រាជរដ្ឋាភិបាលកម្ពុជា ទទួលបានប្រាក់កម្ចីពីរាជរដ្ឋាភិបាលជប៉ុន ចំនួន ៨.៨៥២.០០០.០០០ (ប្រាំបីពាន់ប្រាំបីរយហាសិបពីរលានយ៉េន) ឬស្មើប្រមាណ ៩០លានដុល្លារសហរដ្ឋអាមេរិក ដើម្បីស្ថាបនាផ្លូវ និងកែលម្អកំណាត់ផ្លូវជាតិលេខ៥ ជិត ៥០គីឡូម៉ែត្រពីខេត្តបាត់ដំបង ទៅក្រុងសិរីសោភ័ណ ខេត្តបន្ទាយមានជ័យ។
លោក កុយ គួង មន្ត្រីនាំពាក្យក្រសួងការបរទេស និងសហប្រតិបត្តិការអន្តរជាតិ មានប្រសាសន៍ថា ពិធីចុះហត្ថលេខាកម្ចីសម្បទាននេះធ្វើនៅទីស្ដីការក្រសួង ព្រឹកថ្ងៃទី៣០ ខែមេសា រវាងលោក ហោ ណាំហុង រដ្ឋមន្ត្រីក្រសួងការបរទេស ជាមួយលោក គូម៉ាម៉ារូ យូជិ (Kumamaru Yuji) ឯកអគ្គរាជទូតជប៉ុន ប្រចាំកម្ពុជា។
លោក កុយ គួង បន្តថា កម្ចីសម្បទានជប៉ុន មានគោលដៅបង្កើនសមត្ថភាពដឹកជញ្ជូនរវាងប្រទេសកម្ពុជា និងប្រទេសជិតខាងក្នុងតំបន់ មានថៃ និងវៀតណាម។ លោកឲ្យដឹងថា ផ្លូវជាតិលេខ៥ ជាច្រករបៀងសេដ្ឋកិច្ចសម្រាប់បម្រើឲ្យការដឹកជញ្ជូន ទាំងក្នុង និងក្រៅស្រុករបស់ប្រទេសកម្ពុជា ទៅមហាអនុតំបន់ទន្លេមេគង្គ និងអាស៊ាន៖ «គោលដៅសំខាន់ គឺកែលម្អកំណាត់ផ្លូវជាតិលេខ ៥ ពីខេត្តបាត់ដំបង ទៅ សិរីសោភ័ណ ដែលមានចម្ងាយផ្លូវ ៤៧គីឡូម៉ែត្រ។ ពង្រីកឲ្យបានទទឹង ៣០ម៉ែត្រ ធ្វើឲ្យមានផ្លូវរថយន្តពីរទៅ ពីរមក។ ទី២ គឺស្ថាបនាផ្លូវវាងចំនួនពីរខ្សែ ពីថ្មគោល កាត់តាមបាត់ដំបង ទៅដល់ស្រុកសង្កែ ដែលមានចម្ងាយ ២៣.១គីឡូម៉ែត្រក្រឡា។ ហើយផ្លូវវាងមួយទៀត ពីស្រុកមង្គលបុរី ទៅស្រុកសិរីសោភ័ណ គឺផ្លូវវាងហ្នឹង ទៅដល់ទីហ្នឹង គឺមានចម្ងាយ ១៣.៤គីឡូម៉ែត្រក្រឡា។ ដូច្នេះលិខិតប្ដូរសារដែលមានទឹកប្រាក់ ៩០លានដុល្លារហ្នឹង គឺពង្រីកផ្លូវហើយនិងធ្វើផ្លូវវាងចំនួន ២ខ្សែទៀត»។
ឯកអគ្គរាជទូតជប៉ុនប្រចាំកម្ពុជា លោក គូម៉ាម៉ារូ យូជិ មានប្រសាសន៍ក្នុងពិធីចុះហត្ថលេខាថា ការផ្តល់ប្រាក់កម្ចីដល់កម្ពុជាពេលនេះ ធ្វើឡើងចំពេលខួបអនុស្សាវរីយ៍លើកទី ៦០ឆ្នាំ នៃចំណងមិត្តភាពរវាងរដ្ឋាភិបាលជប៉ុន និងកម្ពុជា។
លោក គូម៉ាម៉ារូ យូជិ បន្តថា ជប៉ុនបានផ្ដល់អាទិភាពឲ្យមានការអភិវឌ្ឍច្រករបៀងសេដ្ឋកិច្ច នៅភាគខាងត្បូង និងប៉ែកកណ្ដាលនៃប្រទេសកម្ពុជា។ លោករំពឹងថា កម្ចីសម្បទានលើគម្រោងស្ថាបនាកំណាត់ផ្លូវជាតិលេខ៥ នឹងរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ជាពិសេសជំរុញឲ្យទំនាក់ទំនងមិត្តភាពរវាងកម្ពុជា-ជប៉ុន កាន់តែរឹងមាំ។
យ៉ាងណាក៏ដោយ សម្រាប់គណបក្សប្រឆាំងបានស្នើឲ្យរដ្ឋាភិបាលចាយវាយប្រាក់កម្ចី ៩០លានដុល្លាររបស់ជប៉ុន ឲ្យចំគោលដៅអភិវឌ្ឍន៍ផ្លូវពិតប្រាកដ។
លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិ បានបារម្ភខ្លាចរដ្ឋាភិបាលចាយកម្ចីជប៉ុនចំនួន ៩០លានដុល្លារ មិនចំគោលដៅ និងមានអំពើពុករលួយ៖ «គម្រោងដែលបានកសាងហើយក៏ដោយ ក៏ត្រូវតែមានការថែទាំឲ្យបានដិតដល់ ឲ្យបានច្បាស់លាស់ ដើម្បីជៀសវាងដូចករណីផ្លូវធ្វើខាងក្រោយខូចខាងមុខ វាគ្មានគុណភាព»។
ទោះជាបែបនេះក្ដី សេចក្ដីប្រកាសព័ត៌មានស្ថានទូតជប៉ុន ប្រចាំកម្ពុជា បានបង្ហាញថា កម្ចីសម្បទានរបស់ជប៉ុនពេលនេះជាការឆ្លើយតបទៅសំណើសុំរបស់រាជរដ្ឋាភិបាលកម្ពុជា និងដើម្បីពង្រឹងទំនាក់ទំនងមិត្តភាព និងសហប្រតិបត្តិការរវាងប្រទេសជប៉ុន និងព្រះរាជាណាចក្រកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។