អង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរដើម្បីលទ្ធិប្រជាធិបតេយ្យ ប្រកាសជាថ្មីថា ពួកគេនឹងនាំគ្នាធ្វើបាតុកម្មរយៈពេល ៥ថ្ងៃ ចាប់ពីថ្ងៃទី៤ ដល់ថ្ងៃទី៨ ខែតុលា ខាងមុខ ដើម្បីបន្តទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រពិតទឹកដីកម្ពុជាក្រោម។
ការធ្វើបាតុកម្មរបស់ពួកគេនៅលើកនេះ នឹងស្នើឲ្យរដ្ឋសភាកម្ពុជា កោះហៅរដ្ឋមន្ត្រីក្រសួងការបរទេស មកបំភ្លឺពីការបំភ្លៃប្រវត្តិសាស្ត្រខ្មែររបស់រដ្ឋាភិបាលវៀតណាម និងស្នើឲ្យលោកនាយករដ្ឋមន្ត្រី ហ៊ុន សែន ផ្តាច់ទំនាក់ទំនងការទូតបណ្ដោះអាសន្នជាមួយរដ្ឋាភិបាលវៀតណាម ថែមទៀត។
តើការស្នើឲ្យរដ្ឋសភាកោះហៅរដ្ឋមន្ត្រីក្រសួងការបរទេស មកឆ្លើយបំភ្លឺ និងឲ្យកម្ពុជា ផ្តាច់ទំនាក់ទំនងបណ្ដោះអាសន្នជាមួយវៀតណាម ដោយសារបញ្ហាប្រវត្តិសាស្ត្រ ជារឿងសមហេតុផល ដែលរដ្ឋសភា និងរដ្ឋាភិបាលកម្ពុជា គួរយកទៅពិចារណាដែរឬទេ?
បើទោះជាក្រសួងការបរទេសកម្ពុជា បានអះអាងថា រដ្ឋាភិបាលវៀតណាម សន្យាថានឹងដកអ្នកនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាំង ថុង (Tran Van Thong) ត្រឡប់ទៅស្រុកវិញក្តី ក៏ប៉ុន្តែដំណឹងនេះនៅតែមិនអាចធ្វើឲ្យអង្គការសមាគមខ្មែរកម្ពុជាក្រោម បញ្ឈប់ការទាមទារឲ្យរដ្ឋាភិបាលវៀតណាម សុំទោសពលរដ្ឋខ្មែរជាសាធារណៈ ឬទទួលស្គាល់ប្រវត្តិសាស្ត្រទឹកដីកម្ពុជាក្រោម នោះឡើយ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា បានអះអាងថា បើទោះជារដ្ឋាភិបាលវៀតណាម ដក លោក ត្រឹង វ៉ាំង ថុង ត្រឡប់ទៅវៀតណាម វិញក៏ដោយ ប៉ុន្តែវៀតណាម ត្រូវបញ្ជាក់ឲ្យបានច្បាស់ ថាតើការដកនោះដោយសារ លោក ត្រឹង វ៉ាំង ថុង ត្រូវដល់អាណត្តិរបស់ខ្លួន ឬក៏ លោក ត្រឹង វ៉ាំង ថុង ត្រូវដកដោយសារលោកនិយាយបំភ្លៃប្រវត្តិសាស្ត្រខ្មែរ។ លោក ថាច់ សេដ្ឋា ថា ប្រសិនបើ លោក ត្រឹង វ៉ាំង ថុង ត្រូវដកទៅវិញដោយសារការបំភ្លៃប្រវត្តិសាស្ត្រមែន រដ្ឋាភិបាលវៀតណាម ចាំបាច់ត្រូវតែសុំទោសពលរដ្ឋខ្មែរជាសាធារណៈ ឬត្រូវតែទទួលស្គាល់ប្រវត្តិសាស្ត្រខ្មែរជាលាយលក្ខណ៍អក្សរ។
បើទោះជាខ្មែរក្រោម និងយុវជន បានទុកពេលឲ្យក្រសួងការបរទេសកម្ពុជា មួយលើកជាពីរលើក ដើម្បីធ្វើការងារផ្លូវទូតដោះស្រាយបញ្ហានេះជាមួយរដ្ឋាភិបាលវៀតណាម ក៏ដោយ ក៏ការទាមទាររបស់ខ្មែរក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ នៅតែមិនទទួលបានចម្លើយជាវិជ្ជមានណាមួយពីរដ្ឋាភិបាលវៀតណាម ឡើយ។
ប្រហែលដោយសារក្រសួងការបរទេសកម្ពុជា មិនអាចធ្វើអ្វីរដ្ឋាភិបាលវៀតណាម កើតនេះហើយ ទើបខ្មែរក្រោម និងយុវជន ងាកទៅរករដ្ឋសភា ឲ្យកោះហៅរដ្ឋមន្ត្រីការបរទេស មកសាកសួរ និងឲ្យលោកនាយករដ្ឋមន្ត្រី ហ៊ុន សែន ផ្តាច់ទំនាក់ទំនងការទូតជាមួយវៀតណាម បណ្ដោះអាសន្នតែម្តង។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍នៅថ្ងៃទី១ ខែតុលា ថា នៅពេលដែលតំណាងអង្គការសមាគមខ្មែរកម្ពុជាក្រោម បានជួបរដ្ឋមន្ត្រីក្រសួងការបរទេសកម្ពុជា លោក ហោ ណាំហុង កាលពីពេលកន្លងមក លោក ហោ ណាំហុង បានសន្យាថានឹងធ្វើកិច្ចការនេះជាមួយរដ្ឋាភិបាល និងស្ថានទូតវៀតណាម ប្រចាំកម្ពុជា ប៉ុន្តែលោក ថាច់ សេដ្ឋា ថា រហូតមកទល់ពេលនេះ ពុំឃើញមានលទ្ធផលយ៉ាងណានៅឡើយ។ លោក ថាច់ សេដ្ឋា បន្តថា ដោយសារកត្តានេះហើយ ទើបខ្មែរក្រោម និងយុវជន ចង់ឲ្យសភាកោះហៅ លោក ហោ ណាំហុង មកសួរបញ្ជាក់។
លោក ថាច់ សេដ្ឋា៖ «ពីព្រោះយើងអត់បានដឹងរឿងអីសោះ ក្រោយពេលយើងបានជួបចរចាជាមួយឯកឧត្តមរដ្ឋមន្ត្រីការបរទេសខ្មែរយើងហើយ អត់មានឃើញចម្លើយអីមួយដែលខាងយុវជន ក៏ដូចជាខាងសហគមន៍ខ្មែរក្រោម បានទទួលព័ត៌មានជាផ្លូវការហ្នឹង វាអត់មាន។ យើងមិនអាចអូសពេលហ្នឹងកាន់តែយូរទេ។ អ៊ីចឹងហើយ យើងចង់ឲ្យសភាលោកសួរបញ្ជាក់ទៅក្រសួងការបរទេសមើល ពីព្រោះក្រសួងការបរទេសមើល ពីព្រោះខាងទូតវាទាក់ទិនក្រសួងការបរទេស។ អ៊ីចឹងសុំឲ្យឯកឧត្តមលោកបញ្ជាក់មើលថា ធ្វើការហ្នឹងដល់ណាហើយ ស្ថានភាពយ៉ាងម៉េចហើយ ពីព្រោះយើងទុកពេលយូរដែរ អ៊ីចឹងយើងចង់ដឹងកិច្ចការហ្នឹងជាបន្ទាន់ផងដែរ»។
ទាក់ទងនឹងការស្នើឲ្យរដ្ឋាភិបាលកម្ពុជា ផ្តាច់ទំនាក់ទំនងការទូតបណ្ដោះអាសន្នជាមួយប្រទេសវៀតណាម វិញ លោក ថាច់ សេដ្ឋា កត់សម្គាល់ថា នេះមិនមែនជាការដាក់សម្ពាធទៅលើរដ្ឋាភិបាលកម្ពុជា នោះទេ ប៉ុន្តែលោកថា វាគ្រាន់តែជាការជំរុញឲ្យរដ្ឋាភិបាលកម្ពុជា បំពេញភារកិច្ចរបស់ខ្លួនក្នុងនាមជាប្រទេសឯករាជ្យមួយប៉ុណ្ណោះ។ លោក ថាច់ សេដ្ឋា ថា ក្នុងនាមជារដ្ឋឯករាជ្យ កម្ពុជា ត្រូវតែកោះហៅមន្ត្រីស្ថានទូតវៀតណាម ដើម្បីធ្វើកំណត់ទូតឲ្យបានច្បាស់លាស់អំពីប្រវត្តិសាស្ត្រប្រទេសកម្ពុជា និងឲ្យវៀតណាម ទទួលខុសត្រូវចំពោះពាក្យសម្ដីបំភ្លៃប្រវត្តិសាស្ត្ររបស់ខ្លួន ដើម្បីជៀសវាងកុំឲ្យអ្នកសិក្សាក្រោយៗយល់ច្រឡំថា ទឹកដីកម្ពុជាក្រោម ជាទឹកដីរបស់វៀតណាម តាំងពីយូរយារណាស់មកហើយនោះ។
លោក ថាច់ សេដ្ឋា៖ «កុំឲ្យយួនហ្នឹងនៅបង្ហាញឥទ្ធិពលមកលើកម្ពុជា បន្តមើលងាយប្រជាពលរដ្ឋខ្មែរបន្តទៅទៀតអ៊ីចឹង។ ដូច្នេះហើយ ខ្ញុំឲ្យរដ្ឋាភិបាលខ្មែរយើងហ្នឹងផ្តាច់ការទំនាក់ទំនងបណ្ដោះអាសន្ន ហើយខ្ញុំថា ដូចជាមិនជាបញ្ហាធ្ងន់ធ្ងរទេ ប្រសិនបើប្រទេសទាំងពីរហ្នឹងសហការគ្នា ក្នុងនាមមិត្តភាពល្អ។ យួន គួរតែបង្ហាញឥរិយាបថរបស់ខ្លួនគោរពដល់ប្រទេសជិតខាងផងដែរ។ អ៊ីចឹងគ្រាន់តែថា ឆ្លើយមកប្រាប់ប្រជាពលរដ្ឋខ្មែរ អំពីកំហុសឆ្គងរបស់ខ្លួនឯង វាចប់រឿងបាត់ហើយ គ្មានអ្វីដែលធ្ងន់ធ្ងរ»។
ដោយសារបញ្ហាបំភ្លៃប្រវត្តិសាស្ត្រទឹកដីកម្ពុជាក្រោម នេះ អង្គការសមាគមខ្មែរកម្ពុជាក្រោម និងយុវជន បានធ្វើបាតុកម្មទាមទារឲ្យរដ្ឋាភិបាលវៀតណាម សុំទោសចំនួន ៣លើកមកហើយ។ ក្នុងការទាមទារទាំង៣លើកនោះ វៀតណាម មិនត្រឹមតែមិនសុំទោសនោះទេ ប៉ុន្តែពួកគេថែមទាំងទទូចឲ្យអាជ្ញាធរកម្ពុជា ចាត់វិធានការរារាំងមិនឲ្យមានបាតុកម្មប្រឆាំងស្ថានទូតរបស់ពួកគេ និងចាត់វិធានការឆ្លើយតបចំពោះអ្នកដែលហ៊ានដុតទង់ជាតិរបស់វៀតណាម ទៀតផង។ លើសពីនេះ សូម្បីតែញត្តិដែលបាតុករយកទៅដាក់ដល់ស្ថានទូតពួកគេទៅហើយ ក៏ពួកគេមិនព្រមទទួលយកដែរ តែបែរជាឲ្យមន្ត្រីសាលារាជធានីភ្នំពេញ មកទទួលយកពីបាតុករ ហើយដាក់ទៅឲ្យក្រសួងការបរទេសកម្ពុជា ដើម្បីឲ្យក្រសួងដាក់ឲ្យពួកគេទៅវិញ។ ទង្វើទាំងអស់នេះហើយ ដែលធ្វើឲ្យពលរដ្ឋខ្មែរយល់ថា វៀតណាម តែងតែតាំងខ្លួនឯងជាបងធំរបស់ខ្មែរ និងធ្វើឲ្យខ្មែរខឹងសម្បាពួកគេរឹតតែខ្លាំង។
សាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត រស់ រ៉ាវុធ កត់សម្គាល់ថា វៀតណាម បានសន្យាថានឹងធ្វើកំណត់ទូតឲ្យក្រសួងការបរទេសកម្ពុជា ដក លោក ត្រឹង វ៉ាំង ថុង ចេញពីកម្ពុជា។ លោកបណ្ឌិត រស់ រ៉ាវុធ ថា បើទោះជាវៀតណាម បានធ្វើ ឬមិនបានធ្វើកំណត់ទូតក្តី ក្រសួងការបរទេសកម្ពុជា គួរតែផ្សព្វផ្សាយឲ្យបាតុករបានដឹង ហើយបើមិនមានការផ្សព្វផ្សាយនោះទេ រដ្ឋសភាគួរពិចារណាសំណើរបស់ខ្មែរក្រោម កោះហៅរដ្ឋមន្ត្រីក្រសួងការបរទេស មកឆ្លើយបំភ្លឺ។
លោកបណ្ឌិត រស់ រ៉ាវុធ៖ «ចំណុចនេះយើងពិនិត្យមើលទៅលើច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា ហ្នឹង គឺចំពោះការធ្វើបាតុកម្មដោយអហិង្សា ត្រូវទទួលយល់ព្រមដោយរដ្ឋធម្មនុញ្ញ។ អ៊ីចឹងរដ្ឋអំណាចមានសិទ្ធិការពារបាតុកម្ម ហើយនិងយកប្រធានបទបាតុករមកដោះស្រាយ។ អ៊ីចឹង លិខិតដែលស្នើទៅរដ្ឋសភា រដ្ឋសភាពិចារណា ព្រោះថាការពិចារណាណាមួយក្នុងជួររដ្ឋាភិបាល គឺមានត្រឹមតែសមាជិកសភា ៣០នាក់ គឺអាចអញ្ជើញបានហើយ។ នេះជាចំណុចដែលនឹងអាចធ្វើទៅបាន»។
ចំពោះសំណើរបស់បាតុករ ដែលស្នើឲ្យរដ្ឋាភិបាលកម្ពុជា ផ្តាច់ទំនាក់ទំនងការទូតបណ្ដោះអាសន្នជាមួយប្រទេសវៀតណាម នោះ លោកបណ្ឌិត រស់ រ៉ាវុធ ថ្លែងថា វាហាក់ដូចជាពិបាកបន្តិច។ បើតាមលោកបណ្ឌិត រស់ រ៉ាវុធ ជាទូទៅប្រទេសពីរអាចផ្តាច់ទំនាក់ទំនងការទូតជាមួយគ្នា លុះណាតែប្រទេសទាំងពីរនោះមានសង្គ្រាមជាមួយគ្នា ឬនៅពេលដែលពួកគេមានជម្លោះនយោបាយតឹងតែង ដែលមិនអាចដោះស្រាយបាន។ ក្នុងករណីនេះ លោកបណ្ឌិត រស់ រ៉ាវុធ មិនរំពឹងថា រដ្ឋាភិបាលកម្ពុជា នឹងផ្តាច់ទំនាក់ទំនងការទូតជាមួយវៀតណាម នោះឡើយ។
យ៉ាងណាក៏ដោយ បើមានការផ្តាច់ទំនាក់ទំនងការទូត ឬបើពលរដ្ឋខ្មែរមិនប្រើប្រាស់ទំនិញ និងសេវាកម្មរបស់វៀតណាម មែននោះ លោកបណ្ឌិត រស់ រ៉ាវុធ ថ្លែងថា អ្នកដែលខាតបង់ប្រយោជន៍ខ្លាំងជាងគេនោះ គឺភាគីវៀតណាម ទៅវិញទេ ព្រោះថា វៀតណាម មានក្រុមហ៊ុនច្រើននៅកម្ពុជា និងនាំទំនិញចូលមកកម្ពុជា ក៏ច្រើនដែរ។ លោកបណ្ឌិត រស់ រ៉ាវុធ ក៏កត់សម្គាល់ដែរថា បើកម្ពុជា មិនមានទំនិញពីវៀតណាម ទេ នោះពលរដ្ឋខ្មែរក៏មិនខ្វះទំនិញប្រើប្រាស់ដែរ ដោយសារកម្ពុជា ក៏មានទំនិញនាំចូលពីប្រទេសផ្សេងៗទៀត។
ប្រការនេះហើយ ដែលលោកបណ្ឌិត រស់ រ៉ាវុធ ថ្លែងថា វៀតណាម គួរតែឈប់តាំងខ្លួនឯងជាបងធំរបស់ខ្មែរ និងគួរបញ្ចប់វិវាទប្រវត្តិសាស្ត្រនេះជាមួយកម្ពុជា។ បើតាមលោកបណ្ឌិត រស់ រ៉ាវុធ វៀតណាម ត្រូវសិក្សាប្រវត្តិសាស្ត្រឲ្យបានច្បាស់។ វៀតណាម ត្រូវបញ្ឈប់ការកេងចំណេញនយោបាយលើប្រវត្តិសាស្ត្រ។ វៀតណាម ត្រូវដក លោក ត្រឹង វ៉ាំង ថុង ចេញពីកម្ពុជា ហើយបើនៅតែមិនអាចដោះស្រាយបាន ភាគីកម្ពុជា និងវៀតណាម អាចដឹកដៃគ្នាទៅរកតុលាការយុត្តិធម៌អន្តរជាតិ ជួយដោះស្រាយដោយយកប្រទេសបារាំង ធ្វើជាសាក្សី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។