សមយុទ្ធដឹកជញ្ជូនតាមផ្លូវអាកាសតំបន់អាស៊ីប៉ាស៊ីហ្វិក ឆ្នាំ២០១៣ បានរៀបចំឡើងដោយកងកម្លាំងទ័ពសហរដ្ឋអាមេរិក និងកងទ័ពអាកាសខេមរភូមិន្ទកម្ពុជា នៅថ្ងៃទី៦ ខែមិថុនា នាស្រុកសំរោងទង ខេត្តកំពង់ស្ពឺ និងមានទ័ពអាកាសចំនួន ១០០នាក់ផ្សេងទៀតមកពី ២០ប្រទេស ក៏បានចូលរួមដែរ។
ឯកអគ្គរដ្ឋទូតសហរដ្ឋអាមេរិក លោក វីល្លៀម ថត (William E. Todd) បានចូលរួមពិនិត្យការធ្វើលំហាត់សមយុទ្ធនោះដល់ស្រុកសំរោងទង ខេត្តកំពង់ស្ពឺ។ ក្នុងឱកាសនោះដែរ លោកបានឲ្យដឹងតាមសំឡេងអ្នកបកប្រែភាសា ដោយចាត់ទុកការធ្វើសមយុទ្ធដែលកម្ពុជា ធ្វើជាម្ចាស់ផ្ទះពេលនេះ ចង់បង្ហាញពីការពង្រឹងទំនាក់ទំនងយោធាពហុភាគី ពិសេសរវាងប្រទេសកម្ពុជា និងសហរដ្ឋអាមេរិក។
លោកបន្តថា ការធ្វើសមយុទ្ធនេះ ក៏ដើម្បីបង្ហាញពីការតាំងចិត្ត និងការត្រៀមផ្តល់ជំនួយរបស់សហរដ្ឋអាមេរិក ចំពោះប្រជាជនកម្ពុជា ក្នុងគ្រាជួបគ្រោះមហន្តរាយធម្មជាតិនៅថ្ងៃអនាគត៖ «ខ្ញុំមិនអាចនិយាយជំនួសប្រទេសចំនួន ២០បានទេ។ ប៉ុន្តែសម្រាប់សហរដ្ឋអាមេរិកមួយ យើងបានប្ដេជ្ញាចិត្តថា បើមានគ្រោះមហន្តរាយកើតឡើង យើងនឹងមកទីនេះដើម្បីជួយ។ យើងបានជួយកន្លងមក ហើយនឹងជួយបន្តទៀត»។
លំហាត់សមយុទ្ធដឹកជញ្ជូនតាមផ្លូវអាកាសតំបន់ប៉ាស៊ីហ្វិក ក្នុងការផ្ដល់ជំនួយសង្គ្រោះមហន្តរាយ ពីសហគមន៍អន្តរជាតិនេះ បានចាប់ផ្ដើមឡើងនៅឆ្នាំ២០០៧ និងមានប្រទេសមកពីតំបន់អាស៊ីប៉ាស៊ីហ្វិក និងអាស៊ីខាងកើតចំនួន ២០ប្រទេសចូលរួមជាសមាជិក។ សមយុទ្ធនេះរៀបចំឡើងក្នុងរយៈពេល ២ឆ្នាំម្ដង។
ឯកអគ្គរដ្ឋទូតសហរដ្ឋអាមេរិក បានហៅសមយុទ្ធដឹកជញ្ជូនតាមផ្លូវអាកាសតំបន់អាស៊ីប៉ាស៊ីហ្វិក ថាចង់បង្ហាញពីការលើកកម្ពស់ការសម្របសម្រួលការដឹកជញ្ជូនតាមផ្លូវអាកាសក្នុងចំណោមកងកម្លាំងទ័ពអាកាសនៅក្នុងតំបន់ ហើយផ្តល់ជំនួយមនុស្សធម៌ និងជំនួយសង្គ្រោះមហន្តរាយពហុភាគី។
សមយុទ្ធដឹកជញ្ជូនតាមផ្លូវអាកាសនេះ បានផ្ដើមពីថ្ងៃទី៣ និងបញ្ចប់នៅថ្ងៃទី៧ ខែមិថុនា ហើយសមយុទ្ធនេះមានយន្តហោះដឹកជញ្ជូនប្រភេទ ស៊ី-១៣៥ (C-135) របស់កងទ័ពអាកាសសហរដ្ឋអាមេរិក ទ័ពអាកាសប្រទេសថៃ និងទ័ពអាកាសមកពីប្រទេសម៉ាឡេស៊ី ចូលរួមក្នុងយុទ្ធនាការនេះ។
លោកឧត្ដមសេនីយ៍ឯក សួន សំណាង មេបញ្ជាការកងទ័ពអាកាសកម្ពុជា និងលោកឧត្ដមសេនីយ៍ទោ រ៉ូសស៊ែល ហែនឌី (Russell Handy) មកពីកងកម្លាំងទ័ពអាកាសសហរដ្ឋអាមេរិក បានដើរតួនាទីសកម្មនៃការធ្វើលំហាត់សមយុទ្ធនៅថ្ងៃទី៦ ខែមិថុនា ដោយអ្នកទាំងពីរបានជិះនៅលើយន្តហោះប្រភេទ ស៊ី-១៣៥ ជាមួយគ្នា។
ទាំងកងទ័ពអាកាសកម្ពុជា និងទ័ពអាកាសសហរដ្ឋអាមេរិក បានចាត់ទុកការធ្វើលំហាត់សមយុទ្ធនេះ ថាបានផ្ដល់នូវបច្ចេកទេសដ៏សំខាន់ក្នុងការងារជួយសង្គ្រោះជនរងគ្រោះពីគ្រោះមហន្តរាយផ្សេងៗនៅថ្ងៃខាងមុខ។
អនុសេនីយ៍ឯក ចាស្ទីន ហាហ្វី (Justin Hauffe) មេបញ្ជាការទីលានទម្លាក់ជំនួយមនុស្សធម៌នៃកងទ័ពអាកាសសហរដ្ឋអាមេរិក បានឲ្យដឹងតាមសំឡេងអ្នកបកប្រែភាសានាទីលានធ្វើលំហាត់សមយុទ្ធខេត្តកំពង់ស្ពឺ ដោយមានជំនឿថា សមយុទ្ធនេះ និងផ្ដល់បទពិសោធន៍ដល់ទ័ពអាកាសជាសមាជិកក្នុងការជួយសង្គ្រោះជនរងគ្រោះពេលជួបគ្រោះធម្មជាតិផ្សេងៗ៖ «តាមរយៈសមយុទ្ធនេះនឹងផ្តល់បទពិសោធន៍ឲ្យយើង ដើម្បីធ្វើការជួយឧបត្ថម្ភ ឬដើម្បីជួយសង្គ្រោះក្នុងករណីកើតមានគ្រោះធម្មជាតិនៅពេលខាងមុខ។ ហើយយើងគិតថា នឹងផ្ដល់ផលប្រយោជន៍ដល់យើងទាំងអស់គ្នា ដើម្បីជួយសង្គ្រោះដល់ប្រជាជនដែលរងគ្រោះ ឬជួបគ្រោះធម្មជាតិនៅពេលខាងមុខ»។
សេចក្ដីប្រកាសព័ត៌មានស្ថានទូតសហរដ្ឋអាមេរិក បានឲ្យដឹងថា សមាជិក ២០ប្រទេស ដែលចូលរួមលំហាត់សមយុទ្ធដឹកជញ្ជូនតាមផ្លូវអាកាសតំបន់ប៉ាស៊ីហ្វិក មានដូចជា ប្រទេសបង់ក្លាដេស ប្រ៊ុយណេ កម្ពុជា កាណាដា ឥណ្ឌា ឥណ្ឌូនេស៊ី ឡាវ ម៉ាល់ឌីវ ម៉ាឡេស៊ី ម៉ុងហ្គោលី នេប៉ាល់ ប៉ាពូញូវហ្គីណេ (Papua New Guinea) ហ្វីលីពីន សិង្ហបុរី ស្រីលង្កា ថៃ តុងហ្គា សហរដ្ឋអាមេរិក និងប្រទេសអូស្ត្រាលី។
សហរដ្ឋអាមេរិក បានចាត់ទុកសមយុទ្ធដឹកជញ្ជូនតាមផ្លូវអាកាសរួមគ្នានេះ ថាជាការជំរុញកិច្ចសហប្រតិបត្តិការ និងការសម្របសម្រួលផ្នែកយោធាក្នុងការដឹកជញ្ជូនតាមផ្លូវអាកាសក្នុងចំណោមប្រទេសនៅតំបន់ប៉ាស៊ីហ្វិក និងអាស៊ីខាងកើត ហើយនឹងផ្ដល់ជាមធ្យោបាយមួយសម្រាប់ផ្លាស់ប្ដូរបច្ចេកទេសគ្នាក្នុងការងារដឹកជញ្ជូនតាមផ្លូវអាកាស និងផ្លូវដី ដើម្បីគោលបំណងមនុស្សធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។