ប្រជាពលរដ្ឋរាប់រយនាក់នៅក្រុងប៉ោយប៉ែត ខេត្តបន្ទាយមានជ័យ នៅថ្ងៃទី២៨ វិច្ឆិកា នាំគ្នាសម្រុកទៅចុះឈ្មោះនៅការិយាល័យបោះឆ្នោតសង្កាត់ប៉ោយប៉ែត យ៉ាងច្រើនកុះករ។ ប្រធានលេខាធិការរៀបចំការបោះឆ្នោតខេត្តបន្ទាយមានជ័យ អះអាងថា យ៉ាងហោចណាស់មានពលរដ្ឋទៅចុះឈ្មោះនៅក្នុងសង្កាត់នេះប្រមាណ ៥០០នាក់ក្នុងមួយថ្ងៃ។
ប្រជាពលរដ្ឋនៅសង្កាត់ប៉ោយប៉ែត ដែលពុំទាន់ចុះឈ្មោះបោះឆ្នោត កំពុងព្រួយបារម្ភខ្លាចក្រែងចុះឈ្មោះបោះឆ្នោតមិនទាន់ថ្ងៃកំណត់។
អាជីវករលក់ដូរនៅផ្សាររ៉ុងក្លឿ ខេត្តស្រះកែវ ប្រទេសថៃ កញ្ញា ថា ស្រីស្រស់ ថ្លែងនៅថ្ងៃទី២៨ វិច្ឆិកា ថា កញ្ញាមកតម្រង់ជួរចាប់លេខរៀងចុះឈ្មោះបោះឆ្នោតពីរថ្ងៃហើយ ក៏ប៉ុន្តែនៅមិនទាន់បានចុះឈ្មោះនៅឡើយ។ កញ្ញាអះអាងថា គណៈកម្មការនៃការិយាល័យចុះឈ្មោះនៅសង្កាត់ប៉ោយប៉ែត រៀបចំសណ្ដាប់ធ្នាប់បានល្អដែរ ក៏ប៉ុន្តែមនុស្សសម្រុកមកចុះឈ្មោះច្រើនលើសលប់ រហូតធ្វើការមិនទាន់៖ « ម្សិលមិញខ្ញុំមកមនុស្សច្រើន ហើយខ្ញុំយកអត្តសញ្ញាណប័ណ្ណថតចម្លងមក គេមិនចុះឈ្មោះឲ្យទេ ក៏ត្រឡប់ទៅវិញ។ តែថ្ងៃនេះ ខ្ញុំយកអត្តសញ្ញាណប័ណ្ណពិតមក មនុស្សច្រើនដូចគ្នា » ។
មិនខុសគ្នាទេ យុវជនម្នាក់ទៀតឈ្មោះ ចាន់ ពន្លក រៀបរាប់ថា លោកជាប់រវល់ការងារនៅឯផ្ទះមិនបានទៅចុះឈ្មោះពីដំបូង ហើយរំពឹងថានឹងទៅចុះឈ្មោះបោះឆ្នោតកៀកថ្ងៃបញ្ចប់។ លោកអះអាងថា អ្វីៗខុសពីក្ដីស្រមៃទាំងអស់ គឺនៅពេលទៅដល់ការិយាល័យចុះឈ្មោះនៅថ្ងៃជិតបញ្ចប់ បែរជាមានមនុស្សទៅចុះឈ្មោះច្រើនកុះករទៅវិញ៖ « ខ្ញុំមកតាំងម៉ោង ៨កន្លះព្រឹកមករហូតជិតម៉ោង ១២ថ្ងៃត្រង់ហើយ ព្រោះអីថ្ងៃមានអ្នកធ្វើការកាស៊ីណូមកចុះឈ្មោះបោះឆ្នោតច្រើន » ។
ប្រធានលេខាធិការគណៈកម្មការរៀបចំការបោះឆ្នោតខេត្តបន្ទាយមានជ័យ លោក ហ៊ី គឹមសេង មានប្រសាសន៍ថា ប្រជាពលរដ្ឋទៅចុះឈ្មោះបោះឆ្នោតនៅការិយាល័យសង្កាត់ប៉ោយប៉ែត ប្រមាណពី ៥០០នាក់ទៅ ៦០០នាក់ក្នុងមួយថ្ងៃ។ លោកបន្ថែមថា ប្រជាពលរដ្ឋសម្រុកចុះឈ្មោះច្រើនកុះករនៅក្នុងសង្កាត់នេះ ប្រមាណ ៥ថ្ងៃមកហើយ៖ « ដោយសារថ្ងៃនេះជាថ្ងៃចុះឈ្មោះចុងបង្ហើយ ធ្វើឲ្យពលរដ្ឋសម្រុកមកចុះឈ្មោះច្រើន ព្រោះពួកគាត់ជាប់រវល់ធ្វើការងារ ហើយរង់ចាំចុងក្រោយ ហើយអ្នកធ្វើការកាស៊ីណូមួយចំនួនក៏គេចាំសម្រុកថ្ងៃចុងក្រោយដែរ » ។
លោកបន្ថែមថា ប្រជាពលរដ្ឋដែលចុះឈ្មោះភាគច្រើន ជាបុគ្គលិកកាស៊ីណូ និងក្រុមអាជីវករលក់ដូរនៅផ្សាររ៉ុងក្លឿ ប្រទេសថៃ។
ទោះជាយ៉ាងនេះក្ដី ចៅសង្កាត់រងទី២ សង្កាត់ប៉ោយប៉ែត មកពីគណបក្ស សម រង្ស៊ី លោក ចៅ វាសនា អះអាងថា ប្រជាពលរដ្ឋប្រមាណ ៤ពាន់នាក់ទៀតបន្តសម្រុកទៅចុះឈ្មោះបោះឆ្នោតនៅក្នុងសង្កាត់មួយនេះ។ លោកបន្ថែមថា មូលហេតុដែលពលរដ្ឋទៅចុះឈ្មោះច្រើន ដោយសារពួកគាត់មួយចំនួនទើបតែទទួលព័ត៌មានអំពីការចុះឈ្មោះបោះឆ្នោត៖ « ពីមុនមកបុគ្គលិកកាស៊ីណូគាត់យកកាតកាស៊ីណូ និងអត្តសញ្ញាណប័ណ្ណ និងមានសាក្សីម្នាក់គាត់អាចចុះឈ្មោះបាន។ តែឥឡូវគេប្រើវិធីផ្សេងទៀត គឺឲ្យអ្នកមានអត្តសញ្ញាណប័ណ្ណទៅធ្វើលិខិតបដិសេធសិន ហើយរកសាក្សីឲ្យស្គាល់ផ្ទះ ឈ្មោះ និងទីលំនៅពិតប្រាកដអ៊ីចឹង គឺយ៉ាងណាឲ្យយឺតពេលវេលាចុះឈ្មោះមិនទាន់ » ។
ប្រជាពលរដ្ឋនៅក្នុងសង្កាត់ប៉ោយប៉ែត ដែលចុះឈ្មោះបោះឆ្នោតរួចគិតត្រឹមថ្ងៃទី២៧ វិច្ឆិកា មានជាង ៣ម៉ឺន ១ពាន់នាក់ (៣១.៧៦៦នាក់) គឺស្មើនឹងប្រមាណ ១១២ភាគរយនៃចំនួនអ្នកគ្រប់អាយុបោះឆ្នោតជាង ២ម៉ឺន ៨ពាន់នាក់ (២៨.៣៣០នាក់)។ លោក ចៅ វាសនា អះអាងថា មូលហេតុដែលចំនួនពលរដ្ឋច្រើនជាងតួលេខនៅក្នុងបញ្ជីចុះឈ្មោះ ដោយសារអាជ្ញាធរសង្កាត់មិនបានបញ្ចូលពលរដ្ឋដែលស្នាក់នៅបណ្ដោះអាសន្ន និងបុគ្គលិកធ្វើការក្រុមហ៊ុន និងនៅតាមកាស៊ីណូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។