ក្រសួងមហាផ្ទៃ បានទទួលស្គាល់លក្ខន្តិកៈថ្មីរបស់គណបក្សសង្គ្រោះជាតិ ដែលបានយកទៅតម្កល់កាលពីថ្ងៃទី២៦ ខែមេសា នោះហើយ។ មន្ត្រីជាន់ខ្ពស់ក្រសួងមហាផ្ទៃ លើកឡើងថា គណបក្សប្រឆាំងអាចដំណើរការរៀបចំសមាសភាពដឹកនាំគណបក្សបាន ប៉ុន្តែត្រូវតែធ្វើឡើងឲ្យស្របតាមច្បាប់ និងលក្ខន្តិកៈដែលបានតម្កល់នៅក្រសួងមហាផ្ទៃ។
មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងភ្លាមៗ ក្រោយពីក្រសួងមហាផ្ទៃ ទទួលស្គាល់លក្ខន្តិកៈថ្មី នៅថ្ងៃទី៣ ខែឧសភា ថា គណបក្សប្រឆាំងនឹងរៀបចំសមាសភាពក្បាលម៉ាស៊ីនដឹកនាំគណបក្សក្នុងពេលឆាប់ៗខាងមុខ។
មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា គណៈកម្មការនាយកគណបក្សនឹងជ្រើសរើសអនុប្រធាននៅក្រោយថ្ងៃទី១៥ ខែឧសភា បន្ទាប់ពីលោក កឹម សុខា ប្រធានគណបក្សវិលត្រឡប់ពីបំពេញទស្សនកិច្ចនៅសហរដ្ឋអាមេរិកវិញ។ លោកបញ្ជាក់ថា គណបក្សនឹងដាក់បេក្ខភាពអនុប្រធានបក្សនេះជាបេក្ខភាពចាស់ដដែល៖ «នៅក្នុងលក្ខន្តិកៈដែលយើងប្រគល់សិទ្ធិទៅអោយគណៈកម្មការនាយកជាអ្នករៀបចំ រហូតដល់បច្ចុប្បន្ននៅ ៣រូបនៅចង់ដាក់បេក្ខភាពគាត់ដដែល ហើយដល់ប្រជុំគណៈកម្មការនាយកយើងមិនទាន់ដឹងថាមានបេក្ខភាពណាខ្លះ»។
ក្រសួងមហាផ្ទៃ បានទទួលស្គាល់លោក កឹម សុខា ជាប្រធានគណបក្ស កាលពីថ្ងៃទី៥ ខែមេសា ប៉ុន្តែមិនទទួលស្គាល់អនុប្រធាន ៣រូបទៀតទេ រួមមានលោក អេង ឆៃអ៊ាង លោក ប៉ុល ហំម និងអ្នកស្រី មូរ សុខហួរ ដោយក្រសួងបញ្ជាក់ពីមូលហេតុថា ការរៀបចំក្បាលម៉ាស៊ីនដឹកនាំថ្មីនេះ ធ្វើឡើងខុសលក្ខន្តិកៈដែលតម្កល់នៅក្រសួងមហាផ្ទៃ កាលពីឆ្នាំ២០១២។ ការជ្រើសរើសសមាសភាពដឹកនាំថ្មីនេះ នៅក្រោយពេលលោក សម រង្ស៊ី ដែលជាប់បណ្ដឹងរាប់មិនអស់នៅតុលាការបានលាលែងពីប្រធានគណបក្ស។
លោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ បានផ្ញើលិខិតជូនដំណឹងទៅគណបក្សសង្គ្រោះជាតិវិញ នៅថ្ងៃទី៣ ខែឧសភា ដោយបញ្ជាក់ថា ក្រសួងមហាផ្ទៃ បានទទួលសំណើសុំតម្កល់លក្ខន្តិកៈគណបក្សសង្គ្រោះជាតិ ដែលធ្វើសមាជវិសាមញ្ញគណបក្ស ធ្វើវិសោធនកម្មលើប្រការ ៤៧ (ថ្មី) ទៅប្រការ ៤៧ (ថ្មីមួយ) និងបានអនុម័តកែតម្រូវលេខរៀងជំពូកទី១០ ទៅជាជំពូកទី៩ វិញ។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ បន្ថែមថា ក្រសួងមហាផ្ទៃ ទទួលស្គាល់ និងតម្កល់លក្ខន្តិកៈថ្មីរបស់គណបក្សប្រឆាំងនៅក្រសួងហើយ តែលោកបញ្ជាក់ថា បញ្ហាសំខាន់គណបក្សសង្គ្រោះជាតិត្រូវតែអនុវត្តតាមលក្ខន្តិកៈនេះ៖ «ប្រការ៤១ និងប្រការ៤៧ថ្មី។ ប្រការ៤១ ចែងថា ប្រធាន និងអនុប្រធានបក្សត្រូវជ្រើសរើសដោយសមាជ ដល់ប្រការ៤៧ថ្មី បានចែងថា អត់មានអនុប្រធាន ត្រូវជ្រើសរើសយ៉ាងតិចម្នាក់ដោយគណៈកម្មការនាយក។ ដល់ពេលគាត់អនុវត្ត មិនដឹងគាត់អនុវត្តយ៉ាងម៉េច ចាំមើល»។
ក្រសួងមហាផ្ទៃ បានទទួលស្គាល់លក្ខន្តិកៈថ្មីដែលមាន ៩ជំពូក និង ៥៨ប្រការ របស់គណបក្សសង្គ្រោះជាតិ នៅក្រោយពេលគណបក្សនេះ បានយកទៅតម្កល់កាលពីថ្ងៃទី២៦ ខែមេសា ក្រោយពីបានធ្វើវិសោធនកម្មប្រការ ៤៧ (ថ្មី) ទៅប្រការ ៤៧ (ថ្មីមួយ) ដោយសម្រេចលុបចេញរយៈពេលនៃការជ្រើសរើសអនុប្រធានបក្សនៅក្នុងអង្គសមាជវិសាមញ្ញកាលពីថ្ងៃទី២៥ ខែមេសា។
ប្រធានអង្គការនិចហ្វិក (NICFEC) លោក សំ គន្ធាមី មានប្រសាសន៍ថា ជារឿងល្អដែលក្រសួងមហាផ្ទៃ ទទួលស្គាល់លក្ខន្តិកៈថ្មីរបស់គណបក្សសង្គ្រោះជាតិ។ លោកបញ្ជាក់ថា គណបក្សប្រឆាំងត្រូវតែរួសរាន់រៀបចំក្បាលម៉ាស៊ីនដឹកនាំបក្សនេះឲ្យបានឆាប់ៗ ព្រោះពេលវេលារៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ជិតមកដល់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។