ការលេងល្បែងនយោបាយរបស់គណបក្សកាន់អំណាចបែបនេះ ជាជម្រើសថ្មីមួយនៅក្នុងអាណត្តិនេះ ដែលខុសពីអាណត្តិមុនៗ ដែលលោកនាយករដ្ឋមន្ត្រីភាគច្រើនយកករណីបុគ្គលចោទប្រកាន់ទៅលើបក្សប្រឆាំង រហូតដល់ព្រមានប្ដឹងទៅតុលាការទៀត ប៉ុន្តែករណីនេះអ្នកវិភាគនយោបាយបានបញ្ជាក់ថា ការធ្វើដូច្នេះអាចប៉ះពាល់ដល់ការប្រកួតប្រជែងដោយតម្លាភាព។
សកម្មភាពប្រកួតប្រជែងនយោបាយបានចាប់ផ្ដើមហើយនៅក្នុងរយៈពេលប៉ុន្មានខែចុងក្រោយ នៅមុនពេលកំណត់ថ្ងៃបោះឆ្នោតបានឈានមកដល់។ ក៏ប៉ុន្តែ ការបញ្ចេញសារនយោបាយរវាងគណបក្សប្រឆាំង និងគណបក្សកាន់អំណាចមានលក្ខណៈខុសប្លែកពីគ្នា។
គណបក្សប្រឆាំងបានប្រឹងប្រែងបញ្ចេញនូវសារនយោបាយរបស់ខ្លួនចំនួន ៧ចំណុចសំខាន់ៗ ទាក់ទងសេដ្ឋកិច្ច និងសង្គមកិច្ច ទៅកាន់ម្ចាស់ឆ្នោត ដោយរំពឹងថា សារនយោបាយនោះនឹងធ្វើឲ្យម្ចាស់ឆ្នោតចាប់អារម្មណ៍មកលើបក្សខ្លួន។
ក៏ប៉ុន្តែ គណបក្សកាន់អំណាចវិញ ពិសេសលោកនាយករដ្ឋមន្ត្រី ហ៊ុន សែន បានឆ្លៀតយកឱកាសសម្ពោធសមិទ្ធផលនានាក្នុងនាមជានាយករដ្ឋមន្ត្រី បញ្ចេញសារនយោបាយទៅកាន់ម្ចាស់ឆ្នោត ដោយទាញយករឿងបុគ្គលមេបក្សសង្គ្រោះជាតិស្តីទីដោយប្រយោល មកលាតត្រដាងឲ្យប្រជាពលរដ្ឋបានដឹង។
នៅក្នុងរយៈពេលចុងក្រោយនេះ មានករណីជាច្រើនដែលលោកនាយករដ្ឋមន្ត្រី ហ៊ុន សែន បានលើកពីករណីបុគ្គលមេបក្សប្រឆាំង គឺលោក កឹម សុខា ទោះបីជាលោកមិនបានលើកចំឈ្មោះក្ដី ដូចជាករណីចោទលោក កឹម សុខា និយាយថា គុកទួលស្លែងជាគុកសិប្បនិម្មិត និងប្ដឹងទៅតុលាការ។ ករណីស្នេហាលួចលាក់របស់លោក កឹម សុខា ជាដើម។
ប៉ុន្តែ បញ្ហានេះត្រូវបានគណបក្សប្រឆាំងបដិសេធ ហើយថាដោយចោទប្រកាន់ថាជារឿងនយោបាយរបស់លោកនាយករដ្ឋមន្ត្រី ហ៊ុន សែន នៅមុនពេលបោះឆ្នោត។
ឆ្លើយតបទៅនឹងបញ្ហានេះ លោក ហ៊ុន សែន បានព្រមានមន្ត្រីគណបក្សសង្គ្រោះជាតិ ថា គណបក្សប្រជាជន នឹងប្ដឹងទៅតុលាការ។ លោក ហ៊ុន សែន បានជំរុញឲ្យមន្ត្រីជាន់ខ្ពស់គណបក្សប្រជាជនកម្ពុជា ប្ដឹងមន្ត្រីគណបក្សប្រឆាំងចំពោះការចោទប្រកាន់បែបនេះ។
ទាក់ទងនឹងបញ្ហានេះ ប្រធានស្ដីទីគណបក្សសង្គ្រោះជាតិ លោក កឹម សុខា បានឲ្យដឹងនៅក្នុងសន្និសីទសារព័ត៌មាននៅរសៀលថ្ងៃទី២០ មិថុនា ថា លោកមិនខ្វល់ចំពោះការគ្រោងប្ដឹងផ្ដល់របស់គណបក្សប្រជាជនកម្ពុជា នេះទេ ហើយលោកក៏មិនត្រៀមរកមេធាវីអ្វីដែរ។
អ្នកវិភាគនយោបាយបានលើកឡើងថា ទោះបីជាលោកនាយករដ្ឋមន្ត្រី ហ៊ុន សែន បានបដិសេធថាករណីទាំងអស់ដែលលោកបានរិះគន់មេដឹកនាំគណបក្សប្រឆាំង ថាមិនជាប់ពាក់ព័ន្ធនឹងគណបក្សប្រជាជនកម្ពុជា ក្ដី ក៏ប៉ុន្តែការលើកឡើងរបស់លោកជារឿងនយោបាយនៅមុនពេលបោះឆ្នោតបានមកដល់។
ម្យ៉ាងវិញទៀត ថ្វីត្បិតតែប្រព័ន្ធតុលាការនៅកម្ពុជា ត្រូវបានសហគមន៍ជាតិ អន្តរជាតិ បានរិះគន់ថា ស្ថិតនៅក្រោមឥទ្ធិពលគណបក្សកាន់អំណាចក្ដី ក៏ប៉ុន្តែអ្នកវិភាគបានលើកឡើងថា តុលាការនឹងពិបាកចាត់ការពាក្យបណ្ដឹងរបស់គណបក្សប្រជាជនណាស់នៅក្នុងស្ថានភាពការបោះឆ្នោតជិតមកដល់នេះ ដោយអ្នកវិភាគបានលើកទឡ្ហីករណ៍ជាច្រើនអំពីបញ្ហានេះ ដូចជា លោក កឹម សុខា ឬសមាជិកគណបក្សសង្គ្រោះជាតិ ដែលកើតចេញពីគណបក្ស សម រង្ស៊ី និងគណបក្ស សិទ្ធិមនុស្ស នោះ មានអភ័យឯកសិទ្ធិសភានៅឡើយ ទោះបីជាគណៈកម្មាធិការអចិន្ត្រៃយ៍រដ្ឋសភាបានផ្អាកប្រាក់ខែក្ដី។
សភាមិនអាចកោះប្រជុំនៅក្នុងអំឡុងពេលឃោសនាបោះឆ្នោត ដើម្បីប្រជុំដកអភ័យឯកសិទ្ធិបានទេ លុះត្រាតែមានករណីទាក់ទងនឹងប្រទេសជាតិធំដុំ ដែលសភាត្រូវកោះប្រជុំជាចាំបាច់មិនអាចខានបាន។ ប៉ុន្តែ ករណីព្រមានប្ដឹងរបស់គណបក្សប្រជាជន នេះ មិនមែនជារឿងជាតិទេ តែជារឿងនយោបាយរវាងគណបក្ស និងគណបក្ស។ ហើយបញ្ហានេះ ទោះបីជាមេដឹកនាំជាន់ខ្ពស់គណបក្សប្រជាជនកម្ពុជា បានបដិសេធថាមិនមែនជារឿងនយោបាយក្ដី តែនៅក្នុងបរិបទនេះ សាធារណជនបានដឹងច្បាស់ទៅហើយថាជារឿងល្បែងនយោបាយនៅមុនពេលបោះឆ្នោត។
ប្រធានផ្នែកអង្កេតរបស់អង្គការសិទ្ធិមនុស្សអាដហុក (Adhoc) លោក នី ចរិយា មានប្រសាសន៍ថា បញ្ហានេះគណបក្សប្រជាជនកម្ពុជា ឬរដ្ឋាភិបាលអាចធ្វើអ្វីៗបានស្រេចតែចិត្តទៅលើប្រព័ន្ធតុលាការ ពោលគឺប្រសិនបើរដ្ឋាភិបាលចង់លេងល្បែងនយោបាយប្រើឥទ្ធិពលរបស់ខ្លួនលើប្រព័ន្ធតុលាការ ដើម្បីចាត់ការមន្ត្រីបក្សប្រឆាំងនោះ គឺអាចធ្វើទៅបានទៅលើបណ្ដឹងដែលគណបក្សប្រជាជនកម្ពុជា ចង់ប្ដឹងនោះ តែបើផ្អែកលើផ្លូវច្បាប់អំពីករណីបណ្ដឹងនេះ មិនអាចទៅរួចទេ។
លើសពីនេះទៀត លោកនាយករដ្ឋមន្ត្រី ហ៊ុន សែន បានចំអកឲ្យគណបក្សប្រឆាំង និងជំរុញឲ្យគណបក្សគូប្រជែងនេះបោះបង់ការប្រកួតនៅមុនថ្ងៃប្រកួតមកដល់ដែរ។ លោក ហ៊ុន សែន បញ្ជាក់ថា លោកស្វាគមន៍បើសិនជាគណបក្សសង្គ្រោះជាតិ មិនចូលរួមបោះឆ្នោតនោះ។
ការប្រកាសបែបនេះរបស់លោកនាយករដ្ឋមន្ត្រី ហ៊ុន សែន ធ្វើឡើងនៅបន្ទាប់ពីមន្ត្រីនាំពាក្យគណបក្សសង្គ្រោះជាតិ បានប្រកាសថា គណបក្សសង្គ្រោះជាតិ នឹងចូលរួមបោះឆ្នោត តែនឹងមិនទទួលយកលទ្ធផលបោះឆ្នោតទេ ប្រសិនបើសកម្មជនគណបក្សប្រជាជនកម្ពុជា នៅតែរំខានវេទិការបស់គណបក្សសង្គ្រោះជាតិ និងគណៈកម្មាធិការជាតិរៀបចំការបោះឆ្នោត រៀបចំបោះឆ្នោតមានភាពមិនប្រក្រតីកើតឡើងនៅពេលបោះឆ្នោតនោះ។
ភ្ជាប់ទៅនឹងបញ្ហានេះ អ្នកវិភាគបានលើកឡើងថា នៅក្នុងបរិបទបច្ចុប្បន្ននេះ លោកនាយករដ្ឋមន្ត្រី ហ៊ុន សែន ត្រូវតែរៀបចំឲ្យអាជ្ញាធរពាក់ព័ន្ធរៀបចំការពារគ្រប់គណបក្សនយោបាយទាំងអស់ឲ្យមានការប្រកួតប្រជែងឲ្យបានស្មើភាពគ្នា ក្នុងនាមលោកជានាយករដ្ឋមន្ត្រីដឹកនាំរដ្ឋាភិបាលនោះ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា ការព្រមានប្ដឹងផ្ដល់គ្នាអំពីការរិះគន់គ្នាទាក់ទងនឹងរឿងនយោបាយនៅក្នុងសង្គមប្រជាធិបតេយ្យនេះ មិនមែនជាដំណោះស្រាយនោះទេ ប៉ុន្តែបើសិនជាមេដឹកនាំគណបក្សប្រឆាំង និងគណបក្សកាន់អំណាចចង់តទល់គ្នាអំពីរឿងអ្វីមួយនៅមុនពេលបោះឆ្នោតនេះ ពួកគាត់ត្រូវឡើងតទល់គ្នានៅក្នុងវេទិកា ដើម្បីវែកញែកឲ្យប្រជាពលរដ្ឋបានដឹង។
ទោះបីជាយ៉ាងណាក៏ដោយ អ្នកវិភាគបានលើកឡើងថា សកម្មភាពរបស់នាយករដ្ឋមន្ត្រីទៅលើមេដឹកនាំគណបក្សប្រឆាំងនេះ ជារូបភាពដាក់សម្ពាធផ្នែកនយោបាយនៅមុនពេលបោះឆ្នោតបានមកដល់។ អ្នកវិភាគបានសង្កត់ធ្ងន់ថា ប្រសិនបើគណបក្សប្រើប្រាស់ប្រព័ន្ធតុលាការដើម្បីចាត់ការមន្ត្រីបក្សប្រឆាំងនៅមុនពេលបោះឆ្នោតនេះ គណបក្សប្រឆាំងនឹងមិនទទួលស្គាល់លទ្ធផលបោះឆ្នោត ពីព្រោះការប្រកួតប្រជែងនោះឆ្លុះបញ្ចាំងអំពីអតុល្យភាពក្នុងការប្រកួតប្រជែងនៅក្នុងសង្គមប្រជាធិបតេយ្យ។ នៅពេលនោះ រដ្ឋាភិបាលថ្មីក្លាយទៅជារដ្ឋាភិបាលចាំផ្ទះ ហើយនឹងមានការថ្កោលទោសពីអន្តរជាតិ ដោយហេតុថាកម្ពុជា ជាសមាជិកអង្គការសហប្រជាជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។