ព្រះមហាក្សត្រ ព្រះករុណា ព្រះបាទ នរោត្តម សីហមុនី និងព្រះមាតា សម្ដេចព្រះមហាក្សត្រី នរោត្តម មុនីនាថ សីហនុ យាងនិវត្តន៍មកដល់ប្រទេសកម្ពុជា វិញ បន្ទាប់ពីព្រះអង្គបានយាងចេញពីប្រទេសទៅទីក្រុងប៉េកាំង សាធារណរដ្ឋប្រជាមានិតចិន កាលពីថ្ងៃទី១២ ខែសីហា ឆ្នាំ២០១៣ ដើម្បីទៅពិនិត្យព្រះរាជសុខភាពព្រះអង្គ តាមការកំណត់រៀងរាល់ ៦ខែម្ដង។
មានឥស្សរជនជាន់ខ្ពស់រដ្ឋាភិបាលពីខាងគណបក្សប្រជាជនកម្ពុជា និងថ្នាក់ដឹកនាំគណបក្សសង្គ្រោះជាតិ ជាច្រើនរូប នៅចាំទទួលស្វាគមន៍ធ្វើបដិសណ្ឋារកិច្ចព្រះអង្គទាំងពីរ យាងចុះពីព្រះទីនាំង នៅឯព្រលានយន្តហោះភ្នំពេញអន្តរជាតិ។ ក៏ប៉ុន្តែ គេសង្កេតឃើញថា មេដឹកនាំគណបក្សនយោបាយធំទាំងពីរ គឺលោកនាយករដ្ឋមន្ត្រី ហ៊ុន សែន និងលោក សម រង្ស៊ី មិនបានជួបស្វាគមន៍ ឬពិភាក្សាគ្នាអ្វីបន្តិចទេ នៅក្នុងឱកាសនោះ។
មុននឹងយាងមកប្រទេសកម្ពុជា វិញ ២ថ្ងៃ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី បានចេញព្រះរាជសារមួយច្បាប់ជូនប្រធានគណៈកម្មាធិការជាតិរៀបចំការបោះឆ្នោត គឺលោក អ៊ឹម សួស្ដី ថា ព្រះអង្គនឹងកោះអញ្ជើញសមាជិកសភាដែលទើបជាប់ឆ្នោតសម្រាប់នីតិកាលទី៥ ទាំង ១២៣រូប ដើម្បីប្រជុំជាលើកដំបូងនៅថ្ងៃទី២៣ កញ្ញា ឆ្នាំ២០១៣។
ចំពោះសំណួរទាក់ទងនឹងប្រធានបក្សសង្គ្រោះជាតិ គឺលោក សម រង្ស៊ី ដែលថា តើលោកនឹងសុំទៅព្រះមហាក្សត្រឱ្យពន្យារពេលប្រជុំសភាលើកដំបូងនៅថ្ងៃទី២៣ ខាងមុខនេះទេ? ហើយតើលោកនឹងចូលរួមប្រជុំឬទេ? លោក សម រង្ស៊ី ថ្លែងថា លោកមិនទាន់អាចនិយាយមុនបានទេ។
លោក សម រង្ស៊ី នៅពេលនេះ នៅតែរក្សាជំហរថា លោកនឹងដឹកនាំធ្វើមហាបាតុកម្មអហិង្សារយៈពេល ៣ថ្ងៃដដែល គឺចាប់ពីថ្ងៃអាទិត្យ ទី១៥ ដល់ថ្ងៃទី១៧ កញ្ញា ដើម្បីទាមទារឲ្យបង្កើតគណៈកម្មការចម្រុះឯករាជ្យមួយ ស៊ើបអង្កេតភាពមិនប្រក្រតីនៃការបោះឆ្នោត។ លោកបញ្ជាក់បន្ថែមថា លោកនឹងជួបជាមួយពលរដ្ឋម្ចាស់ឆ្នោតនៅខេត្តសៀមរាប នៅថ្ងៃទី១២ កញ្ញា ដើម្បីជម្រាបពលរដ្ឋអំពីជំហររបស់គណបក្សសង្គ្រោះជាតិ ក្នុងការធ្វើមហាបាតុកម្មអហិង្សានេះ។
រីឯសំណួរថា តើនឹងមានជំនួបកំពូលណាមួយរវាងអ្នកដឹកនាំគណបក្សឈ្នះឆ្នោតទាំងពីរ ដើម្បីដោះស្រាយបញ្ហានយោបាយកំពុងជាប់គាំងនេះឬទេ? អនុប្រធានគណបក្សសង្គ្រោះជាតិ លោក កឹម សុខា បញ្ជាក់ថា នៅមិនទាន់មានដំណឹងនៅឡើយទេ ដោយរង់ចាំមើលបន្តិចទៀតសិន។
ដោយឡែក ថ្នាក់ដឹកនាំគណបក្សប្រជាជនកម្ពុជា ជាពិសេសលោកនាយករដ្ឋមន្ត្រី ហ៊ុន សែន មិនបានធ្វើអត្ថាធិប្បាយអ្វីទេនៅក្នុងពិធីទទួលព្រះមហាក្សត្រនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។