សហព័ន្ធខ្មែរកម្ពុជាក្រោម គ្រោងប្រមូលផ្តុំគ្នាធ្វើបាតុកម្មនៅមុខស្ថានទូតវៀតណាម ប្រចាំប្រទេសកាណាដា (Canada) នៅថ្ងៃទី១៨ ខែកក្កដា ខាងមុខ ដើម្បីទាមទារឲ្យរដ្ឋាភិបាលវៀតណាម ទទួលស្គាល់ការពិតនៃប្រវត្តិសាស្ត្រទឹកដីកម្ពុជាក្រោម ថាជាអតីតទឹកដីមួយភាគរបស់ប្រទេសកម្ពុជា។
គម្រោងធ្វើបាតុកម្មរបស់សហព័ន្ធខ្មែរកម្ពុជាក្រោម នេះធ្វើឡើងស្របពេលដែលព្រះសង្ឃ យុវជន និងពលរដ្ឋខ្មែរក្រោម គ្រោងនឹងធ្វើបាតុកម្មនៅមុខស្ថានទូតវៀតណាម ប្រចាំកម្ពុជា ជាថ្មីម្តងទៀតនៅថ្ងៃទី២១ កក្កដា ខាងមុខ។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុក ថាច់ បានថ្លែងប្រាប់វិទ្យុអាស៊ីសេរី តាមទូរស័ព្ទពីសហរដ្ឋអាមេរិក នៅថ្ងៃទី១៣ កក្កដា ថា សហព័ន្ធខ្មែរកម្ពុជាក្រោម នឹងនាំគ្នាធ្វើបាតុកម្មនៅមុខស្ថានទូតវៀតណាម ក្នុងទីក្រុងអូតាវ៉ា (Ottawa) ប្រទេសកាណាដា នៅថ្ងៃទី១៨ ខែកក្កដា ហើយក្រោយមកទៀត នឹងធ្វើនៅសហរដ្ឋអាមេរិក នៅថ្ងៃទី២៥ ខែកក្កដា។ ចំណែកនៅតាមបណ្ដាប្រទេសផ្សេងៗទៀត ដែលមានសាខាសហព័ន្ធខ្មែរកម្ពុជាក្រោម នឹងមានរៀបចំបាតុកម្មជាបន្តបន្ទាប់ ដើម្បីប្រឆាំងនឹងការបំភ្លៃប្រវត្តិសាស្ត្ររបស់រដ្ឋាភិបាលវៀតណាម។
លោក ថាច់ ង៉ុក ថាច់ ថ្លែងបន្តថា ក្រៅតែពីធ្វើបាតុកម្ម សហព័ន្ធខ្មែរកម្ពុជាក្រោម ក៏នឹងដាក់ញត្តិទៅកាន់រដ្ឋាភិបាលនៃបណ្ដាប្រទេសដែលមានខ្មែរក្រោមរស់នៅ ដើម្បីស្នើឲ្យរដ្ឋាភិបាលទាំងនោះ យកចិត្តទុកដាក់ចំពោះបញ្ហាខ្មែរក្រោម និងដើម្បីជំរុញឲ្យពួកគេដាក់គំនាបដល់រដ្ឋាភិបាលវៀតណាម ឲ្យទទួលស្គាល់ការពិត និងគោរពសិទ្ធិសេរីភាពរបស់ជនជាតិដើមនៅវៀតណាម ដែលរដ្ឋាភិបាលកុម្មុយនីស្តមួយនេះ តែងបានសន្យាជាមួយសហគមន៍អន្តរជាតិ។
លោក ថាច់ ង៉ុក ថាច់ ក៏បានអំពាវនាវឲ្យពលរដ្ឋខ្មែរ និងខ្មែរក្រោមនៅកម្ពុជា នាំគ្នាចូលរួមធ្វើបាតុកម្មឲ្យបានច្រើន លុះណាតែរដ្ឋាភិបាលវៀតណាម ទទួលស្គាល់ថា កម្ពុជាក្រោម គឺជាអតីតទឹកដីរបស់កម្ពុជា៖ «បងប្អូនខ្មែរទូទៅទាំងក្នុង និងក្រៅប្រទេស មានការមិនសប្បាយចិត្ត ដែលរដ្ឋាភិបាលវៀតណាម មួយលើកហើយមួយលើកទៀត បានបង្កាច់ បានកែប្រែប្រវត្តិសាស្ត្រប្រទេសកម្ពុជា ហើយខ្ញុំជឿជាក់ប្រទេសកម្ពុជា រដ្ឋាភិបាលកម្ពុជា បច្ចុប្បន្ននេះ នឹងមានការពិចារណា បើរដ្ឋាភិបាលកម្ពុជា ធ្វើអ្វីទៅតាមតំណាងទូតយួន ឬរដ្ឋាភិបាលយួន បានស្នើសុំមិនខុសគ្នាអំពីប្រជាពលរដ្ឋដែលគេចោទថា រដ្ឋាភិបាលកម្ពុជា គណបក្សប្រជាជនកម្ពុជា ជាគណបក្សអាយ៉ងយួន ជាគណបក្សដែលធ្វើទៅតាមយួន បង្គាប់បញ្ជានោះទេ»។
ជុំវិញរឿងរ៉ាវប្រវត្តិសាស្ត្រទឹកដីកម្ពុជាក្រោម នេះ ព្រះសង្ឃ យុវជន និងប្រជាពលរដ្ឋខ្មែរ និងខ្មែរកម្ពុជាក្រោម បានប្រមូលផ្តុំគ្នាធ្វើបាតុកម្មនៅមុខស្ថានទូតវៀតណាម ប្រចាំកម្ពុជា កាលពីព្រឹកថ្ងៃទី៨ ខែកក្កដា ប៉ុន្តែពួកគេត្រូវបានកងសន្តិសុខ និងកម្លាំងសមត្ថកិច្ចរដ្ឋាភិបាល ធ្វើការរារាំង និងវាយបង្ក្រាប។
នៅថ្ងៃទី៨ កក្កដា នោះដដែល គឺភ្លាមៗបន្ទាប់ពីបាតុកម្ម ស្ថានទូតវៀតណាម ប្រចាំកម្ពុជា បានចេញសេចក្តីថ្លែងការណ៍ថ្កោលទោសចំពោះបាតុកម្ម ហើយចាត់ទុកសកម្មភាពរបស់បាតុករទាំងអស់នោះ ថាជាការជ្រៀតជ្រែកចូលកិច្ចការផ្ទៃក្នុង និងអធិបតេយ្យភាពរបស់ប្រទេសវៀតណាម។ លើសពីនេះ ពួកគេចាត់ទុកបាតុកម្មនោះថា គ្រាន់តែធ្វើឡើងដោយក្រុមមួយក្តាប់តូច ដែលគ្មានមូលដ្ឋានច្បាប់ត្រឹមត្រូវ និងល្មើសច្បាប់កម្ពុជា ហើយព្រមានថា នឹងមិនអនុញ្ញាតឲ្យបុគ្គល ឬអ្នកពាក់ព័ន្ធណាមួយជ្រៀតចូលកិច្ចការផ្ទៃក្នុងរបស់វៀតណាម ជាដាច់ខាត។
ទោះជាយ៉ាងណាក៏ដោយ សម្ព័ន្ធសមាគមយុវជនទាំង៧ ដឹកនាំដោយសហព័ន្ធនិស្សិតបញ្ញវន្តកម្ពុជា ព្រមទាំងព្រះសង្ឃ ប្រជាពលរដ្ឋខ្មែរ និងខ្មែរកម្ពុជាក្រោម នឹងនាំគ្នាធ្វើបាតុកម្មនៅមុខស្ថានទូតវៀតណាម ប្រចាំកម្ពុជា នៅថ្ងៃទី២១ ខែកក្កដា ខាងមុខនេះ។ លើសពីនេះ ពួកគេនឹងដាក់ញត្តិទៅកាន់ស្ថានទូតប្រទេសមហាអំណាចមួយចំនួន ដូចជា ស្ថានទូតបារាំង ស្ថានទូតចក្រភពអង់គ្លេស ស្ថានទូតសហរដ្ឋអាមេរិក ស្ថានទូតចិន ស្ថានទូតរុស្សី ដើម្បីឲ្យស្ថានទូតបរទេសទាំងនេះ ដាក់សម្ពាធលើរដ្ឋាភិបាលវៀតណាម ឲ្យទទួលស្គាល់ការពិតប្រវត្តិសាស្ត្រទឹកដីកម្ពុជាក្រោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។