ប្រធានស្ដីទីគណបក្សសង្គ្រោះជាតិ លោក កឹម សុខា ចាប់ផ្ដើមសរសើររដ្ឋាភិបាលរបស់លោក ហ៊ុន សែន ក្រោយទទួលបានការលើកលែងទោស និងស្របដែលពេលស្ថានការណ៍នយោបាយចាប់ផ្ដើមថយកម្ដៅ។ លោកកោតសរសើរថា រដ្ឋាភិបាលកំពុងដើរលើផ្លូវត្រូវក្នុងវិស័យកីឡា។ ចំណែកបក្សកាន់អំណាចដែលទទួលបានការសរសើរ មិនបង្ហាញការភ្ញាក់ផ្អើលទេ ដោយគ្រាន់តែយល់ថា លោក កឹម សុខា ចាប់ផ្ដើមនិយាយការពិត។
ជាសារកម្ររបស់ប្រមុខបក្សឆាំងដែលតែធ្លាប់តែរិះគន់រដ្ឋាភិបាលគ្រប់វេទិកានោះ បែរជាចាប់ផ្ដើមប្រាប់អ្នកគាំទ្ររបស់ខ្លួនថា រដ្ឋាភិបាលរបស់លោក ហ៊ុន សែន មិនមែនធ្វើអ្វីមិនបាននោះទេ៖ «បងប្អូនឃើញទេ វិស័យកីឡាជឿនលឿន មិនមែនថារដ្ឋាភិបាលអត់ធ្វើអីបានទាំងអស់ទេ បងប្អូនឃើញអ៊ីចឹងទេ វិស័យកីឡាជឿនលឿន ខ្មែរយើងទៅយកមេដាយមាស មេដាយសំខាន់ ហើយកីឡានេះហើយជាកិត្តិយសរបស់ជាតិយើង ប៉ុន្តែការរំលោភសិទ្ធិមនុស្សជាការបង្អាប់ប្រទេសជាតិ វាបញ្ច្រាសទិសគ្នាអ៊ីចឹងណា! រដ្ឋាភិបាលកំពុងដើរលើផ្លូវត្រូវលើវិស័យកីឡា យើងសុំចូលរួមអបអរសាទរ»។
លោក កឹម សុខា ថ្លែងបែបនេះ ក្នុងទិវាសិទ្ធិមនុស្ស ១០ ធ្នូ ដែលគណបក្សសង្គ្រោះជាតិ ប្រារព្ធនៅទីស្នាក់ការកណ្ដាលរបស់ខ្លួន កាលពីព្រឹកថ្ងៃទី១០ ខែធ្នូ ដែលមានអ្នកចូលរួមប្រមាណ ៥០០នាក់។ សារនយោបាយរបស់លោក កឹម សុខា បែបនេះ ស្របពេលដែលលោក ហ៊ុន សែន និងលោក កឹម សុខា ចាប់ផ្ដើមចាប់ដៃគ្នាឡើងវិញដើម្បីបញ្ចប់ជម្លោះរវាងគណបក្សទាំងពីរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឆ្លើយតបចំពោះពាក្យសរសើររបស់ប្រមុខគណបក្សប្រឆាំងនៅពេលនេះថា នេះជាការនិយាយការពិតដែលខុសពីមុនបក្សប្រឆាំងតែងនិយាយខុសពីការពិត។ លោកយល់ថា ប្រសាសន៍របស់លោក កឹម សុខា នៅពេលនេះ គឺកាន់តែជំរុញស្ថានការណ៍នយោបាយកាន់តែមានភាពល្អប្រសើរថែមទៀត៖ «គាត់ធ្លាប់តែនិយាយផ្ទុយពីការពិតតែពេលនេះ មានការសម្របសម្រួលនយោបាយ ក្រោយពេលតុលាការបញ្ចប់នីតិវិធីនេះហើយ យើងឃើញថា សភាពការណ៍ល្អ ហើយសភាពការណ៍ល្អនេះហើយធ្វើឲ្យគាត់ (លោក កឹម សុខា) និយាយពីសច្ចធម៌»។
ទាក់ទងស្ថានការណ៍នយោបាយនេះដែរ គេឃើញចាប់ផ្ដើមមានសេរីភាពឡើងវិញរហូតចេញពីទីស្នាក់ការបក្សទៅចូលរួមប្រជុំសភា និងទៅសួសុខអ្នកទោសនៅពន្ធនាគារ ក្រោយព្រះមហាក្សត្រព្រះរាជប្រទានការលើកលែងទោសតាមសំណើលោក ហ៊ុន សែន។ បន្ទាប់មកទៀត មេឃុំបក្សប្រឆាំងមកពីខេត្តកំពង់ចាម លោក ស៊ាង ចែត ត្រូវបានដោះលែង ដែលតុលាការទើបតែផ្ដន្ទាទោសដាក់គុក ៥ឆ្នាំ តាមរយៈការរាជប្រទានលើកលែងទោសពីព្រះមហាក្សត្រដែរ។
អ្នកឃ្លាំមើលស្ថានការណ៍នយោបាយវិញម្ដង លោកបណ្ឌិត មាស នី អ្នកសិក្សាការអភិវឌ្ឍសង្គមយល់ថា អ្នកនយោបាយទាំងពីរគណបក្សកំពុងផ្ដល់ភាពកក់ក្ដៅឲ្យគ្នាទៅវិញទៅមក។ ប៉ុន្តែលោកយល់ថា គណបក្សសង្គ្រោះជាតិក៏ត្រូវតម្រង់ទិសដៅខ្លួនឯងច្បាស់លាស់ឃើញថាល្អ ឃើញខុសរិះគន់ដោយមានភស្តុតាងមកបញ្ជាក់ផង៖ «ខ្ញុំគិតថា នេះជាច្រកមួយយដែរសម្រាប់ឲ្យអ្នកនយោបាយមានទំនុកចិត្តគ្នា ឬភាពកក់ក្ដៅឲ្យគ្នាទៅវិញទៅមក ព្រោះអីនៅស្រុកយើងខ្ញុំសង្កេតឃើញថា ការដើរនៅលើផ្លូវមួយដែលក្ដៅរៀងៗខ្លួនវាហាក់ដូចជាមិនបានចេញទៅណារួចទេ»។
ក្រោយពេលលោក ហ៊ុន សែន ប្រកាសថា ដៃគូសន្ទនារបស់លោក គឺលោក កឹម សុខា មិនមែនលោក សម រង្ស៊ី ក្នុងពេលប្រជុំសភាកាលពីពេលថ្មីៗនេះ រដ្ឋមន្ត្រីក្រសួងមហាផ្ទៃ លោក ស ខេង ដែលជាអនុប្រធានគណបក្សប្រជាជនកម្ពុជា ប្រាប់ក្រុមអ្នកសារព័ត៌មានថា មន្ត្រីសមាគមអាដហុក និងមន្ត្រីជាន់ខ្ពស់ គ.ជ.ប លោក នី ចរិយា នឹងលើកទៅពិភាក្សានៅចុងខែធ្នូ ខាងមុខ ក្រោយការដោះលែងលោកមេឃុំ ស៊ាង ចែត។ ចំណែកលោក កឹម សុខា បដិសេធធ្វើអត្ថាធិប្បាយទាក់ទងរឿងនេះ ពេលមានក្រុមអ្នកកាសែតស្កាត់សួររកលោកក្នុងពេលប្រារព្ធទិវា សិទ្ធិមនុស្ស ១០ ធ្នូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។