ប្រជាពលរដ្ឋ ៨០០គ្រួសារ ភាគច្រើនជាជនជាតិដើមភាគតិចមកពីស្រុក ៨ ក្នុងខេត្តរតនគិរី ត្រូវបានអាជ្ញាធរខេត្តរៀបចំទទួលស្វាគមន៍ព្រះមហាក្សត្រនៅឯតំបន់ជនជាតិដើមភាគតិចទំពួន ក្នុងភូមិយ៉ែម ឃុំស៊ឺង ស្រុកបរកែវ នៅថ្ងៃទី២ ខែមីនា។
នេះជាព្រះរាជដំណើរទស្សនកិច្ចលើកដំបូងរបស់អង្គព្រះមហាក្សត្រ ដែលសព្វព្រះទ័យយាងមកកាន់តំបន់ដាច់ស្រយាលជួបប្រជារាស្ត្រ ជាពិសេសកូនចៅជាជនជាតិដើមភាគតិចមានទំពួន គ្រឹង ចារ៉ាយ និងប្រជាពលរដ្ឋខ្មែររស់នៅខេត្តប៉ែកឦសានមួយនេះ។
មានព្រះរាជបន្ទូលទៅកាន់ពលរដ្ឋអ្នកមកទទួលព្រះរាជដំណើរទស្សនកិច្ច ព្រះមហាក្សត្រសម្ដែងព្រះទ័យរីករាយ និងពាំនាំព្រះរាជបណ្ដាំសួរសុខទុក្ខរបស់សម្ដេចព្រះវររាជមាតាជាតិ នរោត្តម មុនីនាថ សីហនុ រំលឹកដល់ដួងវិញ្ញាណក្ខន្ធព្រះបរមរតនកោដ្ឋ ព្រះវររាជបិតាជាតិ សម្ដេច នរោត្តម សីហនុ ដែលបានយាងចាកលោកទៅហើយ និងនាំមកនូវអំណោយជួយសម្រាលជីវភាពរស់នៅរបស់ពលរដ្ឋក្រីក្រទៀតផង។
ព្រះអង្គសម្ដែងព្រះទ័យកោតសរសើរដល់ប្រមុខរាជរដ្ឋាភិបាល អាជ្ញាធរមូលដ្ឋាន និងប្រជាពលរដ្ឋដែលបានរៀបចំអភិវឌ្ឍន៍ខេត្តរតនគិរី ឲ្យមានការរីកចម្រើន៖ «សម្ដេចម៉ែនិងខ្ញុំតែងតែមានហរទ័យខ្វល់ខ្វាយជានិច្ចចំពោះសេចក្ដីសុខទុក្ខរបស់បងប្អូនប្រជារាស្ត្រនៅទូទាំងព្រះរាជាណាចក្រកម្ពុជា ដើម្បីជួយសម្រាលទុក្ខលំបាក ខ្វះខាតរបស់បងប្អូន ជាពិសេសក្នុងជីវភាពរស់នៅប្រចាំថ្ងៃ»។
អំណោយព្រះមហាក្សត្រដែលបានប្រទានចំពោះពលរដ្ឋក្នុងមួយគ្រួសារៗ រួមមាន បា្រក់ ១០ម៉ឺនរៀល អង្ករ ៥០គីឡូក្រាម មីមួយកេះ កន្ទេល ១ ត្រីខ ១០កំប៉ុង ភួយ មុង ក្រមា និងអាវយឺត។ ក្នុងព្រះរាជដំណើរយាងមកកាន់ខេត្តរតនគិរី នេះ ព្រះមហាក្សត្រសព្វព្រះទ័យយាងទតបឹងយក្សឡោម ដ៏ល្បីល្បាញក្នុងខេត្តផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។