អង្គការសមាគមខ្មែរកម្ពុជាក្រោម និងយុវជន គ្រោងរៀបចំវេទិកាពិភាក្សាមួយនៅថ្ងៃទី៦ ខែកញ្ញា នៅទីលានប្រជាធិបតេយ្យ ស្ដីអំពីការអនុវត្តច្បាប់អន្តោប្រវេសន៍នៅក្នុងព្រះរាជាណាចក្រកម្ពុជា។
គម្រោងរៀបចំវេទិកានេះ អ្នករៀបចំបានឆ្លងកាត់ការពិភាក្សាគ្នាជាច្រើនម៉ោង ជាមួយមន្ត្រីសាលារាជធានីភ្នំពេញ មុននឹងអនុញ្ញាតឲ្យរៀបចំកម្មវិធីនេះ។
សាលារាជធានីភ្នំពេញ បានអនុញ្ញាតឲ្យសហគមន៍ខ្មែរកម្ពុជាក្រោម រៀបចំវេទិកាសម្ដែងមតិនៅទីលានប្រជាធិបតេយ្យ នៅថ្ងៃសៅរ៍ ទី៦ ខាងមុខ ដោយភ្ជាប់លក្ខខណ្ឌមួយចំនួន។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍នៅថ្ងៃទី៤ កញ្ញា ថា បន្ទាប់ពីការប្រជុំប្រមាណ ២ម៉ោង ជាមួយមន្ត្រីសាលារាជធានីភ្នំពេញ អំពីគម្រោងរៀបចំវេទិកាពិភាក្សាស្ដីពីការអនុវត្តច្បាប់អន្តោប្រវេសន៍ នៅក្នុងព្រះរាជាណាចក្រកម្ពុជា នោះ សាលារាជធានីបានយល់ព្រមឲ្យរៀបចំ ប៉ុន្តែក្រុមការងារនេះ មិនត្រូវរំលោភលើកិច្ចសន្យាមួយចំនួនដែលបានជជែកគ្នាជាលាយលក្ខណ៍អក្សរ។ កិច្ចសន្យានោះមានជាអាទិ៍ សាលារាជធានីបានប្រែក្លាយពាក្យថា វេទិកាសាធារណៈ ជាវេទិកាសម្ដែងមតិ ដែលមានអ្នកចូលរួមចំនួន ២០០នាក់ ក្រុមការងារនេះត្រូវរក្សាសន្តិសុខផ្នែកខាងក្នុងទីលានដោយខ្លួនឯង មិនអនុញ្ញាតឲ្យមានការហែក្បួន និងមិនត្រូវប្រើវេទិកានេះ ក្លាយជាវេទិកាជេរប្រមាថប៉ះពាល់ព្រះមហាក្សត្រ ប៉ះពាល់ប្រទេសជិតខាង ប៉ះពាល់ដល់ថ្នាក់ដឹកនាំ និងអ្នកនយោបាយ ដែលនាំឲ្យមានការញុះញង់ក្លាយជាអំពើហិង្សា។
លោកថា អ្វីដែលមានការជជែកទម្រាំត្រូវរ៉ូវគ្នានោះ គឺការសង់រោងដែលសាលារាជធានី តម្រូវឲ្យរុះវិញភ្លាមៗនៅពេលចប់កម្មវិធី៖ «រឿងមួយដែលជជែកនោះ គឺរឿងសង់រោង មិនចង់ឲ្យមានការសង់រោងសង់អី ខ្លាចមានមនុស្សដេកនៅយូរអ៊ីចឹងណា ប៉ុន្តែយើងបានថាអត់អីទេ យើងសង់ ហើយយើងចប់កម្មវិធី យើងនឹងរើវិញទេ។ ទីបំផុតទៅក៏បានយល់ព្រមឯកភាពគ្នា»។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា ការពិភាក្សានេះពុំមានអ្វីដែលខ្វែងគំនិតគ្នានោះទេ។ លោកថា សង្ឃឹមថាអ្នករៀបចំកម្មវិធី គោរពតាមគោលការណ៍នៃការជជែកគ្នា៖ «សង្ឃឹមថាប្រព្រឹត្តទៅធម្មតា បើសិនជាគាត់គោរពទៅតាមអ្វីដែលយើងជជែកគ្នានៅក្នុងកិច្ចប្រជុំនោះ មានកំណត់ហេតុត្រឹមត្រូវ។ យើងបញ្ជាក់ឲ្យគាត់ឲ្យហើយ ពីព្រោះកន្លងមក យើងឃើញតែងតែការជជែកគ្នាផ្សេង ការអនុវត្តផ្សិង»។
ការស្នើរៀបចំវេទិកានេះ នៅបន្ទាប់ពីសហគមន៍ខ្មែរកម្ពុជាក្រោម និងព្រះសង្ឃខ្មែរក្រោម បានធ្វើបាតុកម្មប្រឆាំងរដ្ឋាភិបាលវៀតណាម ដោយទាមទារឲ្យអ្នកនាំពាក្យស្ថានទូត សុំទោសជាសាធារណៈ ទាក់ទងនឹងការលើកឡើងថា ទឹកដីខ្មែរកម្ពុជាក្រោម ជាទឹកដីរបស់ប្រទេសវៀតណាម ដែលថាជាការបំភ្លៃប្រវត្តិសាស្ត្រទឹកដីកម្ពុជាក្រោម ហើយការតវ៉ានោះ បានឡើងកម្ដៅទៅដល់ក្រុមបាតុករដុតទង់ជាតិវៀតណាម ទៀតផង។ តែទោះជាយ៉ាងណា ពួកគេគ្រោងធ្វើបាតុកម្មប្រឆាំងរដ្ឋាភិបាលវៀតណាម ម្ដងទៀតនៅដើមខែតុលា ប្រសិនបើនៅតែមិនទទួលបានការឆ្លើយតបចាប់ពីពេលនេះ រហូតដល់ចុងខែកញ្ញា។
វេទិកាសម្ដែងមតិនៅទីលានប្រជាធិបតេយ្យនៅថ្ងៃសៅរ៍ ទី៦ នឹងចាប់ផ្ដើមពីម៉ោង ៨ព្រឹក រហូតដល់ម៉ោង ៥ល្ងាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។