់មុនសម្រេចបាននាពេលកន្លងមកនោះ អាចនឹងរលាយបាត់បង់ក្នុងរយៈពេលតែមួយពព្រិចភ្នែក ហើយប្រទេសជាតិអាចនឹងធ្លាក់ចូលក្នុងរណ្ដៅអស្ថិរភាព ដូចជាសង្គ្រាមស៊ីវិល ដែលកំពុងតែកើតមាននៅក្នុងពិភពអារ៉ាប់ និងអាហ្វ្រិកខាងជើងជាដើម។
លោក ហ៊ុន សែន ថ្លែងបែបនេះក្នុងវេទិកាយុវជនអាស៊ីឆ្នាំ២០១៣ នាទីក្រុងភ្នំពេញ នៅថ្ងៃទី៣១ ឧសភា។
ឆ្លើយតបនឹងប្រសាសន៍របស់លោក ហ៊ុន សែន ទៅលើបញ្ហាយុវជននេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ សង្កេតឃើញថា យុវជនកម្ពុជា ភាគច្រើននៅប៉ុន្មានឆ្នាំចុងក្រោយនេះ ពួកគេមានការសិក្សាបានខ្ពស់ និងមានការពិចារណាបានត្រឹមត្រូវល្អទៅសារនយោបាយរបស់ក្រុមគណបក្ស និងពីមជ្ឈដ្ឋាននានា បើសិនជាមានជាប់ពាក់ព័ន្ធនឹងវាសនាអនាគតខ្លួនគេផ្ទាល់ ជាពិសេសទៅលើបញ្ហាប្រទេសជាតិ។
ចំពោះការផ្ញើសារពីក្រៅប្រទេសវិញនោះ លោកមើលឃើញតែសារ ឬទស្សនៈដែលមានន័យអប់រំដល់យុវជន ឲ្យស្រឡាញ់ជាតិខ្លួនឯង លើកស្ទួយសិទ្ធិមនុស្ស លទ្ធិប្រជាធិបតេយ្យជាដើម។ ផ្ទុយទៅវិញ លោកមើលឃើញអ្នកនយោបាយក្នុងស្រុកទៅវិញទេ ជាពិសេសអ្នកកាន់អំណាច តែងតែផ្តល់សារនយោបាយដោយប្រើពាក្យអសុរោះ មានចរិតបែបញុះញង់ បញ្ឆេះហិង្សាផ្ទាល់ និងបែបប្រយោលជាដើម។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គឹមអេង។ លោកមានប្រសាសន៍ថា លោកមិនហ៊ានវាយតម្លៃយុវជនសព្វថ្ងៃ មានការគិតពិចារណាបានត្រឹមត្រូវក្នុងកម្រិតណានោះទេ ប៉ុន្តែលោកជឿថា យុវជនឥឡូវមានការសិក្សា និងមានការស្វែងយល់ពីបញ្ហាសង្គមបានច្រើនជាងមុនតាមប្រព័ន្ធផ្សព្វផ្សាយនានា មានបណ្ដាញសង្គមហ្វេសប៊ិក (facebook) ជាដើម។ ទាំងនេះជាទុនមួយយ៉ាងសំខាន់ សម្រាប់ឲ្យពួកគាត់ពិចារណារកការពិត ត្រឹមត្រូវ ឬក៏យ៉ាងណា មុននឹងសម្រេចចិត្តធ្វើកិច្ចការអ្វីមួយនោះ។
វេទិកាយុវជនអាស៊ីឆ្នាំ២០១៣ នេះ ធ្វើឡើងនៅទីក្រុងភ្នំពេញ រៀបចំឡើងដោយសហភាពសហព័ន្ធយុវជនកម្ពុជា សហការជាមួយក្រុមប្រឹក្សាយុវជនអាស៊ី។ វេទិកាឆ្នាំនេះបានកំណត់យកប្រធានបទសំខាន់ គឺយុវជន និងសន្តិភាព។ ប្រធានបទនេះបានពិភាក្សាដោយឆ្លុះបញ្ចាំងពីតួនាទីរបស់យុវជន ក្នុងការកសាងសន្តិភាព និងការអភិវឌ្ឍនៅទូទាំងពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។