លោកនាយករដ្ឋមន្ត្រី ហ៊ុន សែន ចាត់ឲ្យ រដ្ឋមន្ត្រីក្រសួងរ៉ែនិងថាមពល លោក ស៊ុយ សែម ចូលខ្លួនឆ្លើយបំភ្លឺនារដ្ឋសភា នៅថ្ងៃទី១៩ ខែមិថុនា ខាងមុខ។ ចំណាត់ការនេះធ្វើឡើងបន្ទាប់ពីតំណាងរាស្ត្រមកពីគណបក្សប្រជាជនកម្ពុជា ចំនួន ៤៧រូប បានផ្ញើលិខិតមួយច្បាប់កោះហៅលោក ស៊ុយ សែម ឲ្យចូលខ្លួនឆ្លើយសំណួររបស់អ្នកតំណាងរាស្ត្រលើផលប៉ះពាល់នៃគម្រោងទំនប់វារីអគ្គិសនីសេសានក្រោម២។
រដ្ឋមន្ត្រីក្រសួងរ៉ែនិងថាមពល ដែលជាក្រសួងទើបបង្កើតថ្មីនៅអាណត្តិនេះ លោក ស៊ុយ សែម នឹងបង្ហាញមុខចំពោះសភាពេញអង្គនៅថ្ងៃទី១៩ ខែមិថុនា ដើម្បីឲ្យសភាសាកសួរនូវបញ្ហានានា ដែលពាក់ព័ន្ធទៅនឹងសមត្ថកិច្ចរបស់លោកនៅក្នុងការអភិវឌ្ឍវារីអគ្គិសនីសេសានក្រោម២ នៅខេត្តស្ទឹងត្រែង។
មន្ត្រីអ្នកនាំពាក្យរដ្ឋសភាជាតិ លោក ឈាង វុន ឲ្យដឹងថា ការកោះហៅលោក ស៊ុយ សែម មកសាកសួរនេះ គឺធ្វើឡើងតាមច្បាប់និងបទបញ្ជាផ្ទៃក្នុងរបស់រដ្ឋសភាជាតិ។ លោកបន្តថា លោកមិនទាន់បានឃើញលិខិតរបស់រាជរដ្ឋាភិបាល ផ្ញើជូនរដ្ឋសភាស្ដីពីបញ្ហានេះនៅឡើយ។ តែលោកទទួលដំណឹងថា លោក ហ៊ុន សែន បានយល់ព្រម និងចាត់តាំងរួចហើយឲ្យលោក ស៊ុយ សែម ចូលបំភ្លឺក្នុងរដ្ឋសភាតាមកាលកំណត់។
លោក ឈាង វុន៖ «ហ្នឹងជាគោលការណ៍របស់រាជរដ្ឋាភិបាលអាណត្តិទី៥ហ្នឹងតើ! ថាអ្នកដែលកាន់ការតាមជំនាញនីមួយៗ នឹងចូលខ្លួនបំភ្លឺក្នុងរដ្ឋសភា»។
ទោះជាយ៉ាងណាក្តី កាសែតក្នុងស្រុកបានស្រង់ខ្លឹមសារលិខិតរបស់លោក ហ៊ុន សែន ចុះថ្ងៃទី២ ខែមិថុនា ផ្ញើជូនប្រធានរដ្ឋសភា លោក ហេង សំរិន លើកឡើងថា រាជរដ្ឋាភិបាលនឹងចាត់លោក ស៊ុយ សែម ទៅធ្វើការបំភ្លឺដោយផ្ទាល់មាត់ជូនរដ្ឋសភាតាមកាលបរិច្ឆេទ ដែលបានកំណត់ដោយរដ្ឋសភា។
កាលពីថ្ងៃទី២១ ខែឧសភា តំណាងរាស្ត្រគណបក្សប្រជាជនកម្ពុជា និងជាអតីតអភិបាលខេត្តស្ទឹងត្រែង លោក ឡូយ សុផាត បានថ្លែងបរិហារគម្រោងសាងសង់ទំនប់វារីអគ្គិសនីសេសានក្រោម២ ថា មានឧក្រិដ្ឋជនសម្ងំលាក់ខ្លួនកាប់បំផ្លាញព្រៃឈើនៅទីនោះ។ លោកក៏បញ្ជាក់ថា ក្រុមឈ្មួញធំៗ បានកាប់ឈើនៅតំបន់ក្រៅអាងទំនប់វារីអគ្គិសនីយ៉ាងអនាធិបតេយ្យ។ ប្រសាសន៍របស់លោក ឡូយ សូផាត គឺស្រដៀងគ្នានឹងសម្ដីរបស់មន្ត្រីសង្គមស៊ីវិលដែលបានប្រាប់អ្នកកាសែតជាច្រើនដងច្រើនសាថា ផ្ទៃអាងទំនប់វារីអគ្គិសនីសេសានក្រោម២ ជាកន្លែងដែលលាងឈើខុសច្បាប់។
គម្រោងសាងសង់ទំនប់វារីអគ្គិសនីសេសានក្រោម២ ត្រូវបានរដ្ឋសភាអនុញ្ញាតឲ្យរដ្ឋាភិបាលសាងសង់នៅចុងឆ្នាំ២០១២។ គម្រោងនេះមានទឹកប្រាក់សរុបជិត ៨០០លានដុល្លារ ដែលមានអនុភាពអគ្គិសនី ៤០០មេហ្គាវ៉ាត់។ ដើម្បីអនុវត្តគម្រោងនេះ រាជរដ្ឋាភិបាលត្រូវកាប់ព្រៃឈើចំនួនជាង ៣ម៉ឺនហិកតារយកទីតាំងធ្វើអាងស្តុកទឹក និងត្រូវជម្លៀសពលរដ្ឋចេញពីលំនៅឋានចំនួន ១.០២៥គ្រួសារ ដែលពលរដ្ឋភាគច្រើនជាជនជាតិដើមភាគតិច។
មន្ត្រីសម្របសម្រួលអង្គការបណ្ដាញការពារទន្លេបី លោក មៀច មាន ថ្លែងស្វាគមន៍ចំពោះចំណាត់ការរបស់រដ្ឋសភា និងរដ្ឋាភិបាល ជុំវិញគម្រោងសាងសង់ទំនប់នេះ។ លោកបន្តថា សភាគួរណាស់តែជំរុញឲ្យរដ្ឋាភិបាលផ្អាកគម្រោងនេះ ដើម្បីប្រយោជន៍ជាតិទាំងមូល។
លោកបញ្ជាក់ថា បើសិនជាសួរឲ្យបកស្រាយ ហើយបកស្រាយរួចគ្មានចំណាត់ដដែលនោះ វានឹងធ្វើឲ្យពលរដ្ឋកាន់តែបាត់បង់ជំនឿបន្ថែមទៀតទៅលើរដ្ឋាភិបាល៖ «ធ្វើការសិក្សាឡើងវិញទៅធនធានធម្មជាតិ ឬសត្វសំខាន់ៗផ្សេងទៀត ដូចផ្សោតដូចអីអ៊ីចឹង គេគួរតែថ្លឹងថ្លែងគ្នា គេមិនគួរណាគិតតែពីសាងសង់ឲ្យតែបាននោះទេ»។
គម្រោងនេះសាងសង់ឡើងនៅលើផ្ទៃដីរាបដែលមានសណ្ឋានជាចានទាប ដែលធ្វើឲ្យប៉ះពាល់ខ្លាំងដល់វិស័យបរិស្ថាន។ តាមរបាយការណ៍សិក្សាស្រាវជ្រាវរបស់សង្គមស៊ីវិលបញ្ជាក់ថា បើសិនរដ្ឋាភិបាលផ្អាកគម្រោងនេះ ហើយងាកទៅសាងសង់ទំនប់វារីអគ្គិសនីនៅតំបន់ផ្សេងវិញនោះនឹងចំណេញច្រើនដល់វិស័យសេដ្ឋកិច្ចនិងបរិស្ថាន។ ទីតាំងសក្ដានុពលដែលរដ្ឋាភិបាលមើលរំលងនោះ មានដូចជា ទំនប់ព្រែកលាង១ និងព្រែកលាង២ សេសានក្រោម១ និងស្រែពក៣។ ទំនប់ទាំង៤នេះមានអនុភាពអគ្គិសនីប្រមាណ ៥០០ ទៅ ៦០០ម៉េហ្គាវ៉ាត់ ហើយក៏មានផលប៉ះពាល់ផ្នែកសង្គមនិងបរិស្ថានតិចតួចជាងទំនប់វារីអគ្គិសនីសេសានក្រោម២ទៀតផង។
មន្ត្រីសង្គមស៊ីវិលបញ្ជាក់ថា គម្រោងសាងសង់ទំនប់វារីអគ្គិសនីសេសានក្រោមពីរនេះ មិនត្រឹមតែប៉ះពាល់ដល់ព្រៃឈើនិងជម្លៀសពលរដ្ឋចេញប៉ុណ្ណោះទេ តែគម្រោងនេះក៏នឹងកម្ចាត់ផ្នូរសពរបស់ជនជាតិដើម ធ្វើឲ្យជនជាតិដើមភាគតិចបាត់បង់មុខរបរ បាត់បង់ប្រពៃណី នាំឲ្យផុតពូជធនធានត្រី ធនធានជលផលដទៃទៀត ធ្វើឲ្យបរិយាកាសអាកាសធាតុប្រែប្រួល។ ហេតុនេះអ្នកដែលត្រូវឡើងមកបំភ្លឺនៅរដ្ឋសភា មិនមែនតែរដ្ឋមន្ត្រីក្រសួងរ៉ែនិងថាមពលមួយនាក់ប៉ុណ្ណោះទេ។
ចំពោះការកោះហៅលោក ស៊ុយ សែម មកបំភ្លឺនៅរដ្ឋសភាវិញ វាជាលើកទី១ហើយ ដែលតំណាងរាស្ត្រគណបក្សប្រជាជនកម្ពុជា កោះហៅមន្ត្រីរួមបក្សមកសួរនាំក្នុងអាណត្តិនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។