គណបក្សខ្មែរឈប់ក្រ នៅថ្ងៃទី៩ សីហា បានចេញសេចក្ដីប្រកាសជាសាធារណៈមួយ បដិសេធលទ្ធផលបណ្ដោះអាសន្នរបស់គណៈកម្មាធិការជាតិរៀបចំការបោះឆ្នោត (គ.ជ.ប) និងបានអំពាវនាវឲ្យសើរើគណៈកម្មាធិការជាតិរៀបចំការបោះឆ្នោតជាថ្មី និងរៀបចំការបោះឆ្នោតម្ដងទៀត ក្រោមហេតុផលថា ការបោះឆ្នោតគ្មានតម្លាភាព សេរី និងយុត្តិធម៌។
ក្នុងសេចក្ដីប្រកាសនោះ ប្រធានគណបក្សខ្មែរឈប់ក្រ លោក ក្រវ៉ាញ ដារ៉ន បានបញ្ជាក់ថា ការបោះឆ្នោតឡើងវិញត្រូវធ្វើឡើងក្រោមការគ្រប់គ្រងរបស់អង្គការសហប្រជាជាតិ សហរដ្ឋអាមេរិក សហភាពអឺរ៉ុប ព្រមទាំងអង្គការជាតិ និងអន្តរជាតិដទៃទៀត។ លោកក៏បានលើកឡើងពីករណីមិនប្រក្រតីជាច្រើន ដែលគណបក្សនេះបានរកឃើញ រួមមានភាពមិនប្រក្រតីទាំងមុនពេលបោះឆ្នោត និងក្នុងថ្ងៃបោះឆ្នោត។
គណបក្សខ្មែរឈប់ក្រ បានរកឃើញថា ក្នុងអំឡុងពេលឃោសនាបោះឆ្នោត គណបក្សប្រជាជនកម្ពុជា បានរំលោភច្បាប់បោះឆ្នោត ដោយប្រើប្រាស់ធនធានរបស់រដ្ឋទៅធ្វើការឃោសនាបម្រើផលប្រយោជន៍របស់គណបក្សខ្លួន និងចាប់ផ្ដើមការឃោសនាមុនពេលច្បាប់របស់ គ.ជ.ប កំណត់ ថែមទាំងបានកាត់ប្រាក់ខែរបស់បុគ្គលិករដ្ឋមួយចំនួន ដើម្បីយកទៅចំណាយសម្រាប់ការឃោសនាទៀតផង។
លោក ក្រវ៉ាញ ដារ៉ន លើកឡើងថា ក្នុងអំឡុងពេលបោះឆ្នោត ស្លាកសញ្ញា និងរូបថតជាច្រើនរបស់គណបក្សលោក ត្រូវបានជនមិនស្គាល់មុខបំផ្លាញចោល ហើយលោកនាយករដ្ឋមន្ត្រី ហ៊ុន សែន បានគំរាមកំហែង និងបំភិតបំភ័យប្រជាពលរដ្ឋថា នឹងមានសង្គ្រាមបើលោកចាញ់ឆ្នោត។
គណបក្សនេះបានរកឃើញភាពមិនប្រក្រតីជាច្រើនទៀត ដែលកើតមាននៅថ្ងៃបោះឆ្នោត ដូចជា ការបន្លំសន្លឹកឆ្នោត ការទិញដូរសន្លឹកឆ្នោត ការបាត់បង់សិទ្ធិបោះឆ្នោត ទឹកខ្មៅអាចលាងជ្រះ ការរាប់សន្លឹកឆ្នោតដោយសម្ងាត់ ការបង្កភាពងាយស្រួលដល់ជនជាតិវៀតណាម រាប់ម៉ឺននាក់ ឲ្យមានសិទ្ធិបោះឆ្នោត និងករណីមានឈ្មោះស្ទួនជាដើម។
សេចក្ដីប្រកាសរបស់គណបក្សខ្មែរឈប់ក្រ ក៏បានលើកឡើងដែរនូវរបាយការណ៍របស់វិទ្យាស្ថានជាតិប្រជាធិបតេយ្យ (NDI) ដែលរកឃើញថា ប្រជាពលរដ្ឋខ្មែរប្រមាណ ១លាន ៦សែននាក់ បានបាត់ឈ្មោះពីបញ្ជីបោះឆ្នោត។
ជំហររបស់គណបក្សខ្មែរឈប់ក្រ មិនខុសពីគណបក្សសង្គ្រោះជាតិ ដែលកំពុងស្នើឲ្យអង្គការសហប្រជាជាតិ បញ្ជូនអ្នកជំនាញមកស៊ើបអង្កេតភាពមិនប្រក្រតីនៃការបោះឆ្នោតនោះឡើយ ប៉ុន្តែគណបក្សខ្មែរឈប់ក្រ មិនសម្ដែងពីឆន្ទៈរបស់ខ្លួនក្នុងការចូលរួមធ្វើមហាបាតុកម្មច្រានចោលលទ្ធផលបោះឆ្នោតជាមួយគណបក្សសង្គ្រោះជាតិ នោះទេ។ នេះបើតាមការឲ្យដឹងពីអគ្គលេខាធិការរងគណបក្សខ្មែរឈប់ក្រ លោក ស៊ូ បុត្រា៖ «គណបក្សខ្មែរឈប់ក្រ យើងគឺថាឯករាជ្យ អព្យាក្រឹត្យ បាទ! ហើយយើងជាគណបក្សមួយដែលស្អាតស្អំ ហើយដែលយើងចេញពីសហរដ្ឋអាមេរិក មានន័យថា យើងអត់អាចចូលរួមគ្នាជាមួយនឹងខាងសង្គ្រោះជាតិ បានទេបាទ»។
លោក ស៊ូ បុត្រា បានឲ្យដឹងថា គណបក្សលោកនឹងធ្វើកូដកម្មមួយនៅថ្ងៃទី១១ សីហា នៅទីលានប្រជាធិបតេយ្យក្នុងគោលបំណងបង្ហាញពីភាពអយុត្តិធម៌ក្នុងការបោះឆ្នោត ដើម្បីអំពាវនាវឲ្យអង្គការសហប្រជាជាតិ និងសហគមន៍អន្តរជាតិជួយរកដំណោះស្រាយ។
មានគណបក្សចំនួន ៣ ហើយ ដែលប្រកាសមិនទទួលស្គាល់លទ្ធផលបណ្ដោះអាសន្នរបស់ គ.ជ.ប រួមមានគណបក្សសង្គ្រោះជាតិ គណបក្សហ៊្វុនស៊ិនប៉ិច និងគណបក្សខ្មែរឈប់ក្រ។ ប៉ុន្តែ គម្រោងបង្កើតគណៈកម្មការចម្រុះស៊ើបអង្កេតភាពមិនប្រក្រតីនៃការបោះឆ្នោត មានសមាសភាពរបស់គណបក្សនយោបាយតែ២ប៉ុណ្ណោះ ដែលទទួលបានអាសនៈក្នុងសភា គឺគណបក្សប្រជាជនកម្ពុជា និងគណបក្សសង្គ្រោះជាតិ។
លោក ទេព នីថា អគ្គលេខាធិការ គ.ជ.ប បានឆ្លើយតបនឹងការតវ៉ារបស់គណបក្សនយោបាយទាំងនោះថា នេះជាសិទ្ធិរបស់ពួកគេក្នុងការប្រកាសមិនទទួលយកលទ្ធផលបណ្ដោះអាសន្ន ហើយ គ.ជ.ប នឹងដោះស្រាយពាក្យបណ្ដឹងរបស់គណបក្សទាំងអស់៖ «ករណីដែលថាប្រកាសមិនទទួលស្គាល់ អាហ្នឹងវាគ្រាន់តែជាការថ្លែងរបស់គាត់ផ្ទាល់ គាត់មានសិទ្ធិនឹងធ្វើសេចក្តីថ្លែងការណ៍អ៊ីចឹង ដែល គ.ជ.ប យើងដោះស្រាយតែបណ្ដឹងទេបាទ»។
លោក ទេព នីថា បានឲ្យដឹងថា បច្ចុប្បន្នដំណើរការស៊ើបអង្កេតភាពមិនប្រក្រតីមិនទាន់ចប់ស្រេចបាច់នៅឡើយទេ ដូច្នេះការប្រកាសលទ្ធផលបណ្ដោះអាសន្ននៃការបោះឆ្នោត នឹងត្រូវពន្យារពេល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។