លោកនាយករដ្ឋមន្ត្រីកម្ពុជា ក្នុងពេលទៅបំពេញទស្សនកិច្ចផ្លូវការនៅប្រទេសជប៉ុន បានស្នើឲ្យ ប្រទេសជប៉ុន ជួយគាំទ្រលើការសាងសង់វិស័យហេដ្ឋារចនាសម្ព័ន្ធ ប៉ែកខាងជើងរបស់កម្ពុជា ដើម្បីឆ្លើយតបការធ្វើសមាហរណកម្មអាស៊ាននៅចុងឆ្នាំ២០១៥។ ប៉ុន្តែអង្គការសង្គមស៊ីវិលយល់ឃើញថា ទឹកប្រាក់សាងសង់ហេដ្ឋារចនាសម្ព័ន្ធនេះ គឺរដ្ឋាភិបាលកម្ពុជា ចង់បញ្ចប់ជម្លោះរ៉ាំរ៉ៃរវាងគម្រោងសាងសង់ដែលផ្ដល់សម្បទានដោយធនាគារអភិវឌ្ឍន៍អាស៊ី និងប្រជាពលរដ្ឋ។
លោកនាយករដ្ឋមន្ត្រីជប៉ុន ស៊ិនហ្សូ អាបេ (Shinzo Abe) បានសន្យាថា នឹងផ្ដល់ជំនួយនូវទឹកប្រាក់ប្រមាណ ១៦០លានដុល្លារអាមេរិក តាមសំណើរបស់លោកនាយករដ្ឋមន្ត្រី ហ៊ុន សែន នៅអំឡុងពេលលោកបានចូលរួមកិច្ចប្រជុំអំពីរឿងហានិភ័យនៃគ្រោះមហន្តរាយធម្មជាតិ នៅប្រទេសជប៉ុន កាលពីថ្ងៃទី១៥ ខែមីនា។ ទឹកប្រាក់កម្ចីសម្បទាននេះ គឺប្រើប្រាស់សម្រាប់សាងសង់នៅក្នុងវិស័យហេដ្ឋារចនាសម្ព័ន្ធ ដើម្បីផ្សារភ្ជាប់កម្ពុជា ទៅការបើកចំហសេដ្ឋកិច្ចអាស៊ាន ដែលប្រព្រឹត្តនៅចុងឆ្នាំ២០១៥។
លោកនាយករដ្ឋមន្ត្រី ហ៊ុន សែន មានប្រសាសន៍ថា ទឹកប្រាក់នេះ គឺចាំបាច់បំផុតសម្រាប់ការតភ្ជាប់ ផ្លូវរវាងកម្ពុជា និងថៃ ដើម្បីជំរុញការអភិវឌ្ឍសេដ្ឋកិច្ចកម្ពុជា និងប្រទេសនៅក្នុងតំបន់អាស៊ាន។ ប៉ុន្តែអង្គការសង្គមស៊ីវិលយល់ឃើញផ្ទុយពីនេះ ដោយគេបានលើកឡើងថា គម្រោងសាងសង់វិស័យហេដ្ឋារចនាសម្ព័ន្ធរបស់កម្ពុជា នៅប៉ែកខាងជើងនោះ បានបង្កឲ្យផលប៉ះពាល់ដល់ប្រជាពលរដ្ឋ ជាពិសេសគម្រោងសាងសង់ផ្លូវរថភ្លើង ដែលទទួលកម្ចីសម្បទានរបស់ធនាគារអភិវឌ្ឍន៍អាស៊ី។
ប្រធានអង្គការសមធម៌កម្ពុជា លោក អៀង វុទ្ធី មានប្រសាសន៍ថា ទឹកប្រាក់កម្ចីដែលលោក នាយករដ្ឋមន្ត្រី ហ៊ុន សែន បានខ្ចីពីប្រទេសជប៉ុននោះ គឺចង់យកមកបញ្ចប់ការសាងសង់ទាំងឡាយដែលរដ្ឋាភិបាលកំពុងមានជម្លោះជាមួយអ្នករងគ្រោះ ដែលតាមការប៉ាន់ស្មាន អ្នករងគ្រោះមានចំនួន ៤ពាន់គ្រួសារ៖ «គម្រោងដំបូងដែលមានទឹកប្រាក់ជាង ១០០លានដុល្លារអាមេរិក គឺចង់បញ្ចប់ការសាងសង់ខ្សែខាងជើង និងខ្សែខាងត្បូង តែជាក់ស្ដែងបន្ទាប់ពីការអនុវត្តបានតែពាក់កណ្ដាលលុយក៏អស់ទៅ ហើយអ្នករងគ្រោះក៏មានច្រើន»។
បន្ថែមលើនេះ ប្រធានធនាគារអភិវឌ្ឍន៍អាស៊ី លោក អៀរិក ស៊ីដវិច ធ្លាប់បានអះអាងកាលពីដើមខែមីនា ថា គម្រោងសាងសង់ផ្លូវរថភ្លើងនៅប៉ែកខាងជើងមិនបានបញ្ចប់នោះ ដោយសារតែរាជរដ្ឋាភិបាលកម្ពុជា មិនបានស្នើសុំជំនួយបន្ថែមពីធនាគារអភិវឌ្ឍន៍អាស៊ី៖ «ទឹកប្រាក់សរុបរបស់ធនាគារអភិវឌ្ឍន៍អាស៊ី មានចំនួនជាង ៨០លានដុល្លារអាមេរិក និងទឹកប្រាក់ឯទៀត គឺជាការរួមរបស់ម្ចាស់ជំនួយដទៃទៀត។ គម្រោងសាងសង់នេះយើងបានពិភាក្សាជាមួយរដ្ឋាភិបាលរួចរាល់ហើយ ប៉ុន្តែរហូតដល់ពេលនេះ ធនាគារអភិវឌ្ឍន៍អាស៊ី មិនទាន់បានទទួលសំណើពីរាជរដ្ឋាភិបាលនៅឡើយ»។
របាយការណ៍របស់រដ្ឋាភិបាលកម្ពុជា បានបង្ហាញថា ផ្លូវជាតិ និងផ្លូវសំខាន់នៅតាមបណ្ដាខេត្តនានា ពង្រីកបានចំនួនជាង ៤ម៉ឺន ៥ពាន់គីឡូម៉ែត្រ ដោយក្រោមជំនួយរបស់ដៃគូអភិវឌ្ឍន៍អន្តរជាតិចំនួនបី រួមមានប្រទេសចិន ជប៉ុន និងធនាគារអភិវឌ្ឍន៍អាស៊ី។ ក្នុងចំណោមហិរញ្ញប្បទានទាំងនោះ មានតែប្រទេសជប៉ុន មួយទេ ដែលផ្ដល់ជំនួយឥតសំណង និងកម្ចីសម្បទានត្រង់អត្រាការប្រាក់ទាបបំផុត។
លោកនាយករដ្ឋមន្ត្រីជប៉ុន ស៊ិនហ្សូ អាបេ មានប្រសាសន៍នៅក្នុងសន្និសីទគ្រប់គ្រងគ្រោះមហន្តរាយធម្មជាតិថា ការផ្ដល់កម្ចីសម្បទានរបស់ជប៉ុន គឺចង់ឃើញវិស័យហេដ្ឋារចនាសម្ព័ន្ធកម្ពុជា មានគុណភាព និងទទួលបានការអភិវឌ្ឍដោយស្មើភាពគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។