ខ្មែរ​អាមេរិកាំង​បាតុកម្ម​ទាមទារ​កម្ពុជា​ឲ្យ​មាន​ការ​បោះឆ្នោត​ដោយ​សេរី

គណបក្ស​សង្គ្រោះ​ជាតិ នៅ​សហរដ្ឋ​អាមេរិក និង កាណាដា ប្រមូល​ផ្តុំ​គ្នា​ធ្វើ​បាតុកម្ម​ទាមទារ​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា។ ពលរដ្ឋ​ខ្មែរ​នៅ​សហរដ្ឋ​អាមេរិក អាមេរិកាំង នៅ​តំបន់​វ៉ាស៊ីនតោន ឌីស៊ី នៅ​ថ្ងៃ​សុក្រ បាន​ប្រមូល​ផ្តុំ​គ្នា​នៅ​មុខ​សេតវិមាន សម្ដែង​ការ​គាំទ្រ​ដល់​រដ្ឋាភិបាល​អាមេរិក និង កាណាដា ដែល​បាន​ដាក់​សម្ពាធ​រដ្ឋាភិបាល​ក្រុង​ភ្នំពេញ ឲ្យ​មាន​ការ​បោះឆ្នោត​ដោយ​សេរី និង​យុត្តិធម៌។
ដោយ យន់ សាមៀន
2013-07-12
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ខ្មែរ​អាមេរិកាំង និង​ក្រុម​ជនជាតិ​ដើម​ភាគ​តិច​ប្រមាណ ១​ពាន់​នាក់ មក​ពី​បណ្ដា​រដ្ឋ​ផ្សេងៗ​នៅ​សហរដ្ឋ​អាមេរិក កាល​ពី​ថ្ងៃ​សុក្រ បាន​ប្រមូល​ផ្តុំ​គ្នា​នៅ​មុខ​សេតវិមាន នៅ​រដ្ឋធានី​វ៉ាស៊ីនតោន ទាមទារ​ឲ្យ​រដ្ឋាភិបាល​សហរដ្ឋ​អាមេរិក ឲ្យ​ដាក់​សម្ពាធ​លើ​រដ្ឋាភិបាល​កម្ពុជា ដើម្បី​ឲ្យ​មាន​ការ​រៀបចំ​ការ​បោះឆ្នោត​ដោយ​សេរី និង​យុត្តិធម៌ និង​មាន​ការ​ផ្លាស់​ប្ដូរ​មេ​ដឹកនាំ។

អ្នក​តវ៉ា និង​ព្រះសង្ឃ​ភាគ​ច្រើន​ជា​អ្នក​គាំទ្រ​គណបក្ស​សង្គ្រោះ​ជាតិ បាន​ស្នើសុំ​ឲ្យ​សហរដ្ឋ​អាមេរិក ជួយ​ជំរុញ​អោយ​មាន​ការ​ធ្វើ​កំណែ​ទម្រង់​គណៈកម្មាធិការ​ជាតិ​រៀបចំ​ការ​បោះឆ្នោត និង​ផ្លាស់​ប្ដូរ​មេ​ដឹកនាំ​កម្ពុជា។

ញត្តិ​អ្នក​តវ៉ា បាន​ដាក់​ឲ្យ​ប្រធានាធិបតី​សហរដ្ឋ​អាមេរិក លោក បារ៉ាក់ អូបាម៉ា (Barack Obama) ស្នើសុំ​ឲ្យ​សហរដ្ឋ​អាមេរិក ដាក់​គំនាប​រដ្ឋាភិបាល​កម្ពុជា ឲ្យ​រៀបចំ​ការ​បោះឆ្នោត​ដោយ​សេរី និង​ត្រឹមត្រូវ ដោយ​ធ្វើ​កំណែ​ទម្រង់​សមាសភាព​គណៈកម្មការ​រៀបចំ​ការ​បោះឆ្នោត កែប្រែ​បញ្ជី​ឈ្មោះ​បោះឆ្នោត ធានា​សុវត្ថិភាព លោក សម រង្ស៊ី ប្រធាន​គណបក្ស​សង្គ្រោះ​ជាតិ នៅ​ពេល​វិល​ត្រឡប់​ទៅ​កម្ពុជា វិញ និង​អនុញ្ញាត​ឲ្យ​លោក​ចូលរួម​ការ​បោះឆ្នោត។ ញត្តិ​ក៏​ទាមទារ​ឲ្យ​បញ្ឈប់​លោក​នាយក​រដ្ឋមន្ត្រី ហ៊ុន សែន គំរាម​កំហែង​អ្នក​បោះឆ្នោត និង​ផ្តល់​អភ័យ​ឯកសិទ្ធិ​ឲ្យ​អ្នក​តំណាង​រាស្ត្រ ២៩​រូប ដែល​ត្រូវ​បាន​បណ្ដេញ​ចេញ​ពី​រដ្ឋសភា។

ញត្តិ​បន្ត​ទៀត​ថា ប្រសិន​បើ​រដ្ឋាភិបាល​កម្ពុជា មិន​អនុវត្ត​តាម​សំណើ​នេះ​ទេ សហរដ្ឋ​អាមេរិក ត្រូវ​តែ​កុំ​ទទួល​ស្គាល់​លទ្ធផល​បោះឆ្នោត និង​ផ្តាច់​ជំនួយ​ជា​បន្ទាន់​នៅ​កម្ពុជា។

តំណាង​សេតវិមាន បាន​ទទួល​យក​ញត្តិ​របស់​ពលរដ្ឋ​ខ្មែរ​អាមេរិក ឲ្យ​ប្រធានាធិបតី ប៉ុន្តែ​នៅ​មិន​ទាន់​មាន​ការ​សន្យា​ណា​មួយ​ឡើយ។

បាតុកម្ម​នៅ​មុខ​សេតវិមាន កាល​ពី​ថ្ងៃ​សុក្រ មាន​ការ​ប្រមូល​ផ្តុំ​ធំ​មួយ​របស់​ពលរដ្ឋ​អាមេរិកាំង សម្ដែង​ការ​គាំទ្រ​គណបក្ស​សង្គ្រោះ​ជាតិ។

ព្រះមហាក្សត្រ ព្រះបាទ នរោត្តម សីហមុនី បាន​ព្រះរាជទាន​លើក​លែង​ទោស​ប្រធាន​គណបក្ស​សង្គ្រោះ​ជាតិ លោក សម រង្ស៊ី កាល​ពី​ថ្ងៃ​សុក្រ ទី១២ ខែ​កក្កដា នេះ។

ព្រះមហាក្សត្រ​ទ្រង់​បាន​ឡាយព្រះហស្តលេខា​លើក​លែង​ទោស លោក សម រង្ស៊ី ដែល​ត្រូវ​តុលាការ​កាត់​ទោស​ឲ្យ​ជាប់​ពន្ធនាគារ​រយៈពេល​ប្រមាណ ១២​ឆ្នាំ ពី​បទ​បរិហារកេរ្តិ៍ និង​ក្លែង​បន្លំ​ឯកសារ ប៉ុន្តែ​សហគមន៍​ជាតិ និង​អន្តរជាតិ ចាត់​ទុក​ថា ការ​កាត់​ទោស​នេះ​មាន​និន្នាការ​នយោបាយ​រំខាន​គណបក្ស​ប្រឆាំង​រៀបចំ​ការ​បោះឆ្នោត​ថ្ងៃ​ទី២៨ ខែ​កក្កដា ឆ្នាំ​២០១៣។ ព្រះរាជក្រឹត្យ​ព្រះមហាក្សត្រ សរសេរ​ថា លោក​នាយក​រដ្ឋមន្ត្រី ហ៊ុន សែន ជា​អ្នក​ស្នើ​ឲ្យ​មាន​ការ​លើក​លែង​ទោស។

លិខិត​លោក ហ៊ុន សែន ថ្វាយ​ព្រះមហាក្សត្រ នៅ​ថ្ងៃ​សុក្រ ទី១២ ឲ្យ​ដឹង​ថា លោក​ស្នើសុំ​ព្រះមហាក្សត្រ​លើក​លែង​ទោស​លោក សម រង្ស៊ី តាម​ស្មារតី​បង្រួបបង្រួម​ជាតិ ការ​ផ្សះផ្សា​ជាតិ និង​ដើម្បី​ឲ្យ​ការ​បោះឆ្នោត​ជ្រើស​រើស​តំណាង​រាស្ត្រ​នីតិកាល​ទី៥ ប្រព្រឹត្ត​ទៅ​តាម​គោលការណ៍​លទ្ធិប្រជាធិបតេយ្យ សេរី​ពហុបក្ស ដោយ​មាន​គ្រប់​ភាគី​ពាក់ព័ន្ធ​ចូលរួម។

អគ្គលេខាធិការ​គណៈកម្មាធិការ​ជាតិ​រៀបចំ​ការ​បោះឆ្នោត លោក ទេព នីថា មាន​ប្រសាសន៍​ថា បើ​ទោះ​បី​ជា​ព្រះមហាក្សត្រ​ប្រទាន​លើក​លែង​ទោស លោក សម រង្ស៊ី ក៏ដោយ ប៉ុន្តែ លោក សម រង្ស៊ី គ្មាន​សិទ្ធិ​បោះឆ្នោត និង​ឈរ​ជា​បេក្ខជន​តំណាង​រាស្ត្រ​បាន។

លោក សម រង្ស៊ី មាន​ប្រសាសន៍​ពី​ប្រទេស​បារាំង ថា លោក​នឹង​វិល​ត្រឡប់​ទៅ​កម្ពុជា វិញ នៅ​សប្ដាហ៍​ក្រោយ ប៉ុន្តែ​មិន​ទាន់​មាន​កំណត់​ថ្ងៃ​នៅ​ឡើយ ដោយសារ​តែ​រង់ចាំ​លិខិត​ធ្វើ​ដំណើរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល