រដ្ឋមន្ត្រីក្រសួងការពារជាតិ លោកនាយឧត្ដមសេនីយ៍ ទៀ បាញ់ និងជាឧបនាយករដ្ឋមន្ត្រី បានប្រកាសថា ការបាញ់គ្រាប់ពិតសាកល្បងនៃកាំភ្លើងធុនធំ BM-21 និង ១៣០មមនោះ គឺបានបាញ់ចំគោលដៅ ១០០% នៅថ្ងៃទី២ ខែមេសា នៅស្រុកភ្នំស្រួច ខេត្តកំពង់ស្ពឺ។ នេះបានបង្ហាញថា កងទ័ពកម្ពុជា និងកាំភ្លើងធុនធំនោះ មានសមត្ថភាពគ្រប់គ្រាន់ និងប្រសិទ្ធភាពក្នុងការការពារបូរណភាពទឹកដីកម្ពុជា។
នៅក្នុងការធ្វើសមយុទ្ធបាញ់គ្រាប់ពិតនោះ គេបានដាក់ពង្រាយកាំភ្លើងធុនធំ BM-21 ឬកាំភ្លើងប្រតិកម្មចំនួន ១០គ្រឿង រថក្រោះប្រយុទ្ធចំនួន ១៥គ្រឿង និងកាំភ្លើង ១៣០មម ចំនួន ១០គ្រឿងដែរ។
ក្រៅពីនេះ ក្រសួងការពារជាតិក៏បានបាញ់គ្រាប់ពិតនៃកាំភ្លើង ៨០កាណុងដ៏ទំនើបមួយគ្រឿង ដែលមានសមត្ថភាពបញ្ជូនគ្រាប់ដោយស្វ័យប្រវត្ត តម្រង់ទិសដោយស្វ័យប្រវត្ត និងបាញ់ដោយស្វ័យប្រវត្ត ក្រោមការត្រួតពិនិត្យតាមប្រព័ន្ធកុំព្យូទ័រ (Computer System)។
ប្រភពពីមន្ត្រីយោធាបានឲ្យដឹងថា គ្រាប់កាំភ្លើងធុនធំទាំងនោះ គឺបាញ់បានចម្ងាយរវាង ១៦គីឡូម៉ែត្រ ទៅ ២០គីឡូម៉ែត្រ និងឆ្ងាយជាងនេះទៀតក៏មាន។ កាំភ្លើងធុនធំ BM-21 ឬកាំភ្លើងប្រតិកម្មនោះ គេអាចបាញ់ម្ដង ១គ្រាប់ៗ ឬបាញ់ផ្គុំគ្នាដើម្បីបំផ្លាញបន្ទាយយោធា ឬបំផ្លាញឃ្លាំងរបស់ខ្មាំងសត្រូវជាដើម។
លោកនាយឧត្ដមសេនីយ៍ ទៀ បាញ់ បានមានប្រសាសន៍ប្រាប់អ្នកកាសែតក្រោយពីការបាញ់គ្រាប់ពិតនោះថា យើងធ្វើនេះមិនមែនជាការគំរាមចំពោះប្រទេសណាមួយទេ ប៉ុន្តែមានសមត្ថភាពគ្រប់គ្រាន់ ដើម្បីការពារបូរណភាពទឹកដីកម្ពុជា នៅគ្រាដែលមានការឈ្លានពានណាមួយ៖ «នេះគឺយើងបកស្រាយតែរឿងបច្ចេកវិទ្យានៃផ្នែកអនុភាពអាវុធរបស់យើងទេ ដូច្នេះយើងអត់មានបញ្ជាក់ទៅវែងឆ្ងាយរឿងហ្នឹង រឿងហ្នឹងផ្លូវច្បាប់ រឿងតុលាការ គឺយើងអត់ពាក់ព័ន្ធទៅជាមួយផ្លូវច្បាប់ទេ គឺភារកិច្ចរបស់យើងហ្នឹង គឺបន្ទាប់ពីការហ្វឹកហ្វឺន គឺយើងបញ្ជាក់អំពីប្រសិទ្ធភាពរបស់វា តាមបច្ចេកវិទ្យាដែលបានហ្វឹកហ្វឺនហ្នឹងឲ្យបានមើលឃើញថា ប្រសិទ្ធភាពរបស់វាហ្នឹង គឺឆ្លើយតបតាមតម្រូវការយើងចង់បាន»។
ជាមួយគ្នានេះ អគ្គបញ្ជាការរងនៃកងយោធពលខេមរភូមិន្ទកម្ពុជា លោកឧត្ដមសេនីយ៍ឯក អ៊ិត សារ៉ាត់ បានប្រកាសថា សមយុទ្ធបាញ់គ្រាប់ពិត BM-21 និង ១៣០មម នៅពេលនេះ ទទួលបានជោគជ័យ ១០០%៖ «ដោយបានការអនុញ្ញាតដ៏ខ្ពង់ខ្ពស់ពីសម្ដេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្ដមឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឲ្យកងយោធពលខេមរភូមិន្ទ ចាត់តាំងបាញ់គ្រាប់ពិតកាំភ្លើងប្រតិកម្ម BM-21និងកាំភ្លើង ១៣០មម ព្រមទាំងលំហាត់វរសេនាតូចរថក្រោះ រថពាស់ដែក សហការជាមួយកងចម្រុះបាញ់គ្រាប់ពិត ថ្ងៃនេះយើងបានអនុវត្តជាក់ស្ដែងប្រកបដោយជោគជ័យ និងជាមោទនភាពយ៉ាងក្រៃលែងសម្រាប់កងយោធពលខេមរភូមិន្ទ ក្នុងបុព្វហេតុការពារជាតិ មាតុភូមិអង្គរបវរនៃយើង»។
សមយុទ្ធបាញ់គ្រាប់ពិតនេះ គឺជាការពង្រឹងសមត្ថភាព និងប្រសិទ្ធភាពនៃកាំភ្លើងធុនធំ ព្រមទាំងកងយោធពលខេមរភូមិន្ទកម្ពុជា នៅមុនពេលដែលតុលាការយុត្តិធម៌អន្តរជាតិ (ICJ) គ្រោងបកស្រាយសាលក្រមនៃសំណុំរឿងប្រាសាទព្រះវិហារ ឆ្នាំ១៩៦២ នៅថ្ងៃ១៩ និងថ្ងៃ២០ ខែមេសា ខាងមុខនេះ។
ក្រសួងការពារកម្ពុជា ធ្លាប់បានបាញ់គ្រាប់ពិតសាកល្បងរួចម្ដងហើយ កាលពីខែមេសា ឆ្នាំ២០១០ កន្លងទៅ នៅខេត្តកំពង់ឆ្នាំង នៅគ្រាដែលកងទ័ពថៃ ព្យាយាមឈ្លានពានដណ្ដើមកាន់កាប់តំបន់ប្រាសាទព្រះវិហារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។