ក្រសួងមហាផ្ទៃ យល់ព្រមឲ្យគណបក្សសង្គ្រោះជាតិ ធ្វើបាតុកម្មអហិង្សានៅថ្ងៃអាទិត្យ ចុងសប្ដាហ៍នេះ ប៉ុន្តែមិនឲ្យដង្ហែក្បួនឡើយ ដោយសំអាងថា គណបក្សនេះខ្វះសមត្ថភាពក្នុងការគ្រប់គ្រងកម្លាំង។
លិខិតរបស់របស់រដ្ឋមន្ត្រីក្រសួងមហាផ្ទៃ លោក ស ខេង ចេញថ្ងៃទី១៣ ខែធ្នូ ផ្ញើជូនសាលារាជធានីភ្នំពេញ បានបញ្ជាក់ថា គណបក្សសង្គ្រោះជាតិ ធ្វើបាតុកម្មអហិង្សាចំនួន ១ថ្ងៃ គឺថ្ងៃអាទិត្យ ទី១៥ ខែធ្នូ។ បាតុកម្មនោះអាចចាប់ពីម៉ោង ៦ព្រឹក ហើយត្រូវបញ្ចប់នៅម៉ោង ៦ល្ងាច ដោយកំណត់ចំនួនអ្នកចូលចូលរួមមិនឲ្យលើសពី ១ម៉ឺននាក់ ដែលជាចំនួនសមាមាត្រទៅនឹងទំហំផ្ទៃក្រឡានៃទីលានប្រជាធិបតេយ្យ។ ចំណែកបាតុកម្មនៅលើកក្រោយណាមួយទៀត គណបក្សសង្គ្រោះជាតិ ត្រូវជូនដំណឹងទៅអាជ្ញាធរសមត្ថកិច្ចសាជាថ្មី។
ទាក់ទិននឹងការហាមប្រាមគម្រោងហែក្បួនរបស់បាតុករគណបក្សសង្គ្រោះជាតិ ក្រសួងមហាផ្ទៃ បានលើកហេតុផលថា ដើម្បីធានាសន្តិសុខ សណ្ដាប់ធ្នាប់សាធារណៈ និងឆ្លងតាមការធ្វើបាតុកម្មនាពេលកន្លងទៅបានបង្ហាញថា គណបក្សនេះពុំមានលទ្ធភាពគ្រប់គ្រាន់ក្នុងការគ្រប់គ្រងកម្លាំងឡើយ។
ប្រធានគណបក្សសង្គ្រោះជាតិ លោក សម រង្ស៊ី ពុំបានឆ្លើយតបនឹងបម្រាមដែលចេញដោយក្រសួងមហាផ្ទៃ នេះទេ គឺគ្រាន់តែបានលើកឡើងថា លោកទុកអោយមន្ត្រីទទួលបន្ទុកបន្តពិភាក្សាបញ្ហានេះ។
«សំឡេង»
លោក ហូរ វ៉ាន់ ដែលទទួលបន្ទុកចរចាជាមួយសមត្ថកិច្ច សុំច្បាប់ធ្វើបាតុកម្ម បានបញ្ជាក់ថា គណបក្សបានសម្រេចថាបាតុកម្មនៅថ្ងៃទី១៥ ខែធ្នូ នេះនឹងមិនមានការហែក្បួនឡើយ គឺគ្រាន់តែជាការជួបប្រជុំគ្នានៅទីលានប្រជាធិបតេយ្យ ដោយចាប់ផ្ដើមពីម៉ោង ២រសៀល។ យ៉ាងណា លោក ហូរ វ៉ាន់ អះអាងថា នៅថ្ងៃអាទិត្យ សប្ដាហ៍ក្រោយៗទៀត ដោយគិតចាប់ពីថ្ងៃទី២២ ខែធ្នូ តទៅ នឹងមានការហែក្បួន ហើយជាការតវ៉ាទាំងយប់ទាំងថ្ងៃ។
ចំពោះមន្ត្រីអ្នកឃ្លាំមើលសិទ្ធិមនុស្ស លោក អំ សំអាត មានប្រសាសន៍ថា ក្រសួងមហាផ្ទៃ មិនគួរហាមប្រាមការហែក្បួនបាតុកម្ម ដោយសំអាងហេតុផលសន្តិសុខ សុវត្ថិភាពឡើយ។ លោកបន្តថា ទាំងអ្នកធ្វើបាតុកម្ម និងអាជ្ញាធរ គួរសម្របសម្រួលដោះស្រាយចំណុចខ្វះខាត ដើម្បីអោយពលរដ្ឋបានអនុវត្តសិទ្ធិសេរីភាពរបស់ខ្លួន។
«សំឡេង»
កាលពីយប់ថ្ងៃទី១៥ ខែកញ្ញា កន្លងទៅ ដែលជាថ្ងៃទី១នៃមហាបាតុកម្មលើកដំបូងរបស់គណបក្សសង្គ្រោះជាតិ មានយុវជនម្នាក់ ឈ្មោះ ម៉ៅ សុខចន្ទ ត្រូវស្លាប់ដោយគ្រាប់កាំភ្លើង នៅក្នុងការប៉ះទង្គិចមួយនៅស្ពានអាកាសក្បាលថ្នល់។ ករណីនេះ អ្នកឃ្លាំមើលសិទ្ធិមនុស្សចាត់ទុកថា បញ្ហានោះបានកើតចេញពីការរារាំងបិទផ្លូវរបស់សមត្ថកិច្ច ដែលធ្វើអោយពលរដ្ឋមានការខឹងសម្បារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។