ព្រះសង្ឃ ពលរដ្ឋ និងយុវជនប្រមាណ ៣០០អង្គ និងនាក់ នាំគ្នារៀបចំវេទិការំឭកអំពីប្រវត្តិនៃការបាត់បង់ទឹកដីកម្ពុជាក្រោម និងការអនុវត្តច្បាប់អន្តោប្រវេសន៍នៅកម្ពុជា។ មតិរបស់អ្នកចូលរួមភាគច្រើន ផ្ដោតជនជាតិវៀតណាម នៅកម្ពុជា។
បញ្ហាទឹកដីកម្ពុជាក្រោម ត្រូវបានលើកឡើងនៅក្នុងវេទិកាសម្ដែងមតិមួយ នាទីលានប្រជាធិបតេយ្យ នៅថ្ងៃទី៦ កញ្ញា។ ក្រៅពីការរៀបរាប់អំពីប្រវត្តិនៃការបាត់បង់ទឹកដីកម្ពុជាក្រោម ដែលត្រូវបាត់បង់ទៅក្នុងការគ្រប់គ្រងរបស់វៀតណាម អ្នកចូលរួមក៏ព្រួយបារម្ភអំពីបញ្ហាហូរចូលមិនដាច់របស់ជនអន្តោប្រវេសន៍វៀតណាម មកក្នុងទឹកដីកម្ពុជា បច្ចុប្បន្នដែរ។
ថ្លែងបើកវេទិកាសម្ដែងមតិ ឧត្ដមទីប្រឹក្សាព្រះមហាក្សត្រ និងជាប្រធានក្រុមប្រឹក្សាភិបាលសហគមន៍ខ្មែរកម្ពុជាក្រោម គឺលោក សឺន ស៊ូប៊ែរ្តិ៍ ថាបញ្ហាហូរចូលជនអន្តោប្រវេសន៍មកកម្ពុជា បច្ចុប្បន្ន គឺដោយសារតែមន្ត្រីរាជការខ្មែរខ្វះឆន្ទៈស្នេហាជាតិ និងពុករលួយ៖ «ទាក់ទងនឹងមន្ត្រីរាជការយើងដែរ ខ្វះឆន្ទៈស្នេហាជាតិ ហើយបោះបង់ចោលប្រយោជន៍ និងសុវត្ថិភាពជាតិ ដោយលង់ចូលទៅក្នុងអំពើពុករលួយ ដូចជាជួយចុះអត្តសញ្ញាណប័ណ្ណសញ្ជាតិខ្មែរឱ្យទៅជនជាតិបរទេស ជាពិសេសជនជាតិវៀតណាម ក្នុងកម្រៃមួយរយដុល្លារអាមេរិកប៉ុណ្ណោះ។ នាំឱ្យយើងមើលឃើញថា អត្តសញ្ញាណយើងមិនមានតម្លៃ។ មានតម្លៃថោកណាស់។ គួរណាស់រាជរដ្ឋាភិបាលឱ្យប្រាក់បៀវត្សគ្រប់គ្រាន់ដល់មន្ត្រីរាជការ ដើម្បីផ្គត់ផ្គង់ក្រុមគ្រួសារពួកគេ ហើយបន្ថយចំនួនមន្ត្រីរាជការគ្មានសមត្ថភាព និងមុខងារច្បាស់លាស់»។
អ្នកវិភាគសង្គមឯករាជ្យ គឺលោក កែម ឡី មានប្រសាសន៍ថា កំណើនពលរដ្ឋកម្ពុជាបច្ចុប្បន្នមានចំនួនខ្ពស់ ដែលប្រឈមនឹងហានិភ័យបាត់បង់ការងារ និងខាតសេដ្ឋកិច្ចច្រើន ដោយសារតែក្រុមហ៊ុនមួយចំនួនយកបុគ្គលិកធ្វើការជាបរទេសលើសច្បាប់កំណត់៖ «ប្រសិនបើយើងមិនដោះស្រាយឱ្យមានសន្តិវិធី ហើយជនអន្តោប្រវេសន៍ហ្នឹងឱ្យវាស្របទៅនឹងច្បាប់អន្តោប្រវេសន៍ ឬច្បាប់សញ្ជាតិទេ វាអាចនឹងមានហានិភ័យខ្ពស់ សម្រាប់ប្រជាជនកម្ពុជា យើង»។
លោកបន្តថា ការគ្រប់គ្រងច្បាប់មិនបានល្អ គឺមិនត្រឹមតែជនអន្តោប្រវេសន៍ល្អទេហូរចូលប្រទេសកម្ពុជា គឺមានទាំងឧក្រិដ្ឋជនបរទេសផង។
លោកមេធាវី សុក សំអឿន មានប្រសាសន៍ថា ប្រសិនបើមានការអនុវត្តច្បាប់ស្ដីពីសញ្ជាតិ និងច្បាប់អន្តោប្រវេសន៍ឱ្យបានត្រឹមត្រូវ ពលរដ្ឋកម្ពុជា នឹងបានទទួលផលប្រយោជន៍ច្រើន ជាពិសេសការគ្រប់គ្រងជនអន្តោប្រវេសន៍ និងការរកចំណូលបានពីការអនុវត្តច្បាប់នេះ៖ «ឧទាហរណ៍ថា យើងអនុវត្តច្បាប់ឱ្យបានច្បាស់លាស់ទៅ ប្រសិនបើអ្នកឯងខុសច្បាប់ ត្រូវធ្វើម៉េច? បញ្ជូនទៅវិញ ឬក៏ពិន័យ? នៅប្រទេសខ្លះ ប្រសិនបើអ្នកឯងសុំវីសារឱ្យដប់ថ្ងៃ យើងលើសដប់ថ្ងៃ គេពិន័យយើង។ ពិន័យហើយគេចាប់បញ្ជូនដាក់ពន្ធនាគារអីទៀតច្រើនណាស់។ បើសិនជាយើងអនុវត្តច្បាស់លាស់អ៊ីចឹងទៅ ទើបអាចការពារកុំឱ្យមានការហូរចូលដោយមិនត្រឹមត្រូវតាមច្បាប់ចូលមកក្នុងស្រុកខ្មែរយើង ដែលនាំឱ្យយើងមានផលវិបាកច្រើន»។
លោកមេធាវី សុក សំអឿន កោតសរសើររដ្ឋាភិបាលចំពោះការបង្កើតក្រសួងគ្រប់គ្រងអន្តោប្រវេសន៍ថ្មី ដែលលោកថា ច្បាប់ស្ដីពីសញ្ជាតិ និងច្បាប់អន្តោប្រវេសន៍ ត្រូវបានអនុវត្តបណ្ដើរៗ។ លោកកត់សម្គាល់ថា នេះជាចំណុចល្អ ក៏ប៉ុន្តែលោកថ្លែងថា គួរឱ្យសោកស្ដាយដែលច្បាប់ទាំងនេះមានជាងដប់ឆ្នាំហើយ ទើបតែចាប់ផ្ដើមអនុវត្ត។
នៅក្នុងវេទិកានេះដែរ ក្រុមយុវជន និងព្រះសង្ឃ សុទ្ធតែអំពាវនាវឱ្យនិស្សិតបញ្ញវន្តខ្មែរ ឱ្យចូលរួមផុលផុសក្នុងការគិតគូរអំពីអនាគតប្រទេសជាតិ ជាពិសេស គឺទាមទារឱ្យមានការគ្រប់គ្រងជនអន្តោប្រវេសន៍ដែលចូលកម្ពុជា ខុសច្បាប់។
ទាក់ទងនឹងប្រវត្តិបាត់ទឹកដីកម្ពុជាក្រោម ប្រធានសមាគមខ្មែរកម្ពុជាក្រោម លោក ថាច់ សេដ្ឋា មានប្រសាសន៍ថា ការរៀបចំវេទិកាបែបនេះ គឺចង់បង្ហាញពីប្រវត្តិទឹកដីកម្ពុជាក្រោម។
លោកឱ្យដឹងទៀតថា ដើម្បីរក្សាកេរ្តិ៍ឈ្មោះ និងមុខមាត់ប្រទេសជាតិកុំប្រទេសជិតខាងរំលោភបំពានបាន លោកនឹងដឹកនាំបាតុកម្មទៅតវ៉ាមុខស្ថានទូតវៀតណាម ជាថ្មីទៀត នៅដើមខែតុលា ខាងមុខ ដើម្បីឱ្យមន្ត្រីនាំពាក្យស្ថានទូតវៀតណាម គឺលោក ត្រឹង វ៉ាន់ ថុង (Tran Van Thong) សុំទោសជាសាធារណៈ ទាក់ទងនឹងរឿងដែលថា លោកបំភ្លៃប្រវត្តិសាស្ត្រទឹកដីកម្ពុជាក្រោម។ លោកបន្តថា បើគ្មានការសុំទោស លោកនឹងស្នើសុំរដ្ឋាភិបាល ផ្តាច់ចំណងការទូតជាមួយវៀតណាម និងអំពាវនាវដល់ពលរដ្ឋខ្មែរ ឱ្យឈប់ប្រើប្រាស់ផលិតផលនាំចូលពីប្រទេសវៀតណាម ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។