សហគមន៍ខ្មែរកម្ពុជាក្រោម បានចេញសេចក្ដីថ្លែងការណ៍មួយ ថ្កោលទោសចំពោះការបំភ្លៃការពិតនៃប្រវត្តិសាស្ត្ររបស់អ្នកនាំពាក្យស្ថានទូតវៀតណាម ប្រចាំកម្ពុជា ដែលថ្លែងថា កម្ពុជាក្រោមជាទឹកដីរបស់វៀតណាម តាំងពីយូរយារណាស់មកហើយ ហើយបារាំង មិនបានកាត់ទឹកដីខ្មែរកម្ពុជាក្រោមឲ្យវៀតណាម ទេ។
សហគមន៍ខ្មែរកម្ពុជាក្រោម ចាត់ទុកការបំភ្លៃប្រវត្តិសាស្ត្រនោះ ជាចេតនាអុជអាល បង្កឲ្យមានអំពើហិង្សា ឬរើសអើងពូជសាសន៍ ដោយសារតែប្រវត្តិទឹកដីអតីតកាល។
សហគមន៍ខ្មែរកម្ពុជាក្រោម សម្ដែងការសោកស្ដាយ និងប្រតិកម្មចំពោះសម្ដីអ្នកនាំពាក្យស្ថានទូតវៀតណាម នៅកម្ពុជា ទាក់ទងប្រវត្តិទឹកដីកម្ពុជាក្រោម។
អាណានិគមបារាំង បានកាត់ទឹកដីកម្ពុជាក្រោមចំនួន ២១ខេត្តក្រុង ដែលមានផ្ទៃដីទំហំជាង ៦ម៉ឺន ៨ពាន់គីឡូម៉ែត្រក្រឡា (៦៨.៩៦៥) ទៅឲ្យវៀតណាម កាន់កាប់ខុសច្បាប់ដោយគ្មានការឯកភាពយល់ព្រមពីពលរដ្ឋខ្មែរក្រោម កាលពីថ្ងៃទី៤ មិថុនា ឆ្នាំ១៩៤៩។
ប៉ុន្តែអ្នកនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាន់ថុង ថ្លែងកាលពីថ្ងៃទី៦ មិថុនា ឆ្នាំ២០១៤ ថា បារាំងមិនបានកាត់ទឹកដីខ្មែរកម្ពុជាក្រោមឲ្យវៀតណាមទេ តែកម្ពុជាក្រោមជាទឹកដីរបស់វៀតណាម តាំងពីយូរយារណាស់មកហើយ៖ «ព័ត៌មានបាត់បង់ទឹកដីគ្មានអ្វីជាមូលដ្ឋានទេ គ្មានអ្វីជាភស្តុតាងទេ»។
ការថ្លែងរបស់អ្នកនាំពាក្យរូបនេះ គឺធ្វើឡើងនៅគ្រាដែលអង្គការសហគមន៍ខ្មែរកម្ពុជាក្រោម រៀបចំពិធីរំលឹកខួប ៦៥ឆ្នាំនៃថ្ងៃបាត់បង់ទឹកដីកម្ពុជាក្រោម និងចំពេលដែលសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក នឹងចាប់ផ្ដើមធ្វើយុទ្ធនាការថ្មីមួយឈ្មោះថា «ផ្លូវឆ្ពោះទៅមាតុភូមិ» ដែលអំពាវនាវឲ្យពលរដ្ឋកម្ពុជា នៅតាមបណ្ដាប្រទេសជាច្រើនទៀតនៅលើពិភពលោក ធ្វើដំណើរទៅទឹកដីកម្ពុជាក្រោម ដែលបច្ចុប្បន្នកំពុងស្ថិតក្រោមការគ្រប់គ្រងរបស់វៀតណាម។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា គិតថា ការថ្លែងរបស់លោក ត្រឹង វ៉ាន់ថុង នេះ ជាចេតនាបំភ្លៃការពិតនៃប្រវត្តិសាស្ត្រ និងជាការបញ្ឈឺឲ្យពលរដ្ឋខ្មែរឈឺចាប់៖ «ខ្ញុំបានមើលឯកសារសម្ងាត់របស់យួន ក៏គេនិយាយអ៊ីចឹងដែរ គឺបង្រៀនកម្មាភិបាលខ្មែរកម្ពុជាក្រោមថា ទឹកដីកម្ពុជាក្រោមជាទឹកដីយួនតាំងពីយូរលង់ណាស់មកហើយ ជាអំណោយស្ដេចខ្មែរ។ ប៉ុន្តែទាំងអស់នេះ សុទ្ធតែជារឿងប្រឌិតបំភ្លៃប្រវត្តិសាស្ត្ររហូតដល់កុំឲ្យក្មេងជំនាន់ក្រោយហ្នឹងយល់ដឹង ហើយស្របនឹងខ្មែរយើងមិនចង់ឲ្យរំលឹកថែមទៀតផង វាអាចបាត់ គឺមិនមាននរណាដឹង នរណាយល់ បើយួនគេចេញប្រកាសថា ជារបស់គេដែរ រីឯរដ្ឋាភិបាលខ្មែរចេញប្រតិកម្មតែគ្នាឯង ក្លាហានតែគ្នាឯង ពេលយួនគេនិយាយបំផ្លើស និយាយបញ្ឈឺ កាឡៃប្រវត្តិសាស្ត្រពិតប៉ុណ្ណឹងហើយ ខាងរដ្ឋាភិបាលមួយមាត់មិននិយាយផង»។
លោកបន្តថា នៅទឹកដីកម្ពុជាក្រោម មានភស្តុតាងជាច្រើន រួមមានឈ្មោះវត្តអារាម ភូមិ ស្រុក ខេត្ត គឺសុទ្ធជាឈ្មោះភាសាខ្មែរសុទ្ធសាធ មិនមែនជាឈ្មោះជាភាសាវៀតណាមទេ។ ប៉ុន្តែអាជ្ញាធរវៀតណាម តែផ្លាស់ប្ដូរឈ្មោះទីតាំងទាំងនោះជាច្រើនលើកច្រើនសា ទៅជាភាសារបស់ខ្លួនដើម្បីបំបាត់ភស្តុតាងនៃភូមិសាស្ត្រ។
មួយទៀត ភស្តុតាងសំខាន់ដែលបដិសេធមិនបានទៅទៀតនោះ គឺមូលដ្ឋានអាណានិគមបារាំង កាត់ទឹកដីខ្មែរកម្ពុជាក្រោម ឲ្យទៅអាជ្ញាធរវៀតណាម ត្រួតត្រារហូតសព្វថ្ងៃ គឺយោងតាមច្បាប់អាណានិគមបារាំង លេខ ៤៩/៧៣៣ ចុះថ្ងៃទី៤ មិថុនា ឆ្នាំ១៩៤៩។
គិតត្រឹមថ្ងៃទី៤ មិថុនា ឆ្នាំ២០១៤ នេះ គឺមានរយៈពេល ៦៥ឆ្នាំគត់ ដែលខ្មែរកម្ពុជាក្រោមជាង ១០លាននាក់ជាម្ចាស់ទឹកដីម្ចាស់ស្រុក បានរស់នៅក្រោមការគ្រប់គ្រងរបស់វៀតណាម។ ប៉ុន្តែឯកសារផ្លូវការរបស់រដ្ឋការនៃប្រទេសវៀតណាម បង្ហាញថា ខ្មែរកម្ពុជាក្រោមជាង ១លាននាក់ប៉ុណ្ណោះ។
អ្នកនាំពាក្យស្ថានទូតវៀតណាម លោក ត្រឹង វ៉ាន់ថុង អះអាងថា ខ្មែរកម្ពុជាក្រោមជាជនជាតិដើមមួយក្នុងចំណោមជនជាតិ ៥៣ ផ្សេងទៀត ដែលរស់នៅទឹកដីវៀតណាម។ អាជ្ញាធរវៀតណាម តែងគោរពសិទ្ធិមនុស្សជនជាតិដើមទាំងអស់នោះ។
យ៉ាងណាសហព័ន្ធ និងអង្គការសហគមន៍ខ្មែរកម្ពុជាក្រោម ពិសេសពលរដ្ឋខ្មែរក្រោមដែលនិរទេសខ្លួនមករស់នៅកម្ពុជា ទម្លាយថា អាជ្ញាធរវៀតណាម តែងចាប់ព្រះសង្ឃផ្សឹកឆៅៗ និងចាប់ពលរដ្ឋខ្មែរក្រោមទៅកាត់ទោសឲ្យជាប់ពន្ធនាគារ ដោយគ្រាន់តែនាំគ្នាតវ៉ាឲ្យមានការសាងសង់សាលារៀនភាសាខ្មែរនៅក្នុងវត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។