មន្ត្រីគណបក្សសង្គ្រោះជាតិ នៅខេត្តកំពង់ចាម មើលឃើញរូបភាពនៃការកោះហៅមន្ត្រីរបស់ខ្លួនទៅសាកសួរជាបន្តបន្ទាប់ តាំងពីថ្នាក់ឃុំរហូតដល់ថ្នាក់ក្រុង គឺជារឿងនយោបាយ។ ពួកគេបញ្ជាក់ថា រឿងខ្លះអាចសម្របសម្រួលគ្នាបាន ហើយរឿងខ្លះទៀតស្ងាត់បាត់រាប់ឆ្នាំ ប៉ុន្តែត្រូវបានតុលាការសើរើឡើងវិញដែរ។ ការលើកឡើងនេះ ក្រោយពេលតុលាការចេញដីកាជាបន្តបន្ទាប់កោះហៅមន្ត្រីគណបក្សសង្គ្រោះជាតិ ៤រូប ចូលបំភ្លឺជុំវិញសំណុំរឿងផ្សេងៗគ្នា។
មន្ត្រីគណបក្សសង្គ្រោះជាតិ នៅខេត្តកំពង់ចាម យល់ថា ការកោះហៅមន្ត្រីរបស់ខ្លួនជាបន្តបន្ទាប់គឺជាចេតនាបំបាក់ស្មារតី មន្ត្រីទាំងនោះមិនចង់ឱ្យពួកគេបន្តជីវិតនយោបាយជាមួយគណបក្សប្រឆាំង។ ក្រៅពីនេះ គឺជារូបភាពគំរាមកំហែងដោយប្រយោលទៅកាន់មន្ត្រីឃុំជាប់ឆ្នោតថ្មីនៅខេត្តនេះ ដែលបង្កការលំបាកដល់ដំណើរការបំពេញភារកិច្ចជូនពលរដ្ឋជាដើម។
អនុប្រធានប្រតិបត្តិគណបក្សសង្គ្រោះជាតិ ខេត្តកំពង់ចាម លោក កៅ ចេស្តា មានប្រសាសន៍នៅថ្ងៃទី១៣ ខែកក្កដា មានប្រសាសន៍ថា ស្ថានភាពគំរាមកំហែងមន្ត្រីរបស់ខ្លួន ដោយប្រើប្រព័ន្ធតុលាការ និងសមត្ថកិច្ចកាន់តែមានសភាពអាក្រក់ឡើងៗ។ លោកបញ្ជាក់ថា មានមន្ត្រីរបស់ខ្លួនចំនួន ៤រូប ដែលត្រូវបានតុលាការចេញដីកាកោះហៅឱ្យចូលបំភ្លឺចាប់តាំងពីថ្ងៃទី៥ ខែកក្កដា ដល់ថ្ងៃទី៩ ខែសីហា ខាងមុខ និងមានមន្ត្រីឃុំចំនួន ៣រូបទៀត ត្រូវបានសមត្ថកិច្ចស្រុកហៅបំភ្លឺជុំវិញសំណុំរឿងមួយចំនួន បើទោះបីករណីខ្លះគ្រាន់តែជាកំហុសផ្នែករដ្ឋបាលក្តី៖ «ខ្ញុំពិនិត្យរឿងទាំងអស់ហ្នឹង ដែលកើតឡើងតាំងពីមុនពេលបោះឆ្នោតរហូតមកហ្នឹង មកដល់ការចាប់អនុវត្តក្រោយការបោះឆ្នោតគឺទទួលបានប្រភពមកថា ជារឿងនយោបាយ»។
មន្ត្រីតុលាការខេត្តកំពង់ចាម សម្រេចចេញដីកាកោះហៅមន្ត្រីគណបក្សសង្គ្រោះជាតិ ជុំវិញសំណុំរឿងមួយចំនួន រួមមានសមាជិកក្រុមប្រឹក្សាឃុំតាប្រុក ស្រុកចម្ការលើ លោក ស៊ុយ សុខឃីម ដែលត្រូវបានតំណាងអយ្យការអមសាលាដំបូងខេត្តកំពង់ចាម លោក ប្លង់ សុផល កោះហៅឱ្យចូលបំភ្លឺនៅថ្ងៃទី៥ ខែកក្កដា ជុំវិញសំណុំរឿងហិង្សាដោយចេតនាទៅលើសកម្មជនគណបក្សប្រជាជនកម្ពុជា ប៉ុន្តែលោកមិនបានចូលបំភ្លឺទេ ដោយសុំពន្យារពេល។
មួយទៀត សំណុំរឿងអតីតប្រធានសហជីពសេរីកម្មករ អ្នកស្រី គិន ស្រីអូន និងអតីតប្រធានសម្ព័ន្ធសហជីពកម្ពុជា លោក ចន ធាង ដែលធ្លាប់បំពេញការងារនៅរោងចក្រ មេតថេក ខេមបូឌា (Metec Cambodia) ត្រូវបានតំណាងអយ្យការអមសាលាដំបូងខេត្ត លោក ប៉ុក សុវណ្ណមុនី្ន ចេញដីកាបង្គាប់ឱ្យចូលខ្លួនបំភ្លឺជុំវិញបទចោទញុះញង់ឱ្យប្រព្រឹត្តបទឧក្រិដ្ឋ និងប្រើប្រាស់មធ្យោបាយដើម្បីជាឧបសគ្គដល់ចរាចរណ៍សាធារណៈដែលបានធ្វើឡើងកាលពីខែធ្នូ ឆ្នាំ២០១៣។ អ្នកទាំងពីរ បច្ចុប្បន្នម្នាក់ គឺអ្នកស្រី គិន ស្រីអូន ជាសមាជិកក្រុមប្រឹក្សាក្រុងកំពង់ចាម មកពីគណបក្សសង្គ្រោះជាតិ និងម្នាក់ទៀត គឺលោក ចន ធាង ជាលេខាចលនាយុវជនគណបក្សសង្គ្រោះជាតិ ខេត្តកំពង់ចាម។
ចំណែកករណីមួយទៀត គឺមេឃុំបុសខ្នុរ ជាប់ឆ្នោតថ្មីមកពីគណបក្សប្រឆាំង លោក ហ៊ុន សុខគង់ ត្រូវបានតំណាងអយ្យការអមសាលាដំបូងខេត្ត លោក ស៊ន មុនី កោះហៅឱ្យចូលបំភ្លឺនៅថ្ងៃទី៩ ខែសីហា ពាក់ព័ន្ធជម្លោះបង្កជាអំពើហិង្សាស្រាល រវាងកូនរបស់មេឃុំថ្មីរូបនេះ អាយុ ១២ឆ្នាំ ជាមួយក្មេងម្នាក់ទៀតដែលគេដឹងថា ជាកូនសកម្មជនគណបក្សប្រជាជនកម្ពុជា។ បញ្ហាទាំងនេះ លោក កៅ ចេស្តា កាន់តែបារម្ភចំពោះការបំពេញភារកិច្ចជូនពលរដ្ឋនៅតាមមូលដ្ឋាន ពីព្រោះមិនបានបម្រើការងារជូនពួកគាត់ឱ្យបានពេញដៃពេញជើងទេ ដោយសារមានការភ័យខ្លាចចំពោះការតាមចាប់កំហុសពីដៃគូនយោបាយម្ខាងទៀតដោយប្រើតុលាការជាបង្អែក៖ «ជំហានទីមួយនេះ គណបក្សសង្គ្រោះជាតិ បានពង្រឹងមន្ត្រីរបស់ខ្លួនឱ្យអនុវត្តច្បាប់ឱ្យបានហ្មត់ចត់ ឱ្យត្រឹមត្រូវ និងទីពីរឱ្យមានការប្រុងប្រយ័ត្នខ្ពស់»។
សកម្មភាពកោះហៅ និងសើរើរឿងចាស់របស់មន្ត្រីគណបក្សជំទាស់ពេលនេះ ក្រោយពេលការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ កន្លងទៅ លទ្ធផលបង្ហាញថា នៅខេត្តកំពង់ចាម គណបក្សសង្គ្រោះជាតិ ឈ្នះជាមេឃុំចំនួន ៧៤ឃុំ-សង្កាត់ ក្នុងចំណោមចំនួនឃុំ-សង្កាត់សរុបចំនួន ១០៩ គឺឈ្នះដាច់គណបក្សកាន់អំណាច និងស្របពេលអភិបាលខេត្តកំពង់ចាមថ្មី លោក គួច ចំរើន បានចូលមកដឹកនាំខេត្តមួយនេះ។
សមាជិកក្រុមប្រឹក្សាក្រុងកំពង់ចាម អ្នកស្រី គិន ស្រីអូន មិនបារម្ភចំពោះការកោះហៅទេ ព្រោះសកម្មភាពពួកគាត់ធ្វើកាលពីឆ្នាំ២០១៣ គឺដើម្បីស្វែងរកផលប្រយោជន៍ជូនកម្មករ ពោលគឺទាមទារប្រាក់ខែគោលចំនួន ១៦០ដុល្លារប៉ុណ្ណោះ មិនបានធ្វើខុសច្បាប់នោះទេ។ អ្នកស្រីថា នឹងចូលបំភ្លឺតាមការកោះហៅ ប្រសិនបើមានដីកានៅក្នុងដៃ៖ «ខ្ញុំចង់ឱ្យសំណុំរឿងហ្នឹង វាមិនមែនពាក់ព័ន្ធអីធ្ងន់ធ្ងរ ហើយវាបានកន្លងផុតទៅច្រើនឆ្នាំហើយ ខ្ញុំចង់ឱ្យខាងតុលាការ និងនិយោជកក្រុមហ៊ុនអីទម្លាក់ចោលសំណុំរឿងហ្នឹង»។
មន្ត្រីអង្កេតសមាគមអាដហុក (ADHOC) ខេត្តកំពង់ចាម លោក មាន ព្រហ្មមុនី ដែលបានតាមដានករណីទាំងនេះបញ្ជាក់ថា ពលរដ្ឋនឹងវាយតម្លៃលើបញ្ហាដែលកើតឡើងទៅលើមន្ត្រីគណបក្សប្រឆាំងថា ជារឿងនយោបាយ ឬជាបទល្មើសពិតប្រាកដ។ លោកយល់ថា ករណីទាំងនោះ គឺជាការគំរាមកំហែងដល់មន្ត្រីគណបក្សប្រឆាំង ដ្បិតរឿងខ្លះកើតឡើងតិចតួច ហើយអាចសម្របសម្រួលគ្នាក្រៅប្រព័ន្ធតុលាការបាន៖ «ប៉ុន្តែគំរាមកំហែងបែបហ្នឹង ខ្ញុំគិតថា វាមិនសូវមានប្រសិទ្ធភាពទេ ព្រោះឥឡូវនេះប្រជាពលរដ្ឋគាត់យល់អស់ហើយ»។
លោកយល់ថា ប្រសិនបើដំណើរការរឿងក្តីទាំងនេះនៅតែបន្ត ពលរដ្ឋទៅវិញទេដែលខាតប្រយោជន៍ ព្រោះមន្ត្រីរាជការដែលពួកគេបោះឆ្នោតគាំទ្រមិនបានបម្រើការងារពេញលេញជូនពួកគាត់។ បន្ថែមពីនេះ ធ្វើឱ្យប្រព័ន្ធតុលាការនៅតែរងការរិះគន់ និងបាត់បង់ជំនឿពីសាធារណជន ម្យ៉ាងបង្ហាញពីរូបភាពបែកបាក់ជាតិកាន់តែធ្ងន់ធ្ងរទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។