សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ចុះថ្ងៃទី១០ ឧសភា ឲ្យដឹងថា ឯកអគ្គរដ្ឋទូតឥណ្ឌា ប្រចាំប្រទេសកម្ពុជា លោក ឌីណេស ប៉ាតណែក (Dinesk K Patnaik) បានផ្ដល់ជំនួយជាទឹកខ្មៅលុបលាងមិនជ្រះចំនួន ៤ម៉ឺនដប ដល់ គ.ជ.ប សម្រាប់ប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ ដែលធ្វើឡើងនៅថ្ងៃអាទិត្យ ទី២៨ ខែកក្កដា ខាងមុខនេះ។
លិខិតបន្តថា ទឹកខ្មៅនេះត្រូវគេប៉ាន់ប្រមាណថាមានតម្លៃប្រមាណ ៤៥លានរូពី ដែលស្មើប្រមាណ ៨៣ម៉ឺនដុល្លារសហរដ្ឋអាមេរិក។ ហើយទឹកថ្នាំនេះ នឹងត្រូវបញ្ជូនតាមយន្តហោះក្នុងអំឡុងពាក់កណ្ដាលខែមិថុនា ខាងមុខ។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត ឲ្យដឹងតាមរយៈសេចក្ដីប្រកាសព័ត៌មានថា រាល់ការបោះឆ្នោតនៅកម្ពុជា ចាប់តាំងពីការបោះឆ្នោតជាតិ កាលពីឆ្នាំ១៩៩៨ មក គ.ជ.ប បានបញ្ជាទិញ និងប្រើប្រាស់តែទឹកខ្មៅលុបលាងមិនជ្រះនេះពីប្រទេសឥណ្ឌា តែប៉ុណ្ណោះ។ លោកបន្តថា ព្រោះទឹកថ្នាំប្រភេទនេះមានគុណភាពលុបមិនជ្រះក្នុងរយៈពេល ៧ ទៅ ១៥ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។