អតីតឧត្ដមទីប្រឹក្សារបស់ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ អំពាវនាវឲ្យប្រជាជាតិខ្មែរទាំងមូលរួបរួមសាមគ្គីគ្នាជាធ្លុងមួយ ដើម្បីចូលរួមការពារសិទ្ធីសេរីភាព និងផលប្រយោជន៍របស់ប្រជាពលរដ្ឋខ្មែរនៅកម្ពុជាក្រោម។
ការអំពាវនាវនេះ ធ្វើឡើងក្នុងវេទិកាសាធារណៈស្តីអំពីទឹកដីខ្មែរកម្ពុជាក្រោម ដែលអង្គការសមាគមខ្មែរកម្ពុជាក្រោមរៀបចំឡើងក្នុងពេលដែលភាពចម្រូងចម្រាសជុំវិញប្រវត្តិសាស្ត្រទឹកដីកម្ពុជាក្រោម កំពុងកើតមានឡើងរវាងខ្មែរកម្ពុជាក្រោម និងរដ្ឋាភិបាលវៀតណាម។
មនុស្សប្រមាណ ២០០នាក់បានជួបជុំគ្នាធ្វើវេទិកាសាធារណៈមួយនៅថ្ងៃទី៦ កក្កដា ពិភាក្សាអំពីប្រវត្តិនិងអនាគតទឹកដីកម្ពុជាក្រោម ក្នុងពេលមានមន្ត្រីការទូតវៀតណាម និយាយថា ទឹកដីកម្ពុជាក្រោមជារបស់វៀតណាម តាំងពីដើមមក។
អតីតឧត្ដមទីប្រឹក្សារបស់ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ព្រះអង្គម្ចាស់ ស៊ីសុវត្ថិ ធម្មិកោ ដែលបានចូលរួមក្នុងការជួបជុំគ្នានោះ សម្ដែងការព្រួយបារម្ភអំពីជោគវាសនាអនាគតរបស់ព្រះសង្ឃ និងប្រជាពលរដ្ឋខ្មែរដែលកំពុងរស់នៅលើទឹកដីកម្ពុជាក្រោម ហើយព្រះអង្គបានទទូចឲ្យប្រជាជាតិខ្មែររួមសាមគ្គីគ្នា ដើម្បីការពារសិទ្ធិ និងផលប្រយោជន៍របស់ពលរដ្ឋខ្មែរក្រោម។
មានព្រះបន្ទូលទៅកាន់សិស្ស និស្សិត ព្រះសង្ឃ និងប្រជាពលរដ្ឋដែលចូលរួមក្នុងវេទិកាសាធារណៈស្តីអំពីទឹកដីខ្មែរកម្ពុជាក្រោមនៅភូមិគោកឃ្លាំង ក្នុងសង្កាត់ភ្នំពេញថ្មី ខណ្ឌសែនសុខ ព្រះអង្គម្ចាស់ ស៊ីសុវត្ថិ ធម្មិកោ មានព្រះបន្ទូលថា ប្រជាពលរដ្ឋខ្មែរទាំងអស់ត្រូវតែរួបរួមសាមគ្គីគ្នា ដើម្បីស្វែងរកយុត្តិធម៌ទៅឲ្យប្រជាពលរដ្ឋខ្មែរ ទាំងខ្មែរនៅកម្ពុជា និងខ្មែរនៅកម្ពុជាក្រោម។
ទាក់ទងទៅនឹងប្រវត្តិសាស្ត្រទឹកដីកម្ពុជាក្រោមវិញ ព្រះអង្គម្ចាស់ ធម្មិកោ មានបន្ទូលថា ទឹកដីដែលគេហៅថា កម្ពុជាក្រោមសព្វថ្ងៃនេះ គឺជាទឹកដីដើមរបស់កម្ពុជា ពីព្រោះថា ប្រទេសកម្ពុជា គឺកើតឡើងពីកម្ពុជាក្រោមនេះតែម្ដង ហើយថា ជាតិខ្មែរ និងពូជសាសន៍ខ្មែរបច្ចុប្បន្ន គឺចេញមកពីកម្ពុជាក្រោមនេះឯង។
ព្រះអង្គម្ចាស់បន្តថា ប្រសិនបើប្រជាជាតិខ្មែរចាត់ទុកកម្ពុជាក្រោម ជាកម្ពុជា ឬចាត់ទុកខ្មែរកម្ពុជាក្រោម ជាកំណើតដើមរបស់ខ្មែរ ពេលនោះទើបខ្មែរអាចកសាងសាមគ្គី និងបង្រួបបង្រួមគ្នាបានសាជាថ្មីឡើងវិញ។ សម្រាប់ព្រះអង្គម្ចាស់ ធម្មិកោ កម្ពុជាសព្វថ្ងៃ គ្រាន់តែជាកម្ពុជាចុងប៉ុណ្ណោះ។
ទោះជាយ៉ាងណា ព្រះអង្គម្ចាស់ ស៊ីសុវត្ថិ ធម្មិកោ ហាក់មានជំនឿទៅលើគណបក្សសង្គ្រោះជាតិ ក្នុងការស្វែងរកការបង្រួបបង្រួម ស្វែងរកការឯកភាព និងកសាងសាមគ្គីជាតិខ្មែរឡើងវិញ ហើយដើម្បីសម្រេចគោលដៅនេះ លុះណាតែគណបក្សសង្គ្រោះជាតិ បានកាន់អំណាចជាមុនសិន។ ព្រះអង្គគ្មានជំនឿថា កម្ពុជាក្នុងពេលឋិតនៅក្រោមការដឹកនាំរបស់គណបក្សប្រជាជនកម្ពុជា ហ៊ានតតាំងជាមួយរដ្ឋាភិបាលវៀតណាម ដើម្បីការពារសិទ្ធិ និងផលប្រយោជន៍របស់ពលរដ្ឋខ្មែរដែលកំពុងរស់នៅលើទឹកដីកម្ពុជាក្រោមនោះឡើយ។
ព្រះអង្គម្ចាស់ ស៊ីសុវត្ថិ ធម្មិកោ៖ «បើសិនជាយើងទាមទារយុត្តិធម៌ និងជ័យជម្នះចំពោះជាតិខ្មែរ ពេលហ្នឹងហើយទើបយើងអាចនឹងជួយការពារសិទ្ធិរបស់ខ្មែររស់នៅលើទឹកដីខ្មែរកម្ពុជាក្រោម បើសិនជាយើងមានរដ្ឋាភិបាលមួយខ្លាំងរួបរួមជាតិ សាមគ្គីជាតិ ពេលហ្នឹងយើងអាចចរចាជាមួយរដ្ឋាភិបាលសាធារណរដ្ឋសង្គមនិយមវៀតណាម ដើម្បីបង្កើតសមាគម ២១ខេត្ត នៅកម្ពុជាក្រោមដែរដើម្បីអីដើម្បីការពារខ្មែររស់នៅលើទឹកដីកម្ពុជាក្រោម ដូចយួនការពារសិទ្ធិរបស់យួនរស់នៅលើទឹកដីខ្មែរដែរ»។
ចំណែកប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា វិញ ជឿជាក់ថា នៅពេលណាមួយដែលកម្ពុជា មានអំណោយផលកម្ពុជា មានការរួបរួមគ្នាពេលនោះ កម្ពុជាអាចនឹងស្វែងរកមធ្យោបាយដើម្បីសើរើ និងទាមទារកម្ពុជា មកវិញជាមិនខាន។ បើតាមលោក ថាច់ សេដ្ឋា កម្ពុជាក្រោមនៅមិនទាន់បាត់ទៅណានៅឡើយ។
លោក ថាច់ សេដ្ឋា៖ «បងប្អូនកុំខ្លាចបាត់កម្ពុជាក្រោមឲ្យសោះ កុំខ្លាចបាត់ បើបងប្អូនទៅលេងនៅវៀតណាម ខាងត្បូង យើងថា ទៅកម្ពុជាក្រោម បើយើងចង់ទៅលេងព្រៃនគរ យើងកុំថា ទៅហូជីមិញ ទៅសាយហ្កន យើងថា ទៅលេងព្រៃនគរ អ៊ីចឹងកម្ពុជាក្រោមអត់បាត់ទេ។ បើយើងនៅតែហៅ កាលណាយើងនៅតែហៅកម្ពុជាក្រោម កាលណាយើងនៅហៅព្រៃនគរ នៅហៅព្រះត្រពាំង ឃ្លាំង ពលលាវ ទឹកខ្មៅ គឺកម្ពុជាក្រោមអត់បាត់ជាដាច់ខាត អ៊ីចឹងទៅកម្ពុជាក្រោម ថាទៅលេងស្រុកយើង ឬទៅកម្ពុជាក្រោមចុះអាហ្នឹងហើយ កម្ពុជាក្រោមនៅស្ថិតស្ថេរ អមតៈជារៀងរហូត»។
ភាពចម្រូងចម្រាសជុំវិញប្រវត្តិសាស្ត្រទឹកដីកម្ពុជាក្រោម រវាងអង្គការសមាគមខ្មែរកម្ពុជាក្រោម និងមន្ត្រីស្ថានទូតវៀតណាម ប្រចាំកម្ពុជា បានកើតឡើងអស់រយៈពេលជិតមួយខែមកហើយ ហើយខ្មែរក្រោមមានគម្រោងនឹងនាំគ្នាធ្វើបាតុកម្មប្រឆាំងនឹងការលើកឡើងរបស់វៀតណាមនេះ ប្រសិនបើរដ្ឋាភិបាលវៀតណាម មិនមានឯកសារបញ្ជាក់ថា ទឹកដីកម្ពុជាក្រោម ជាទឹកដីរបស់វៀតណាម ជាយូរមកហើយនោះ ហើយប្រសិនបើមិនព្រមសុំទោសប្រជាពលរដ្ឋខ្មែរជាសាធារណៈ។
បន្ទាប់ពីវេទិកាសាធារណៈនេះ ក្រៅតែពីដាក់ញត្តិទៅកាន់ស្ថានទូតវៀតណាម ក្នុងពេលដ៏ខ្លីខាងមុខដើម្បីឲ្យរដ្ឋាភិបាលវៀតណាម ឆ្លើយតបតាមការទាមទាររបស់ខ្លួនអង្គការសមាគមខ្មែរកម្ពុជាក្រោមក៏មានគម្រោងដាក់ញត្តិទៅកាន់ស្ថានទូតបរទេសមួយចំនួនផ្សេងទៀតនៅកម្ពុជា ជាពិសេសស្ថានទូតនៃប្រទេសមហាអំណាចដើម្បីឲ្យប្រទេសទាំងនេះ បានដឹងអំពីបញ្ហារបស់ខ្មែរក្រោមនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។