ជប៉ុនបានផ្ដល់ជំនួយឥតសំណងនូវទឹកប្រាក់ ២លានដុល្លារអាមេរិក តាមរយៈធនាគារអភិវឌ្ឍន៍អាស៊ីកម្ពុជា ដើម្បីជួយប្រទេសកម្ពុជា ទប់ស្កាត់អំពីផលប៉ះពាល់នៃគ្រោះធម្មជាតិដល់ដំណាំកសិកម្ម។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី នៅថ្ងៃទី១៨ មិថុនា បានគូសបញ្ជាក់ថា ទឹកប្រាក់នេះអាចឆ្លើយតបចំពោះហានិភ័យពីគ្រោះមហន្តរាយប្រកបប្រសិទ្ធភាព។ ទឹកប្រាក់នេះនឹងចាប់ផ្ដើមអនុវត្តចាប់ពីខែកក្កដា ឆ្នាំ២០១៤ ហើយបញ្ចប់នៅខែមិថុនា ឆ្នាំ២០១៦។
នាយកធនាគារអភិវឌ្ឍន៍អាស៊ីប្រចាំកម្ពុជា លោក អៀរិក ស៊ីដវិច (Eric Sidgwick) មានប្រសាសន៍ថា ជំនួយឥតសំណងនេះ នឹងជួយរដ្ឋាភិបាលកម្ពុជា ក្នុងការរៀបចំយុទ្ធសាស្ត្រប្រតិបត្តិការ និងការបណ្ដុះបណ្ដាលស្ដីពីការគ្រប់គ្រងហានិភ័យ គ្រោះមហន្តរាយដែលបានប៉ះពាល់ដល់ប្រជាពលរដ្ឋក្រីក្រ ហេដ្ឋារចនាសម្ព័ន្ធ និងសេដ្ឋកិច្ចរាប់លានដុល្លារអាមេរិករៀងរាល់ឆ្នាំ។
តាមការប៉ាន់ស្មានដោយកម្មវិធីអភិវឌ្ឍន៍សហប្រជាជាតិ បានបង្ហាញថា ប្រទេសកម្ពុជា បានខាតបង់ទឹកប្រាក់ជាង ២០០លានដុល្លារអាមេរិក និងប៉ះពាល់ដល់ជីវភាពប្រជាពលរដ្ឋជិត ២លាននាក់ ពីគ្រោះធម្មជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។