អនុប្រធានគណបក្សសង្គ្រោះជាតិ លោក កឹម សុខា ដែលចាត់ទុកការឃុំខ្លួនយុវជន ៣នាក់ និងកោះហៅមន្រ្តីគណបក្សអោយបំភ្លឺឡើងវិញ ថាជាការគំរាមកំហែងផ្នែកនយោបាយនោះ អះអាងថា គណបក្សលោកនឹងមិនចុះញ៉មចំពោះការគំរាមកំហែងនៅពេលនេះឡើយ។
លោកបន្តថា រាល់ការទាមទាររបស់គណបក្សនេះនឹងមិនមានការបន្ធូរបន្ថយទៀតទេ ដ្បិតអ្វីដែលគណបក្សសង្គ្រោះជាតិ ទាមទារជាកំរិតអប្បរមា ហើយមិនមែនជាការទាមទារដើម្បីប្រយោជន៍បក្សឡើយ គឺដើម្បីប្រយោជន៍ជាតិ៖ «សំឡេង»។
កន្លងទៅគណបក្សសង្គ្រោះជាតិ បានប្រកាន់យកលក្ខខណ្ឌចម្បងមួយ គឺការកែទម្រង់ស្ថាប័នរៀបចំការបោះឆ្នោតអោយឯករាជ្យ ជាថ្នូរនឹងការយល់ព្រមចូលសភារបស់អ្នកតំណាងរាស្ត្រជាប់ឆ្នោតនៃគណបក្សនេះទាំង ៥៥រូប។
ការអះអាងរបស់លោក កឹម សុខា គឺបន្ទាប់ពីយុវជនគណបក្សសង្គ្រោះជាតិ ៣រូប ត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស នៅរសៀលថ្ងៃទី២ ខែកក្កដា ដើម្បីរង់ចាំស៊ើបអង្កេត។ ពួកគេត្រូវចោទប្រកាន់ពីបទព្រហ្មទណ្ឌពាក់ព័ន្ធនឹងអំពើហិង្សានៅក្បែរទីលានប្រជាធិបតេយ្យកាលពីថ្ងៃទី១៥ ខែកក្កដា។
ចំណែកមន្ត្រីគណបក្សសង្គ្រោះជាតិចំនួន ៩នាក់ ក្នុងនោះមានលោក កឹម សុខា ផង ត្រូវបានសាលាដំបូងរាជធានីភ្នំពេញ កោះហៅឲ្យចូលខ្លួនទៅបំភ្លឺជាថ្មី ដើម្បីសាកសួរអំពីការដឹកនាំធ្វើបាតុកម្មកាលពីថ្ងៃទី១៥ សីហា។
យុវជនគណបក្សសង្គ្រោះជាតិទាំងបីរូប ត្រូវចោទប្រកាន់ពីបទចូលរួមកុបកម្ម បទហិង្សាដោយចេតនា និងប្រមាថមន្ត្រីរាជការ។
យុវជនទាំងរូបនោះរួមមានលោក លោក ឃិន ជំរឿន ប្រធានចលនាគណបក្ស លោក នាង សុឃុន ជាហិរញ្ញិកចលនាយុវជនគណបក្សសង្គ្រោះជាតិ ក្នុងខណ្ឌច្បារអំពៅ និងលោក សាន គឹមហេង ជាប្រធានចលនាយុវជនគណបក្សសង្គ្រោះជាតិ ខណ្ឌទួលគោក។ ពួកគេត្រូវនគរបាលចាប់ខ្លួនបន្តបន្ទាប់គ្នានៅថ្ងៃទី២ ខែសីហា និងត្រូវបញ្ជូនទៅស្នងការដ្ឋាននគរបាលរាជធានីភ្នំពេញ បន្ទាប់មកទៅតុលាការ និងចុងក្រោយត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃសរង់ចាំការសាកសួរ។
គណបក្សសង្គ្រោះជាតិ បានចេញសេចក្ដីថ្លែងការណ៍ភ្លាមៗនៅថ្ងៃដដែលនេះ ដោយថ្កោលទោសចំពោះការចាប់ខ្លួននេះ និងអំពាវនាវអោយដោះលែងអ្នកទាំងនោះដោយគ្មានលក្ខខណ្ឌ។ លើសពីនេះគណបក្សនេះបានបញ្ជាក់ទៅគណបក្សប្រជាជនអោយបញ្ឈប់ការគំរាមកំហែង។
អង្គការសង្គមស៊ីវិល ដែលឃ្លាំមើលចាត់ទុកករណីនេះថា ជាសម្ពាធនយោបាយទៅលើគណបក្សប្រឆាំងពីសំណាក់គណបក្សកាន់អំណាច ដើម្បីចាប់បង្ខំគណបក្សនេះអោយទទួលយកកិច្ចព្រមព្រៀងចូលសភា។ ពួកគេអំពាវនាវអោយគណបក្សទាំង២ ពិភាក្សាគ្នាដោយសន្តិវិធី ដើម្បីចៀសវាងបញ្ហាចម្រូងចម្រាសដែលអាចកើតឡើងក្នុងសង្គម។
ទាក់ទងនឹងករណីអំពើហិង្សានៅក្បែរទីលានប្រជាធិបតេយ្យកាលពីថ្ងៃទី១៥ កក្កដា បេក្ខជនតំណាងរាស្រ្តគណបក្សប្រឆាំង ៧នាក់ និងសកម្មជនម្នាក់ ដែលត្រូវរដ្ឋាភិបាលចាប់ឃុំខ្លួនចំនួន១សប្តាហ៍ដោយចោទប្រកាន់ពីបទដឹកនាំកុបកម្ម បទញុះញង់ឲ្យប្រព្រឹត្តបទឧក្រិដ្ឋ និងបទផ្ដើមគំនិតក្នុងអំពើហិង្សា ប៉ុន្តែត្រូវដោះលែងមកវិញនៅថ្ងៃទី២២ កក្កដា នៅក្រោយមានកិច្ចព្រមព្រាងបញ្ចប់ភាពជាប់គាំងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។