អនុប្រធានទី១នៃរដ្ឋសភា លោក កឹម សុខា ផ្ញើលិខិតមួយច្បាប់ជូនឯកអគ្គរដ្ឋទូតអូស្ត្រាលី នៅភ្នំពេញ ទាក់ទងនឹងកង្វល់របស់ពលរដ្ឋខ្មែរ ចំពោះការបញ្ជូនជនភៀសខ្លួនមកកម្ពុជា។
ក្នុងលិខិតចុះថ្ងៃទី២៧ តុលា លោក កឹម សុខា ជម្រាបជូនឯកអគ្គរដ្ឋទូតអូស្ត្រាលី គឺអ្នកស្រី អាលីសុន បួរ៉ូស (Alison Burrows) ថា កាលពីថ្ងៃទី២១ តុលា លោកបានជួបតំណាងព្រះសង្ឃ និស្សិត បញ្ញវន្ត និងពលរដ្ឋជាច្រើននាក់ ដែលបានធ្វើបាតុកម្មប្រឆាំងនឹងការបញ្ជូនជនភៀសខ្លួនពីកោះណូរូ (Nauru) មកកម្ពុជា។ ក្នុងឱកាសជួបគ្នា តំណាងទាំងនេះសម្ដែងការព្រួយបារម្ភអំពីផលអាក្រក់អាចកើតមាន ដែលបណ្ដាលមកពីស្ថានភាពសេដ្ឋកិច្ច និងសង្គម ជាពិសេស ការធានាការគោរព និងអនុវត្តសិទ្ធិមនុស្ស ដែលកម្ពុជា នៅមិនទាន់បានដោះស្រាយបាននៅឡើយ។
លោក កឹម សុខា បន្តថា ក្នុងនាមលោកជាអនុប្រធានទី១នៃរដ្ឋសភា លោកយល់ថា ការព្រួយបារម្ភរបស់អ្នកតំណាងទាំងនោះ គឺមានមូលដ្ឋានរឹងមាំ ស្របតាមស្ថានការណ៍អនុវត្តន៍ជាក់ស្ដែង។ លោកស្នើសុំដល់ឯកអគ្គរដ្ឋទូត និងរដ្ឋាភិបាលអូស្ត្រាលី ឱ្យពិចារណាឡើងវិញអំពីការបញ្ជូនជនភៀសខ្លួននេះ។
លិខិតរបស់ លោក កឹម សុខា ធ្វើឡើងក្នុងរយៈពេលមួយខែបន្ទាប់ពីពលរដ្ឋខ្មែរជាង ១០០នាក់ រួមទាំងព្រះសង្ឃផង ដាក់ញត្តិជូនស្ថានទូតអូស្ត្រាលី ដែលសុំឲ្យរដ្ឋាភិបាលអូស្ត្រាលី ឈប់រំលោភសិទ្ធិមនុស្ស និងរើសអើងជាតិសាសន៍ ហើយពលរដ្ឋខ្មែរទាំងនោះប្រឆាំងការបញ្ជូន និងទទួលជនភៀសខ្លួនចូលមកទឹកដីកម្ពុជា។
វិទ្យុអាស៊ីសេរី មិនទាន់បានទទួលការឆ្លើយតបពីស្ថានទូតអូស្ត្រាលី ចំពោះលិខិតរបស់ លោក កឹម សុខា នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។