ក្រុមប្រជាពលរដ្ឋ ព្រះសង្ឃ អង្គការ សមាគមខ្មែរកម្ពុជាក្រោម និងសម្ព័ន្ធយុវជនខ្មែរដើម្បីលទ្ធិប្រជាធិបតេយ្យរាប់រយនាក់ បន្តទៅប្រមូលផ្តុំគ្នានៅក្បែរស្ថានទូតវៀតណាម នៅរាជធានីភ្នំពេញ ដើម្បីទាមទារឲ្យរដ្ឋាភិបាលវៀតណាម សុំទោសពលរដ្ឋខ្មែរចំពោះការថ្លែងថា ទឹកដីកម្ពុជាក្រោមជាទឹកដីរបស់វៀតណាម យូរលង់មកហើយ។
ក្រុមព្រះសង្ឃ យុវជន និងពលរដ្ឋខ្មែររាប់រយនាក់បន្តតវ៉ានៅក្បែរស្ថានទូតវៀតណាម ឈានចូលដល់ទីពីរ នៅថ្ងៃអាទិត្យ ទី៥ តុលា។
ក្រុមអ្នកតវ៉ាស្រែកទាមទារឱ្យរដ្ឋាភិបាលវៀតណាម ទទូលស្គាល់ប្រវត្តិសាស្រ្តទឹកដីកម្ពុជាក្រោមពិតប្រាកដ និងសុំទោសខ្មែរជាសាធារណៈចំពោះការអះអាងរបស់មន្ត្រីនាំពាក្យស្ថានទូតវៀតណាម ដែលថា ទឹកដីកម្ពុជាក្រោមជារបស់ខ្លួនយូរមកហើយនោះ៖ «តវ៉ាដើម្បីឱ្យអ្នកឯងចុះមកសុំទោសខ្មែរជាដាច់ខាត ពីព្រោះអ្នកឯងបានប្រមាថកាតទាននៃប្រវត្តិសាស្ត្រខ្មែរពិត ទឹកដីកម្ពុជាក្រោម គឺជាទឹកដីដូនតាយើង។ ហេតុដូច្នេះ យើងមិនព្រមជាដាច់ខាតនូវទង្វើដ៏ខុសឆ្គងដែលអ្នកឯងបាននិយាយ»។
ការតវ៉ាដោយកំហឹងនៅថ្ងៃទី៥ តុលា ព្រះសង្ឃ និងពលរដ្ឋជាអ្នកតវ៉ាខ្លះបានជាន់ឈ្លី និងដុតទង់ជាតិវៀតណាម ជាច្រើនសន្លឹកទៀត នៅពេលពួកគាត់មិនទទួលការសុំទោសណាមួយ។ លើសពីនេះទៀត ក្រុមអ្នកតវ៉ានៅបន្តអំពាវនាវឱ្យពលរដ្ឋខ្មែរធ្វើពហិការឈប់ប្រើប្រាស់សេវា និងទំនិញរបស់វៀតណាម។
ទាក់ទងនឹងពហិការនេះ អ្នកវិភាគសង្គមឯករាជ្យ លោក កែម ឡី មានវាយតម្លៃថា ទោះជាការអំពាវនាវនេះមិនមានប្រសិទ្ធភាពក្ដី ក៏អាចជាបញ្ហាមួយធ្វើឱ្យប្រមុខរដ្ឋាភិបាលប្រទេសទាំងពីរពិចារណាដែរ ដើម្បីរកដំណោះស្រាយ៖ «ដំណោះស្រាយមិនមែនរឿងឈប់ទិញទំនិញវៀតណាមទេ។ ដំណោះស្រាយ (គឺ) រៀងពន្លត់បញ្ហា ហើយពន្លត់បញ្ហាហ្នឹងពន្លត់យ៉ាងដូចម្ដេច ពីព្រោះរឿងទំនិញវាមានផលប្រយោជន៍ពីគ្នាទៅវិញទៅមក។ វៀតគាត់ចំណេញនាំចូលទំនិញច្រើន ខ្មែរយើងក៏ចំណេញពន្ធគយពន្ធដារ ឬទំហំសេដ្ខកិច្ចដែរ គេហៅថា វ៉ូលូម (Volume) សេដ្ខកិច្ចនាំចូលនាំចេញហ្នឹងក៏មានចំណែកនៅក្នុងហ្នឹងដែរ។ អ៊ីចឹង មិនមែនជាជម្រើសល្អប៉ុន្មានទេ ប៉ុន្តែក៏ជម្រើសល្អសម្រាប់បាតុករដែរ ពីព្រោះចង់ឱ្យរដ្ឋាភិបាលទាំងពីរដោះស្រាយ»។
លោកថ្លែងថា ការដោះស្រាយបញ្ហានេះ គឺត្រូវអនុវត្តតាមរបៀបវិទ្យាសាស្ត្រ ដោយអ្នកប្រវត្តិសាស្ត្រអន្តរប្រទេសរៀបចំជាឯកសារផ្លូវការដើម្បីកុំឱ្យបន្តទៅកូនចៅជំនាន់ក្រោយទៀត។
ស្ថានទូតវៀតណាម បានផ្លាស់ប្ដូរអ្នកនាំពាក្យ គឺលោក ត្រឹង វ៉ាំងថុង បន្ទាប់ពីការថ្លែងថា ទឹកដីកម្ពុជាក្រោម ជារបស់វៀតណាម យូរលង់មកហើយ ហើយធ្វើឱ្យមានការតវ៉ានេះកើតឡើង។
ទាក់ទងនឹងបញ្ហាផ្លាស់ប្ដូរនេះដែរ ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍ថា ការផ្លាស់ប្ដូរនេះ មិនបានបង្ហាញច្បាស់ជាដំណោះស្រាយលើបញ្ហានេះទេ លុះត្រាតែមានសរសេរជាលាយលក្ខណ៍អក្សរ៖ «រឿងការផ្លាស់ប្ដូរទូត ឬអ្នកនាំពាក្យមិនមែនជាសំខាន់ទេ ពីព្រោះនេះជាជំហររបស់រដ្ឋាភិបាល។ រឿងការផ្លាស់ប្ដូរ ជួនទៅវាគ្រប់អាណត្តិរបស់គេ គ្រប់ពេលវេលាគេត្រូវដោះដូរ។ អ៊ីចឹង ដូរដោយមូលហេតុអី? បញ្ជាក់មកថាឥឡូវដោយសារមានបញ្ហាកំហុសដោយការនិយាយស្ដីអ្នកនាំពាក្យហ្នឹងខុសឆ្គងអី យើងចេញជាលាយលក្ខណ៍អក្សរកំណត់ការទូតមក គឺវាចប់បាត់ហើយបញ្ហានេះ។ អ៊ីចឹងបើថា យួនចង់បញ្ចប់ ហើយចង់ឱ្យនៅក្នុងមិត្តភាពល្អរវាងប្រទេសជិតខាង យួនអត់មានធ្វើអ៊ីចឹងទេ ហើយធ្វើការជាមួយរដ្ឋាភិបាលខ្មែរ ធ្វើកំណត់ការទូត ប្រជាពលរដ្ឋខ្មែរស្ងប់ចិត្តហើយ»។
ក្រុមអ្នកតវ៉ាក៏បានជេរដៀលជាតិសាសន៍វៀតណាមថា ចោរឈ្លានពាន និងលួចទឹកដីកម្ពុជា ហើយបំភ្លៃប្រវត្តិសាស្រ្តទឹកដីកម្ពុជាក្រោម ថាជារបស់ខ្លួន។ ក្រុមអ្នកតវ៉ាបានរំសាយនៅល្ងាចថ្ងៃទី៥ តុលា ហើយពួកគាត់ប្រកាសថា នឹងមកទាមទារនៅស្ថានទូតវៀតណាម ជារៀងរាល់ថ្ងៃរហូតដល់មានការសុំទោសពីរដ្ឋាភិបាលវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។