ពលរដ្ឋខ្មែរកម្ពុជាក្រោមជិត ២០០នាក់ មកពីរដ្ឋនានា ក្នុងសហរដ្ឋអាមេរិក កាលពីថ្ងៃអាទិត្យ ទី១ មិថុនា បាននាំគ្នារំលឹកខួបនៃថ្ងៃបាត់បង់ទឹកដីកម្ពុជាក្រោម ដែលបារាំងបានកាត់ទៅឱ្យប្រទេសវៀតណាម គ្រប់គ្រង កាលពី ៦៥ឆ្នាំមុន។
សូមស្ដាប់សេចក្ដីរាយការណ៍របស់លោក តាំង សារ៉ាដា អំពីការជួបជុំគ្នារំលឹកថ្ងៃជាប្រវត្តិសាស្ត្រមួយនេះ ពីរដ្ឋ នដ្ស ខារ៉ូឡាណា (North Carolina)៖
ចំណែកនៅឯរាជធានីភ្នំពេញ អង្គការសមាគមខ្មែរកម្ពុជាក្រោម សម្ដែងក្តីសង្ឃឹមថា សាលារាជធានីភ្នំពេញ នឹងអនុញ្ញាតឲ្យពួកគេរៀបចំពិធីបុណ្យរំលឹកខួបបាត់បង់ទឹកដីកម្ពុជាក្រោម នៅវត្តសាមគ្គីរង្សី នៅថ្ងៃទី៤ ខែមិថុនា ខាងមុខ។ ក្តីសង្ឃឹមនេះ ធ្វើឡើងបន្ទាប់ពីប្រជាពលរដ្ឋមានបញ្ហាដីធ្លីមកពីខេត្តក្រចេះ ដែលបានស្នាក់នៅក្នុងទីអារាមនេះ វិលត្រឡប់ទៅខេត្តក្រចេះវិញ ទាំងអស់នៅថ្ងៃទី១ ខែមិថុនា។
ទោះជាយ៉ាងណា អង្គការសមាគមខ្មែរកម្ពុជាក្រោម កំពុងរង់ចាំមើលលទ្ធផលក្រោយជំនួបរវាងអង្គការសមាគមខ្មែរកម្ពុជាក្រោម និងមន្ត្រីសាលារាជធានីភ្នំពេញ ជាថ្មីម្តងទៀត នៅថ្ងៃទី២ ខែមិថុនា នេះ។
មន្ត្រីសាលារាជធានីភ្នំពេញ បានអះអាងកាលពីពេលថ្មីៗនេះថា ពួកគេនឹងមិនអនុញ្ញាតឲ្យអង្គការសមាគមខ្មែរកម្ពុជាក្រោម ជួបជុំធ្វើពិធីបុណ្យរំលឹកថ្ងៃបាត់បង់ទឹកដីនៅវត្តសាមគ្គីរង្សី តាមការស្នើសុំរបស់ខ្មែរក្រោមឡើយ ដោយលើកហេតុផលថា នៅវត្តសាមគ្គីរង្សីនេះ មានប្រជាពលរដ្ឋមកពីខេត្តក្រចេះស្នាក់នៅ ដូច្នេះសាលារាជធានីភ្នំពេញ មិនអាចអនុញ្ញាតឲ្យពលរដ្ឋជួបជុំធ្វើអ្វី ២ជាន់គ្នានៅកន្លែងតែមួយ ឬក្នុងពេលតែមួយឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។