មន្ត្រីខុទ្ទកាល័យព្រះបរមរាជវាំងបានអះអាងថា ព្រះករុណាព្រះមហាក្សត្រ អាចយាងធ្វើជាសាក្សីទៅលើលទ្ធផលនៃជំនួបចរចារវាងមន្ត្រីគណបក្សប្រជាជនកម្ពុជា និងគណបក្សសង្គ្រោះជាតិ បើសិនជាមេដឹកនាំគណបក្សណាមួយមិនទុកចិត្តគ្នា។
ប្រធានខុទ្ទកាល័យព្រះបរមរាជវាំង លោក អ៊ុំ តារាវុធ មានប្រសាសន៍នៅថ្ងៃច័ន្ទ ទី១៧ ខែកុម្ភៈ ថា ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះអង្គអាចយាងជាសាក្សីទៅលើលទ្ធផលនៃជំនួបចរចារវាងគណបក្សទាំងពីរនៅថ្ងៃអនាគត។
ទាក់ទិនបញ្ហានេះ ក្រុមការងារចរចាបច្ចេកទេសរបស់គណបក្សប្រជាជនកម្ពុជា និងគណបក្សសង្គ្រោះជាតិ បានកំណត់ថ្ងៃទី១៨ ខែកុម្ភៈ នាមន្ទីរព្រឹទ្ធសភា ដើម្បីជួបចរចាជាថ្មី បន្ទាប់ពីបានផ្អាកកាលពីដើមខែមករា។
ជំនួបចរចានេះ ក្រុមការងាររបស់គណបក្សនយោបាយនីមួយៗ មានសមាសភាពម្ខាង ៣នាក់។ គណបក្សប្រជាជនកម្ពុជា ដឹកនាំដោយលោក ព្រុំ សុខា រដ្ឋលេខាធិការក្រសួងមហាផ្ទៃ លោក កើត រិទ្ធិ រដ្ឋលេខាធិការក្រសួងយុត្តិធម៌ និងលោក សក់ សេដ្ឋា រដ្ឋលេខាធិការក្រសួងមហាផ្ទៃ។ រីឯក្រុមការងារគណបក្សសង្គ្រោះជាតិ ដឹកនាំដោយលោក សុន ឆ័យ ប្រធានក្រុមអ្នកតំណាងរាស្ត្រ លោក គួយ ប៊ុនរឿន និងលោក យ៉ែម បុញ្ញឫទ្ធិ។
មន្ត្រីគណបក្សនយោបាយទាំងពីរបានឲ្យដឹងថា ជំនួបចរចាជាថ្មីនៅព្រឹកថ្ងៃទី១៨ ខែកុម្ភៈ គ្រាន់តែជាជំនួបបច្ចេកទេសដើម្បីអនុវត្តកិច្ចព្រមព្រៀងចាស់ដែលគណបក្សទាំងពីរបានឯកភាពគ្នាលើការកែទម្រង់ការបោះឆ្នោត កាលពីខែកញ្ញា ឆ្នាំ២០១៣ កន្លងទៅ។
លោក ព្រុំ សុខា ប្រធានក្រុមការងារចរចាផ្នែកបច្ចេកទេស និងជាសមាជិកគណៈកម្មាធិការកណ្ដាលគណបក្សប្រជាជនកម្ពុជា។ លោកធ្លាប់ប្រាប់វិទ្យុអាស៊ីសេរីថា ជំនួបចរចាជាថ្មីនេះ គណបក្សប្រជាជនមានចេតនាពិតប្រាកដក្នុងការស្វែងរកដំណោះស្រាយឈានដល់បញ្ចប់បញ្ហានយោបាយនៅកម្ពុជា។ ហើយថា បក្សខ្លួនមានបំណងពិតប្រាកដក្នុងការធ្វើកំណែទម្រង់ការបោះឆ្នោត ដើម្បីឲ្យគ្រប់ភាគីពាក់ព័ន្ធអាចទទួលយកបាន។
សម្រាប់លោក កឹម សុខា អនុប្រធានគណបក្សសង្គ្រោះជាតិ បានសាទរព្រះមហាក្សត្រយាងជាជាសាក្សីទៅលើលទ្ធផលនៃជំនួបចរចា ដើម្បីបញ្ចប់វិវាទនយោបាយនៅកម្ពុជា។ ប៉ុន្តែលោកថា ជំនួបនៅថ្ងៃទី១៨ ខែកុម្ភៈ គ្រាន់តែជាជំនួបរវាងក្រុមការងារបច្ចេកទេសដើម្បីពិនិត្យទៅលើកិច្ចព្រមព្រៀងចាស់រវាងគណបក្សទាំងពីរ ស្ដីពីការធ្វើកំណែទម្រង់ការបោះឆ្នោត មុននឹងឈានទៅដល់ជំនួបកំពូល។
លោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត ដើម្បីការបោះឆ្នោតដោយត្រឹមត្រូវ និងយុត្តិធម៌នៅកម្ពុជា ហៅកាត់ថា និកហ្វិច (Nicfec)។ លោកបានស្នើដល់មេដឹកនាំគណបក្សឈ្នះអាសនៈសភានីតិកាលទី៥ ទាំងពីរ ត្រូវរួមគ្នាដោះស្រាយបញ្ហាក្រោយការបោះឆ្នោតដោយតម្កល់ផលប្រយោជន៍ជាតិនិងពលរដ្ឋជាធំ ព្រោះថា កម្ពុជាមិនមែនជាកម្មសិទ្ធិរបស់បុគ្គល ឬគណបក្សនយោបាយណាមួយទេ។
ការបោះឆ្នោតនីតិកាលទី៥ បានចាប់ផ្ដើមកាលពីថ្ងៃទី២៨ ខែកក្កដា ឆ្នាំ២០១៣។ ការបោះឆ្នោតនេះ គណៈកម្មាធិការជាតិរៀបចំការបោះឆ្នោត (គ.ជ.ប.) បានបង្ហាញថា គណបក្សប្រជាជនកម្ពុជា ឈ្នះបានអាសនៈសភាចំនួន ៦៨ ចំណែកគណបក្សសង្គ្រោះជាតិទទួលបាន ៥៥អាសនៈ។ ប៉ុន្តែគណបក្សសង្គ្រោះជាតិ មិនព្រមទទួលយកលទ្ធផលនេះទេ ដោយចោទថា មានការបន្លំសន្លឹកឆ្នោត និងបន្តតវ៉ាទាមទាររកយុត្តិធម៌លើលទ្ធផលបោះឆ្នោត ឬសុំឲ្យបោះឆ្នោតឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។