បណ្ដាញព្រះសង្ឃឯករាជ្យ និងប្រជាពលរដ្ឋអ្នកគាំទ្រអតីតព្រះចៅ អធិការវត្តភ្នំខ្ពស់ ប្រមាណ ១០០នាក់និងអង្គ ធ្វើបាតុកម្មនៅក្នុងបរិវេណទីលានវត្តពោធិ៍វាល ក្រុងបាត់ដំបង ខេត្តបាត់ដំបង ដើម្បី ដាក់សម្ពាធឲ្យលេខាមេគណខេត្តដោះស្រាយផ្ដល់តំណែងព្រះចៅអធិការវត្តឡើងវិញ។ ការតវ៉ានេះបន្ទាប់ពីអាជ្ញាធរ និងគណៈសង្ឃស្រុកបាណន់ ដកហូតតំណែងព្រះចៅអធិការវត្តភ្នំខ្ពស់ កាលពីថ្ងៃទី១៩ កន្លងទៅ។
បន្ទាប់ពីបណ្ដាញព្រះសង្ឃ និងប្រជាពលរដ្ឋអ្នកគាំទ្រធ្វើបាតុកម្មប្រមាណមួយម៉ោង សមត្ថកិច្ចខេត្តបាត់ដំបង បានយល់ព្រមបណ្ដោះអាសន្នតាមរយៈការឆ្លងឆ្លើយតាមទូរស័ព្ទជាមួយតំណាងបណ្ដាញ ព្រះសង្ឃឯករាជ្យ ក្នុងពេលធ្វើបាតុកម្មនៅរសៀលថ្ងៃទី២២ តុលា។
ក្នុងកិច្ចព្រមព្រៀងនោះ អាជ្ញាធរខេត្តសន្យាថា នឹងដោះស្រាយឲ្យអតីតព្រះចៅអធិការវត្តភ្នំខ្ពស់ ធ្វើជាប្រធានសង្ឃដឹកនាំក្នុងវត្តបណ្ដោះអាសន្ន។
ស្ថាបនិកបណ្ដាញព្រះសង្ឃឯករាជ្យ ព្រះតេជព្រះគុណ ប៊ុត ប៊ុនតិញ មានព្រះថេរដីកាតាមឧបករណ៍ បំពងសំឡេងថា ដើមចមសំខាន់ដែលនាំឲ្យដកព្រះចៅអធិការវត្តភ្នំខ្ពស់ ចេញពីតំណែងនោះ ដោយសារព្រះតេជព្រះគុណ ភួន មុនី លេខាព្រះមេគណខេត្តបាត់ដំបង។ ការដកតំណែងនេះក្រោមហេតុផលមួយចំនួន មានជាអាទិ៖ កន្លងមកអតីតព្រះចៅអធិការវត្តភ្នំខ្ពស់ មានប្រជាប្រិយលេចធ្លោ ខាងប្រជាធិបតេយ្យ ដែលជាឆ្អឹងទទឹងករបស់គណបក្សកាន់អំណាច និងដោយសារអតីតព្រះចៅអធិការមិនចុះញ៉មជាមួយព្រះអង្គលេខាព្រះមេគណខេត្តជាដើម។
ព្រះតេជព្រះគុណ ប៊ុត ប៊ុនតិញ៖ «រឿងទី៣ ភួន មុនី ហៅទៅជួបកាលពីថ្ងៃទី១៧-១៨ ខែកញ្ញា កន្លងទៅនោះ សុំឲ្យព្រះអង្គ ឃឹម សំអឿន ឈប់ធ្វើសកម្មភាពមនុស្សធម៌បន្ត បើមិនឈប់គេដកតំណែងចេញ។ លោកថាឈប់អត់បានទេ លោកចង់រួមចំណែកដោះស្រាយបញ្ហាសង្គម តែគេខឹងខ្លាំង ដោយសារលោកមិនព្រមស្ដាប់តាមឱវាទរបស់គេ គេដកលោកចេញពីចៅអធិការ ហើយទៅតែងតាំងចៅអធិការដែលទើបហ្នឹងបួសបានក្នុងរយៈពេលទើបតែមួយវស្សា ឲ្យធ្វើជាចៅអធិការទៅរួចទេ? មានការឆ្លៀវឆ្លាតក្នុងព្រះពុទ្ធសាសនាទេ បើអត់ មិនអាចធ្វើចៅអធិការបានទេ ហើយ ភួន មុនី ធ្វើនេះដុល្លារសុទ្ធសាធតែម្ដង»។
វិទ្យុអាស៊ីសេរី មិនអាចទាក់ទងព្រះតេជព្រះគុណ ភួន មុនី ព្រះលេខាមេគណ ខេត្តបាត់ដំបង ដើម្បី មានព្រះថេរដីកាជុំវិញបញ្ហានេះបានទេ នៅថ្ងៃទី២២ តុលា។ ចំណែកអភិបាលខេត្តបាត់ដំបង លោក ចាន់ សុផល មានប្រសាសន៍ថា វិវាទដែលកើតឡើងនៅវត្តភ្នំខ្ពស់ ឃុំតាគ្រាម ស្រុកបាណន់ នោះ ពុំមែនជាការដកតំណែងព្រះចៅអធិការវត្តនោះទេ ប៉ុន្តែជាការតែងតាំងព្រះចៅអធិការវត្តដែលពុំទាន់មានការតែងតាំងនៅឡើយ ដើម្បីឲ្យមានអ្នកដឹកនាំវត្តស្របតាមផ្លូវច្បាប់។ ទោះយ៉ាងនេះក្ដីលោកថា នឹងនាំបញ្ហានេះទៅពិភាក្សាជាមួយមេគណខេត្ត ដើម្បីដោះស្រាយលើការងារនេះ។
លោក ចាន់ សុផល៖ «លោកតាមេគណនោះ លោកតារវល់ពេកក៏អត់បានជួបទៅ។ ក៏ខ្ញុំថា ខ្ញុំបានដឹងពីជំហរលោកតាអ៊ីចឹង ចាំខ្ញុំករុណា ពិតលោកតាមេគណ លោកតាមេគណប្រគេនថាអ៊ីចេះ។លោកតាយល់ក្នុងការរៀបរាប់របស់ខ្ញុំពីតំណើរពីដំណើររឿងហ្នឹងទៅ ក៏លោកតា បើអ៊ីចឹងទុកឲ្យខ្ញុំពិតលោកតាមេគណទៅ ហើយលោកតាថា ដូចជាពេលវេលាសមរម្យដែរ ហើយក៏និមន្តទៅភ្នំពេញវិញទៅ»។
ទាក់ទងនឹងបញ្ហានេះដែរ មន្ត្រីស៊ើបអង្កេតអង្គការលីកាដូ ប្រចាំខេត្តបាត់ដំបង ដែលបានតាមដានក្នុងរឿងនេះ លោក ហេង សាយហុង មានប្រសាសន៍ថា ហេតុដែលអាជ្ញាធរខេត្តយល់ព្រមដោះស្រាយបញ្ហាបណ្ដោះអាសន្ននេះ ដោយសារមានសម្ពាធពីការធ្វើបាតុកម្មតវ៉ាតាមបែបលទ្ធិប្រជាធិបតេយ្យរបស់បណ្ដាញព្រះសង្ឃឯករាជ្យ ព្រោះបើគ្មានច្រកចេញក្នុងពេលនេះ អាចកើតមានការតវ៉ាទ្រង់ទ្រាយធំនៅថ្ងៃខាងមុខ។
ទោះជាយ៉ាងនេះក្ដី លោកថា បញ្ហានេះហាក់មិនទាន់បញ្ចប់ស្រួលបួលនៅឡើយ៖ «កាលណាមានផ្អើលក្ដុងក្ដាំង តវ៉ាអីដោយសាររឿងមិនសមហេតុសមផល អយុត្តិធម៌សង្គម ហើយចៀសមិនដោះស្រាយទេ ចៀសមិនរួចរួចទេ គប្បីតែដោះស្រាយទៅ សម្របសម្រួលទៅ ព្រោះថា លោកគង់នៅកន្លែងទីនោះ ញាតិញោមពុទ្ធបរិស័ទគេគាំទ្រ គេស្រលាញ់ ហើយបើកាលណាគាំទ្រ បានកសាង ដឹកនាំត្រឹមត្រូវ ស្របតាមព្រះពុទ្ធសាសនា ហើយចាំបាច់អីថែមលោកអីផ្សេងអីធ្វើឲ្យវាចលាចល»។
នៅរសៀលថ្ងៃដដែល បន្ទាប់ពីការតវ៉ារបស់ព្រះសង្ឃ និងអ្នកគាំទ្របញ្ចប់ប្រមាណជា ១០នាទីមក កងកម្លាំងនៃស្នងការនគរបាលខេត្តបាត់ដំបង ប្រមាណ ១០នាក់ ប្រដាប់ដោយអាវុធ ត្រូវបានបញ្ជូន ភ្លាមៗមកការពារនៅវត្តពោធិវាល ប៉ុន្តែពុំមានការប៉ះទង្គិចគ្នាទេ។
គណៈព្រះសង្ឃឯករាជ្យ និងប្រជាពលរដ្ឋអ្នកគាំទ្រ បានរំសាយការតវ៉ា ហើយថានឹងរង់ចាំមើលការរកដំណោះស្រាយ ប្រសិនបើមិនដូចការនិយាយរបស់អភិបាលខេត្តទេ ព្រះអង្គថានឹងតវ៉ាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។