មន្ត្រីក្រុមការងារទេសចរណ៍បានរកឃើញថា ក្រុមហ៊ុនទទួលសិទ្ធិវិនិយោគតំបន់ឆ្នេរ និងកោះមួយចំនួននៅកម្ពុជា មិនបានដំណើរការគម្រោងវិនិយោគរបស់ខ្លួនទេ ដោយទាមទារឲ្យរដ្ឋាភិបាលត្រួតពិនិត្យក្រុមហ៊ុនទាំងនោះឡើងវិញ។
ទាក់ទងនឹងបញ្ហានេះ លោកនាយករដ្ឋមន្ត្រី ហ៊ុន សែន បានជំរុញឲ្យក្រុមប្រឹក្សាអភិវឌ្ឍន៍កម្ពុជា ហៅកាត់ថា ស៊ី.ឌី.ស៊ី ( CDC) ពិនិត្យមើលឡើងវិញ ចំពោះក្រុមហ៊ុនទាំងនោះ។ តែទោះជាយ៉ាងនេះក្ដី ដោយមេដឹកនាំគណបក្សប្រឆាំងបានចាត់ទុកការផ្ដល់តំបន់ឆ្នេរ និងកោះ ជួលឲ្យក្រុមហ៊ុនឯកជននោះជារឿងខុសច្បាប់។
លោកនាយករដ្ឋមន្ត្រី ហ៊ុន សែន បានព្រមានដកអាជ្ញាប័ណ្ណពីក្រុមហ៊ុនទទួលសិទ្ធិវិនិយោគកោះមួយចំនួននៅកម្ពុជា ដែលវិនិយោគធ្វើជាតំបន់ទេសចរណ៍ ហើយមិនបានគោរពតាមគោលការណ៍របស់រដ្ឋាភិបាលនោះ។
លោក ហ៊ុន សែន ថ្លែងនៅក្នុងវេទិការាជរដ្ឋាភិបាលផ្នែកឯកជនលើកទី១៧ នៅវិមានសន្តិភាពថ្ងៃទី៤ មីនា ដោយលោកបញ្ជាឲ្យក្រុមប្រឹក្សាអភិវឌ្ឍន៍កម្ពុជា ស៊ី.ឌី.ស៊ី ពិនិត្យមើលកិច្ចសន្យា និងសកម្មភាពអភិវឌ្ឍន៍របស់ក្រុមហ៊ុនទាំងនោះឡើងវិញ ប្រសិនបើក្រុមហ៊ុនទទួលសិទ្ធិវិនិយោគឆ្នេរ កោះ មិនបានគោរពតាមកិច្ចសន្យារបស់គណៈកម្មាធិការវិនិយោគទេ ត្រូវដកហូតអាជ្ញាប័ណ្ណ ឬកិច្ចសន្យាវិញ។
«សំឡេង»
លោក ហ៊ុន សែន បានបញ្ជាដូច្នេះជាការឆ្លើយតបទៅសហប្រធានក្រុមការងារទេសចរណ៍ លោក ហូ វណ្ឌី ដែលលោកបានលើកឡើងថា ក្រុមហ៊ុនឯកជនបានទទួលសិទ្ធិវិនិយោគកោះនៅកម្ពុជា មានចំនួនជាង ២០កោះ តែកោះដែលក្រុមហ៊ុនធ្វើការអភិវឌ្ឍនោះមានប្រមាណជា ៦កោះទេ គិតពីឆ្នាំ២០០៥ មក ដែលរដ្ឋាភិបាលវិនិយោគឲ្យក្រុមហ៊ុនក្នុងស្រុក និងក្រុមហ៊ុនក្រៅស្រុក។
«សំឡេង»
ប្រធានគណបក្សសង្គ្រោះជាតិ លោក សម រង្ស៊ី មានប្រសាសន៍នៅក្នុងវីដេអូឃ្លិបមួយនៅក្នុងទំព័រហ្វេសប៊ុក (Facebook) ផ្ទាល់ខ្លួនរបស់លោក កាលពីថ្ងៃទី៣ មីនា នៅខណៈលោកបានទៅកម្សាន្តនៅខេត្តកែប ថា ការវិនិយោគតំបន់ឆ្នេរសមុទ្រ និងកោះ របស់រដ្ឋាភិបាលឲ្យទៅក្រុមហ៊ុនឯកជននោះ ជារឿងខុសច្បាប់ ពីព្រោះតំបន់ឆ្នេរ និងកោះជាទ្រព្យសម្បត្តិសាធារណៈរបស់រដ្ឋ មិនអាចយកទៅជួលបានទេ។
«សំឡេង»
រដ្ឋាភិបាលបានផ្ដល់ដីកោះ និងតំបន់ឆ្នេរមួយចំនួនឲ្យក្រុមហ៊ុនឯកជនវិនិយោគរយៈពេលវែងរហូតដល់ ៩៩ឆ្នាំ ដូចជាកោះទន្សាយ ជាដើម។
អ្នកឃ្លាំមើលផ្នែកអភិវឌ្ឍន៍សង្គម លោក កែម ឡី មានប្រសាសន៍ថា រដ្ឋាភិបាលឲ្យសើរើកិច្ចសន្យាឡើងវិញទាក់ទងនឹងការជួលកោះឲ្យក្រុមហ៊ុនឯកជននេះជារឿងល្អមួយ។ ទោះបីជាយ៉ាងនេះក្ដី លោកបញ្ជាក់ថា តំបន់កោះជាតំបន់រសើបមួយដែលប្រទាញប្រទង់គ្នាច្រើនណាស់។ លោកបញ្ជាក់ថា នៅប្រទេសមួយចំនួនគេមិនវិនិយោគឲ្យក្រុមហ៊ុនឯកជនទេ គឺរដ្ឋាភិបាលលើកទឹកចិត្តឲ្យប្រជាពលរដ្ឋទៅរស់នៅឲ្យបានច្រើន ព្រោះប្រជាពលរដ្ឋជារបងដ៏រឹងមាំសម្រាប់ព្រំដែន ពិសេស គឺដែនទឹក។
«សំឡេង»
អ្នកវិភាគបានលើកឡើងថា រដ្ឋាភិបាលត្រូវលុបចោលការផ្ដល់ការវិនិយោគតំបន់ឆ្នេរនោះវិញ ពីព្រោះតំបន់ឆ្នេរជាទ្រព្យសម្បត្តិសាធារណៈរបស់រដ្ឋ ដែលកំណត់ក្នុងច្បាប់។ ហើយការផ្ដល់វិនិយោគតំបន់ឆ្នេរធ្វើឲ្យប៉ះពាល់ដល់ប្រជាពលរដ្ឋ ពួកគាត់មិនអាចនេសាទ និងប្រកបអាជីវកម្មតាមឆ្នេរបាន និងករណីផ្សេងៗទៀត។ អ្នកឃ្លាំមើលផ្នែកអភិវឌ្ឍន៍សង្គមសង្កត់ធ្ងន់ថា រដ្ឋាភិបាលជួលដីឲ្យក្រុមហ៊ុនឯកជននេះ ជាសកម្មភាពអភិវឌ្ឍគាំទ្រអ្នកមាន ហើយក្រុមហ៊ុនទាំងនោះរហូតដល់ចាក់ដីចូលសមុទ្រពង្រីកផ្ទៃឆ្នេរថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។