សមាជិកក្រុមប្រឹក្សាឃុំស្រែថ្មី ស្រុករលាប្អៀរ ខេត្តកំពង់ឆ្នាំង របស់គណបក្សប្រជាជនកម្ពុជា បានប្ដឹងពលរដ្ឋភូមិទ្រាត្បូង មួយគ្រួសារ ពីបទបរិហារកេរ្តិ៍និងចោទថា ប្រព្រឹត្តអំពើពុករលួយ និងទារប្រាក់សងជំងឺចិត្តចំនួន ៤០ម៉ឺនរៀល។ មន្ត្រីសិទ្ធិមនុស្សចាត់ទុកករណីនេះ ថាជារឿងជំរិតទារប្រាក់ និងរំលោភសិទ្ធិមនុស្សធ្ងន់ធ្ងរ។
ករណីនេះកើតឡើង បន្ទាប់ពីជំទប់ទី២ របស់គណបក្ស សម រង្ស៊ី ទៅសុំប្រជាពលរដ្ឋដាក់ស្លាកសញ្ញាគណបក្សសង្គ្រោះជាតិ នៅខាងមុខផ្ទះ ប៉ុន្តែត្រូវបានពលរដ្ឋបដិសេធដោយពោលថា "អស់លោកណាក៏ដូចលោកណាដែរ គឺពុករលួយដូចគ្នា"។ នៅពេលឮដូច្នេះ ជំទប់ទី២ គណបក្សប្រឆាំងបានយកពាក្យសម្ដីនេះទៅរាយការណ៍ប្រាប់មេឃុំ និងសមាជិកក្រុមប្រឹក្សាឃុំរបស់គណបក្សប្រជាជនកម្ពុជា។
ប្រជាពលរដ្ឋអ្នកស្រី រឹម រឿត មានប្រសាសន៍នៅថ្ងៃទី១ ខែមិថុនា ថា ក្រោយពីអ្នកស្រីហាមឃាត់មិនឲ្យជំទប់ទី២ គណបក្ស សម រង្ស៊ី ឈ្មោះ ផង់ ផាត ដាក់ស្លាកសញ្ញាគណបក្សសង្គ្រោះជាតិ នៅខាងមុខផ្ទះ និងប្រើពាក្យពុករលួយនេះនៅថ្ងៃទី២០ ខែឧសភា ស្រាប់តែលេចមុខសមាជិកក្រុមប្រឹក្សាឃុំគណបក្សប្រជាជនកម្ពុជា ឈ្មោះ ផើង ឆឺយ ដាក់ពាក្យប្ដឹងអ្នកស្រីទៅសាលាឃុំពីបទបរិហារកេរ្តិ៍ទៅវិញ៖ «ខ្ញុំក៏ថាបងឯងដោះស្រាយប៉ុណ្ណឹងអត់ចេញទេ រឿងដីរឿងធ្លីប៉ុណ្ណឹងអត់បានទេ ខ្ញុំអត់ឲ្យដាក់ទេ អស់លោកណាក៏ដូចអស់លោកណា ពុករលួយដូចតែគ្នា អ៊ីចឹងខ្ញុំអត់ឲ្យដាក់ទេ ខ្ញុំថាប៉ុណ្ណឹង»។
អ្នកស្រីបញ្ជាក់ថា អ្នកស្រីទទួលបានលិខិតអញ្ជើញរបស់មេឃុំស្រែថ្មីចំនួន២លើក គឺនៅថ្ងៃទី២១ និង២៣ ខែឧសភា ឆ្នាំ២០១៤ ដើម្បីទៅសួរនាំ និងដោះស្រាយបញ្ហាជាមួយលោក ផើង ឆឺយ ដែលជាដើមបណ្ដឹង។ នៅក្នុងដំណើរការដោះស្រាយនេះ លោក ផើង ឆឺយ បានគំរាមកំហែង និងទាមទារដាច់ខាតនូវទឹកប្រាក់ចំនួន ៤០ម៉ឺនរៀលក្នុងការបញ្ចប់បញ្ហា ភ្លាមនោះអ្នកស្រីក៏យល់ព្រមដោយសុខចិត្ដរត់ទៅរកខ្ចីប្រាក់សាច់ញាតិមកបង់។
ឆ្លើយតបបញ្ហានេះ សមាជិកក្រុមប្រឹក្សាឃុំស្រែថ្មី លោក ផើង ឆឺយ ថ្លែងបញ្ជាក់ថា លោកពិតជាបានព្រមានប្ដឹងករណីបរិហារកេរ្តិ៍នេះទៅតុលាការពិតមែន ប្រសិនបើភាគីចុងចោទមិនព្រមបង់ប្រាក់ ពីព្រោះលោកមិនបានស៊ីសំណូកសូកប៉ាន់ពីភាគីណាមួយក្នុងការដោះស្រាយរឿងដីធ្លីកាលពីមុនមក ដូចការបង្កាច់បង្ខូចនោះទេ។
លោកបន្តថា ការប្ដឹងនេះបើទោះបីជាលោកមិនបានឮផ្ទាល់ត្រចៀក ប៉ុន្តែលោក ផង់ ផាត ដែលជាជំទប់ទី២ បានប្រាប់លោកច្បាស់ថា ឈ្មោះ រឹម រឿត ពិតជាបាននិយាយបរិហារកេរ្តិ៍ចំឈ្មោះលោកប្រាកដមែន នៅអំឡុងពេលដែលលោក ផង់ ផាត ចុះទៅសុំដាក់ស្លាកសញ្ញាគណបក្សរបស់ខ្លួននៅមុខផ្ទះអ្នកស្រី រឹម រឿត នោះ។
លោក ផើង ឆឺយ៖ «ថ្ងៃហ្នឹងអ្ងែងថាឲ្យតែអញទេណា ឥឡូវអ្ងែងថារួមទាំងអស់ទៀត អ៊ីចឹងទៅជួបគ្នាកន្លែងឃុំ។ យកលុយមកឲ្យខ្ញុំត្រង់ហ្នឹងទៀត សូមបងបញ្ចប់ប៉ុណ្ណឹង អញថាអត់ចប់បានទេ។ យកមកឲ្យខ្ញុំត្រង់ហ្នឹង ១ម៉ឺន ៥ពាន់ ប៉ុន្តែខ្ញុំថា ខ្ញុំអត់យកទេ បើអត់បានទទួល ១រៀលផង ប្អូនឯងចោទខ្ញុំថា ពុករលួយ រួចទម្រាំប្អូនឯងយកមកឲ្យខ្ញុំអ៊ីចឹងទៀត ខ្ញុំមិនរឹតតែរលួយទៀតហើយ។ ទៅបាត់ ស្អែកឡើងមកទាំងប្ដីប្រពន្ធទៀត ខ្ញុំអត់ទទួលទៀត ខ្ញុំថាទៅធ្វើកិច្ចសន្យានៅឃុំឲ្យច្បាស់លាស់ មានសាក្សី ព្រោះជំទប់ទី២ ក៏លឺច្បាស់ចែស ប្រជាជនក៏លឺដែរដើរបរិហារកេរ្តិ៍ខ្ញុំតាមផ្លូវនោះ»។
ទាក់ទងបញ្ហានេះ ជំទប់ទី២ឃុំស្រែថ្មី របស់គណបក្ស សម រង្ស៊ី លោក ផង់ ផាត មានប្រសាសន៍ថា ចំពោះពាក្យពុករលួយដែលអ្នកស្រី រឹម រឿត ប្រើនេះខាងលោកមិនបានប្ដឹងផ្ដល់អ្វីទេ ប៉ុន្តែលោក ផើង ឆឺយ សមាជិកក្រុមប្រឹក្សាឃុំគណបក្សប្រជាជនកម្ពុជា កើតទុក្ខមិនសុខចិត្តទើបប្ដឹងករណីនេះទៅសាលាឃុំ បន្ទាប់ពីលោកបង្ហើបរឿងនេះដល់លោក ផើង ឆឺយ។
មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក គង់ ច័ន្ទមុនី ថ្លែងថា ខាងលោកនឹងចុះអង្កេតករណីនេះផ្ទាល់នៅថ្ងៃច័ន្ទ ដើមសប្ដាហ៍ទី១ នៃខែមិថុនា បន្ទាប់ពីទទួលបានពាក្យបណ្ដឹងរបស់គ្រួសារអ្នកស្រី រឹម រឿត៖ «បញ្ហានេះ គឺថាអ្នកកំហែងយកប្រាក់គាត់គួរតែឲ្យលុយគាត់វិញ ហើយគាត់ជាជនរងគ្រោះត្រូវតែដាក់ប្ដឹងទៅតុលាការ ដើម្បីផ្ដន្ទាទោស ធ្វើយ៉ាងណាកុំឲ្យមាននិទ្ទណ្ឌភាពនៅកម្ពុជា»។
នៅមុនការប្ដឹងផ្ដល់រឿងបរិហារកេរ្តិ៍នេះ លោក ផង់ ផាត ដែលជាជំទប់ទី២ ឃុំស្រែថ្មី របស់គណបក្ស សម រង្ស៊ី និងលោក ផើង ឆឺយ ជាសមាជិកក្រុមប្រឹក្សាឃុំរបស់គណបក្សប្រជាជនកម្ពុជា គឺជាអ្នកដោះស្រាយទំនាស់ដីធ្លី១ករណីរបស់អ្នកស្រី រឹម រឿត កាលពីដើមខែឧសភា ឆ្នាំ២០១៤។ ដំណើរការ នៃការដោះស្រាយនោះត្រូវបានប្រជាពលរដ្ឋរិះគន់ថា មានភាពលម្អៀង និងប្រព្រឹត្តអំពើពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។