នៅក្នុងថ្ងៃទី៤ នៃការតវ៉ារបស់ខ្មែរកម្ពុជាក្រោម នៅមុខស្ថានទូតវៀតណាម គឺនៅតែមិនទទួលលទ្ធផលដូចការចង់បាន។ កម្លាំងសន្តិសុខកម្ពុជា បានរាយកម្លាំងការពារស្ថានទូតវៀតណាម យ៉ាងតឹងរ៉ឹង មិនឲ្យក្រុមបាតុករដឹកនាំដោយ លោក ថាច់ សេដ្ឋា ចូលទៅក្នុងស្ថានទូតបានទេ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ថ្លែងទៅកាន់អ្នកចូលរួមស្តាប់នៅមុខស្ថានទូតវៀតណាម ថា ក្នុងរយៈពេលពីរថ្ងៃកន្លងមកនេះ ក្រុមអ្នកតវ៉ាបានដើរដាក់ញត្តិតាមស្ថានទូតនានា ទីស្ដីការគណៈរដ្ឋមន្ត្រី រដ្ឋសភា ការិយាល័យឧត្ដមស្នងការអង្គការសហប្រជាជាតិ ហើយគ្រប់ស្ថាប័នទាំងនោះទទួលយកញត្តិដោយរីករាយ។
លោកបន្តថា ដោយឡែកអ្នកតំណាងរាស្ត្រ សន្យានឹងស្នើសុំឲ្យក្រសួងអប់រំ យុវជន និងកីឡា រៀបចំការបង្រៀនប្រវត្តិសាស្ត្រខ្មែរឡើងវិញឲ្យបានគ្រប់ជ្រុងជ្រោយ ហើយសន្យាកោះហៅ លោក ហោ ណាំហុង បំភ្លឺពាក់ព័ន្ធនឹងអ្នកនាំពាក្យស្ថានទូតវៀតណាម លោក ត្រឹង វ៉ាំង ថុង ដែលនិយាយខុសការពិតនៃប្រវត្តិសាស្ត្រអំពីទឹកដីកម្ពុជាក្រោម៖ «ឥឡូវនេះ យើងមក៤ថ្ងៃហើយមកដល់កន្លែងនេះ ក៏ប៉ុន្តែយួន នៅតែស្ងៀមស្ងាត់មិនមាត់មិនកអីទាំងអស់ ក៏ប៉ុន្តែការស្ងាត់នេះមិនប្រាកដថាសុខទេ ពេលខ្លះចុកឈាមស្ទើរតែបែកទ្រូងក៏មិនដឹងទេ»។
លោកបញ្ជាក់ដែរថា ការដាក់ញត្តិនៅការិយាល័យឧត្ដមស្នងការអង្គការសហប្រជាជាតិ ដើម្បីស្នើសុំឲ្យបញ្ជាក់មូលហេតុ ដែលអង្គការសហប្រជាជាតិ បានទទួលស្គាល់ថា ទឹកដីកម្ពុជាក្រោម ជារបស់វៀតណាម៖ «ពីព្រោះថា មេដឹកនាំខ្មែរគ្រប់ជំនាន់អត់មានមេដឹកនាំណាម្នាក់ ព្រះមហាក្សត្រណាម្នាក់ ដែលបានកាត់ទឹកដីនោះទៅឲ្យវៀតណាម ទេ។ ដូច្នេះហើយ យើងខ្ញុំសុំឲ្យអគ្គលេខាអង្គការសហប្រជាជាតិ លោកបញ្ជាក់ឲ្យបានច្បាស់លាស់ ហើយជាពិសេស ថ្មីៗនេះដោយសារមានការបំភ្លៃបំផ្លើសប្រវត្តិសាស្ត្រពីសំណាក់ខាងរដ្ឋាភិបាលយួន ដែលថាទឹកដីកម្ពុជាក្រោម ថាជាទឹកដីរបស់យួន តាំងពីដើមមកនោះ»។
លោក ថាច់ សេដ្ឋា បន្ថែមថា ខ្មែរកម្ពុជាក្រោម បានដាក់ញត្តិថ្វាយព្រះមហាក្សត្រអំពីទឹកដីកម្ពុជាក្រោម គឺវៀតណាម បង្រៀនកូនចៅគេថា ស្ដេចខ្មែរបានប្រគល់ដីកម្ពុជាក្រោមឲ្យវៀតណាម ប៉ុន្តែព្រះមហាក្សត្រទ្រង់ផ្ញើព្រះរាជសារតបមកសហគមន៍ខ្មែរកម្ពុជាក្រោមថា ស្ដេចគ្រប់ជំនាន់មិនដែលកាត់ទឹកដីកម្ពុជាណាប្រគល់ឲ្យប្រទេសណាមួយឡើយ។
បាតុករឲ្យដឹងថា ទឹកដីកម្ពុជាក្រោម ត្រូវបារាំង ដែលធ្វើអាណានិគមលើខ្មែរ កាត់ទឹកដីកម្ពុជាក្រោម ឲ្យវៀតណាម នៅឆ្នាំ១៩៤៩៖ «គឺនៅឆ្នាំ១៩៤៩ នៅថ្ងៃទី៤ ខែ៦ ថ្មីៗនេះទេ គឺហូជីមិញ ដែលជាមេរបស់ ត្រឹង វ៉ាំង ថុង វាបាននិយាយថា ទឹកដីនេះជាទឹកដីរបស់វាតាំងពីដូនតាពីមុនមក។ តើបងប្អូនទទួលឬអត់ទេ? គឺអត់ទេ ការនិយាយនេះ គឺបំភ្លៃប្រវត្តិសាស្ត្រយ៉ាងពិតប្រាកដ។ ហេតុដូច្នេះនៅក្នុងនាមជាកុលបុត្រខ្មែរអង្គរ ត្រូវតែប្រឆាំងតវ៉ាទៅឲ្យ ត្រឹង វ៉ាំង ថុង ក៏ដូចជារដ្ឋាភិបាលយួន ត្រូវតែដោះស្រាយមកសារភាពចំពោះមុខប្រជារាស្ត្រខ្មែរជាសាធារណៈ»។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា ការអនុញ្ញាតឲ្យខ្មែរកម្ពុជាក្រោម ធ្វើបាតុកម្ម៤ថ្ងៃមកនេះ ធ្វើឲ្យពលរដ្ឋរអ៊ូបញ្ហាកកស្ទះចរាចរណ៍នៅម្តុំស្ថានទូតវៀតណាម។ លោកថា សាលារាជធានីភ្នំពេញ បានកោះហៅឲ្យថ្នាក់ដឹកនាំបាតុកម្ម មិនឲ្យដើរហែក្បួននៅថ្ងៃទី៨ តុលា តែអនុញ្ញាតឲ្យប្រារព្ធពិធីក្នុងទីលានប្រជាធិបតេយ្យ។
នៅក្នុងបាតុកម្មទាមទារឲ្យស្ថានទូតវៀតណាម សុំទោសជាសាធារណៈពីប្រវត្តិទឹកដីកម្ពុជាក្រោម នៅថ្ងៃទី៤នេះ មានមនុស្សចូលរួមថ្មើរជើង និងជិះម៉ូតូប្រមាណ ៤០០នាក់និងអង្គ ដោយមិនមានការស្ទាក់ឃាត់បង្អាក់ដំណើរពីសំណាក់អាជ្ញាធរឡើយ។ បាតុករបានរំសាយនៅម៉ោង៤កន្លះល្ងាច ថ្ងៃទី៧ ខែតុលា ហើយអះអាងតវ៉ាបញ្ចប់ការទាមទាររបស់ខ្លួន នៅថ្ងៃទី៨ ខែតុលា ដោយពួកគេសន្យាជួបជុំគ្នានៅទីលានប្រជាធិបតេយ្យ និងធ្វើការបួងសួងនៅមាត់ទន្លេមុខព្រះបរមរាជវាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។