មន្ត្រីខុទ្ទកាល័យព្រះបរមរាជវាំង លោក អ៊ុំ ដារាវុធ ឲ្យដឹងថា ព្រះមហាក្សត្រព្រះបរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនីនាថ សីហនុ នឹងយាងនិវត្តន៍ពីប្រទេសចិន មកកាន់ប្រទេសកម្ពុជាវិញ នៅល្ងាចថ្ងៃទី២៥ ខែមីនា តាមជើងយន្តហោះពិសេស។
ការយាងនិវត្តន៍នេះ នឹងមានថ្នាក់ដឹកនាំកំពូលៗច្រើនរូបនៃរាជរដ្ឋាភិបាលកម្ពុជា អញ្ជើញទទួលព្រះអង្គផង។ ប៉ុន្តែលោកមិនដឹងថា នឹងមានមេដឹកនាំគណបក្សប្រឆាំងបង្ហាញវត្តមានចំពោះការយាងនិវត្តន៍របស់ព្រះមហាក្សត្រ ឬបែបណានោះទេ៖ «តាមខ្ញុំដឹង គឺមានថ្នាក់ដឹកនាំរាជរដ្ឋាភិបាល រដ្ឋសភា ព្រឹទ្ធសភា សុទ្ធតែជាថ្នាក់ដឹកនាំធំៗ គឺមិនមានថ្នាក់រដ្ឋមន្ត្រីទេ អញ្ជើញទៅទទួលព្រះអង្គ គឺចាប់ពីថ្នាក់ឧបនាយករដ្ឋមន្ត្រីឡើងទៅ។ អាស៊ីសេរីទៅអង្កេតទៅមើល អាចមានខាងគណបក្សសង្គ្រោះជាតិទៅទេ? ខ្ញុំក៏ចង់ដឹងដែរ ពីព្រោះខ្ញុំអត់បានទៅដង្ហែលោកទេ គឺរង់ចាំដង្ហែលោកនៅព្រះបរមរាជវាំង»។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍នៅថ្ងៃអង្គារ ទី២៥ ខែមីនា ថា មិនបានដឹងព័ត៌មាននៃការយាងនិវត្តន៍របស់ព្រះមហាក្សត្រ និងព្រះមហាក្សត្រីយាងនិវត្តន៍ពីប្រទេសចិន នេះទេ ព្រោះមិនមានមន្ត្រីស្ថាប័នពាក់ព័ន្ធ ឬមន្ត្រីខុទ្ទកាល័យព្រះបរមរាជវាំងផ្ដល់ដំណឹងនេះទេ។ លោកថា រូបលោកនឹងថ្នាក់ដឹកនាំបក្សសង្គ្រោះជាតិ ផ្សេងទៀត មានបំណងទៅទទួលការយាងនិវត្តន៍របស់ព្រះមហាក្សត្រទាំងទ្វេដែរ ប៉ុន្តែព្រួយបារម្ភកើតមានបញ្ហា ដោយសារស្ថាប័នពាក់ព័ន្ធមិនជូនដំណឹង។
ព្រះមហាក្សត្រ សម្ដេចព្រះបរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនីនាថ សីហនុ ព្រះអង្គបានយាងទៅកាន់សាធារណរដ្ឋប្រជាមានិតចិន កាលពីថ្ងៃទី១៩ ខែកុម្ភៈ ឆ្នាំ២០១៤ ដើម្បីឲ្យគ្រូពេទ្យពិនិត្យព្រះរាជសុខភាពជារៀងរាល់ ៦ខែម្ដង ទៅតាមវេជ្ជបញ្ជារបស់វេជ្ជបណ្ឌិតប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕