លោកនាយករដ្ឋមន្ត្រី ហ៊ុន សែន លើកឡើងពីអតុល្យភាពក្នុងសង្គមដែលចេះតែកើនឡើងពីមួយអាណត្តិទៅមួយអាណត្តិនៃរដ្ឋាភិបាលរបស់លោក។ មន្ត្រីជាន់ខ្ពស់នៃគណបក្សប្រឆាំង និងសង្គមស៊ីវិលបង្ហាញទស្សនៈថា បញ្ហានេះឆ្លុះបញ្ចាំងឲ្យឃើញអំពើអយុត្តិធម៌ក្នុងសង្គម និងអំពើពុលរលួយនៅតែមានឥទ្ធិពលខ្លាំងនៅឡើយ។
លោកនាយករដ្ឋមន្ត្រី ហ៊ុន សែន ថ្លែងនៅថ្ងៃចន្ទទី០១ ធ្នូ ថា អតុល្យភាពក្នុងសង្គមបានឡើងរហូតដល់១២ចំណុច គិតចាប់ពីទសវត្ស៨០រហូតដល់បច្ចុប្បន្ន។ ចំនួននេះបានកើនឡើងច្រើនពីមួយអាណត្តិទៅមួយអាណត្តិ នៃរដ្ឋាភិបាលក្នុងដំណាក់កាលដែលលោកដឹកនាំ៖ «នៅក្នុងសៀវភៅ ១០ឆ្នាំនៃដំណើរកម្ពុជា របស់ខ្ញុំនៅឆ្នាំ១៩៨០ ពិនិត្យឃើញអតុល្យភាពតែបួនទេ ក្រោយមកឡើងជាហូរហែ ដល់អតុល្យភាព ៦យ៉ាង ដល់ ១០យ៉ាង។ ឥឡូវនេះពិនិត្យត្រួសៗ គឺអតុល្យភាព ១២យ៉ាងដែលជាចុងខ្សែច្រើននៃចំណងមួយ»។
អតុល្យភាពទាំង១២ចំណុចនោះ រួមមាន សេចក្ដីត្រូវការ និងការខ្វះខាតផ្នែកផ្គត់ផ្គង់ បញ្ហាចំណូលទាប និង ការ ចំណាយថវិកាជាតិកើនខ្ពស់ ការនាំចេញមានកម្រិតទាប តែការនាំចូលខ្ពស់ រូបិយវត្ថុ និងទំនិញលើទីផ្សារ ឡើងថ្លៃខ្ពស់ពីតម្រូវការនៃការអភិវឌ្ឍ និងកង្វះប្រព័ន្ធហេដ្ឋារចនាសម្ព័ន្ធ សេចក្ដីត្រូវការអភិវឌ្ឍ និងការខ្វះខាតនូវធនធានមនុស្ស សេចក្ដីត្រូវការក្នុងជីវភាពរស់នៅ របស់ប្រជាពលរដ្ឋ និងការអភិវឌ្ឍនៅទាប តម្រូវការពលកម្ម និងការធ្វើចំណាកស្រុក តម្រូវការការងារធ្វើ ផលិតផលរបស់ប្រជាកសិករ ខ្វះទីផ្សារសម្រាប់នាំចេញជាដើម។
ក្នុងចំណោមអតុល្យភាពទាំង១២ លោកហ៊ុន សែន ផ្ដោតសំខាន់ទៅលើអតុល្យភាពនៃការអភិវឌ្ឍជាតិ និងការអភិវឌ្ឍន៍ធនធានមនុស្ស ហើយបញ្ហាទាំងអស់នេះកម្ពុជាត្រូវតែខិតខំដោះស្រាយ៖ «លោកបញ្ជាក់ក្នុងក្របខ័ណ្ឌនីតិប្រតិបត្តិដោយទាមទារឲ្យថ្នាក់ជាតិ និងក្រោមជាតិដែលមានភារកិច្ចផ្តល់សេវាជូនប្រជាពលរដ្ឋ ត្រូវរហ័សរហួនឡើង ហើយឲ្យមានប្រសិទ្ធភាព»។
ទាក់ទងបញ្ហានេះ អ្នកតំណាងរាស្ត្រ និងជាអ្នកនាំពាក្យ នៃគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា អតុល្យភាពកើតឡើងដោយសារមានអំពើអយុត្តិធម៌សង្គម ដូចជាការបែងចែកផលប្រយោជន៍មិនស្មើគ្នារវាងអ្នកមាន និងអ្នកក្រ ឬអ្នកមានអំណាច និងអ្នកទន់ខ្សោយជាដើម៖«ដើម្បីឲ្យមានតុល្យភាព ឲ្យមានយុត្តិធម៌សង្គម ត្រូវតែមានការបែងចែកកំណើនសេដ្ឋកិច្ចឲ្យមានសមធម៌ជាមួយប្រជាពលរដ្ឋ»។
លោកបន្តថា បញ្ហានេះកំពុងធ្វើប៉ះពាល់ដល់ដំណើរការអភិវឌ្ឍន៍ជាតិ ជាពិសេសសហគមន៍ប្រជាពលរដ្ឋក្រីក្រនៅតាមទីជនបទ។
ចំណែកប្រធាន ក្រុមប្រឹក្សាភិបាល នៃមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ទាក់ទងនឹងបញ្ហានេះដែរថា អំពើពុករលួយជាដើមចមធ្វើឲ្យអតុល្យភាពសង្គមកាន់តែរីកធំឡើង។
មួយផ្នែកទៀតបណ្ដាលមកពីការបែងចែកផលប្រយោជន៍រវាងអ្នកទីក្រុង និងជនបទ ដែលទទួលបានឱកាសខុសគ្នាដូចជាមុខជំនួញ និងការអប់រំ៖ «អ្នកនៅក្នុងក្រុងចាយលុយខ្ជះខ្ជាយមែនទែនហើយអ្នកក្រក្នុងក្រុងក៏មានច្រើនដែរ។ ចំពោះខ្ញុំរឿងហ្នឹងគឺជារឿងដែលត្រូវយកចិត្តទុកដាក់មែនទែន»។
របាយការណ៍របស់ធនាគារអភិវឌ្ឍអាស៊ីរកឃើញថា សេដ្ឋកិច្ចកម្ពុជាមានកំណើនខ្ពស់ តែកម្ពុជានៅមានក្រុមអ្នកងាយរងគ្រោះច្រើន ដូចជាក្រុមអ្នកក្រីក្រ ក្រុមអ្នកគ្មានការងារធ្វើ និងក្រុមប្រជាពលរដ្ឋដែលរងផលប៉ះពាល់ពីគម្រោងដីសម្បទានសេដ្ឋកិច្ច គម្រោងអភិវឌ្ឍទំនប់វារីអគ្គិសនីជាដើម។
ប្រជាពលរដ្ឋដែលស្ថិតនៅក្រុមអ្នកងាយរងគ្រោះទាំងនោះ មានប្រហែល៩លាននាក់ក្នុងចំណោមប្រជាពលរដ្ឋកម្ពុជាសរុប១៥លាននាក់។ ទាំងគណបក្សប្រឆាំង និងសង្គមស៊ីវិល ជំរុញឲ្យរដ្ឋាភិបាល និងអ្នកពាក់ព័ន្ធ ប្រញាប់ប្រញាល់ដោះស្រាយបញ្ហាទាំងនេះជាបន្ទាន់ដើម្បីជំរុញដល់ការអភិវឌ្ឍន៍ជាបានដើរទៅមុខរួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។