តំណាងរាស្ត្រស្ត្រីរបស់គណបក្សសង្គ្រោះជាតិ មណ្ឌលបាត់ដំបង អ្នកស្រី មូរ សុខហួរ បានធ្វើដំណើរមកដល់កម្ពុជា វិញហើយ កាលពីរំលងអធ្រាត្រ ថ្ងៃទី២០ មេសា។
នៅអាកាសយានដ្ឋានអន្តរជាតិភ្នំពេញ មានមន្ត្រីជាន់ខ្ពស់គណបក្សសង្រ្គោះជាតិ និងអ្នកគាំទ្រគណបក្សនេះជាង ១០០នាក់ មកទទួលអ្នកស្រី។ គ្រាន់តែបានជាន់លើដីកំណើតវិញ អ្នកស្រីថ្លែងថា ដើម្បីបំពេញការងារជាតំណាងរាស្ត្រ។
ក្នុងពេលវិលត្រឡប់របស់អ្នកស្រី ពុំមានឃើញមានសត្ថកិច្ចដាក់ពង្រាយ ឬរង់ចាំចាប់អ្នកស្រីនៅប្រលានយន្តហោះទេ។
តំណាងរាស្ត្រគណបក្សប្រឆាំងរូបនេះ បានចាកចេញពីប្រទេសកម្ពុជា ជាង ៩ខែ ទៅរស់នៅសហរដ្ឋអាមេរិក ដើម្បីថែរក្សាជំងឺស្វាមីរបស់អ្នកស្រី ដែលធ្លាក់ខ្លួនឈឺដោយសារជំងឺមហារីក។ អ្នកស្រីឲ្យដឹងថា ការវិលត្រឡប់មកកាន់មាតុភូមិកំណើតវិញនេះ ជាការចូលរួមបម្រើប្រទេសជាតិ ក្នុងនាមអ្នកស្រីជាអ្នកតំណាងរាស្ត្រ និងបង្កើតជាមូលនិធិសប្បុរសធម៌មួយ ដើម្បីជួយដល់អ្នកកើតជំងឺមហារីកនៅមន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យ រុស្ស៊ី តាមបំណងរបស់ស្វាមីអ្នកស្រីមុនពេលលោកស្លាប់។ លោក ស្កត់ លីពឺរ៍ (Scott Leiper) បានទទួលមរណភាពនៅទីក្រុងញីវយ៉ក (New York) ក្នុងអាយុ ៦១ឆ្នាំ ដោយជំងឺមហារីក។
សូមស្ដាប់សេចក្ដីរាយការណ៍ផ្ទាល់របស់លោក ប្រាជ្ញ ចេវ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។